ချင်းပြည်နယ်မှာ ခုခံတော်လှန်စစ် ၂ နှစ်ကျော်အတွင်း စစ်ကောင်စီရဲ့ တပ်စခန်း ၉ ခုကို သိမ်းပိုက်နိုင်ခဲ့တယ်လို့ အမျိုးသားညီညွတ်ရေးအစိုးရ (NUG) ရဲ့ ပြည်သူ့ခုခံတွန်းလှန်စစ် ၂ နှစ်ပြည့် အစီရင်ခံစာမှာ ပါရှိပါတယ်။
၂၀၂၁ ခုနှစ် စက်တင်ဘာလကနေ ၂၀၂၂ ခုနှစ် ပထမတွန်းလှန်စစ်မှာတော့ စစ်ကောင်စီစခန်း တခုသာ သိမ်းပိုက်နိုင်ခဲ့ပြီး ၂၀၂၂ ခုနှစ် စက်တင်ဘာလကနေ ၂၀၂၃ ခုနှစ် စက်တင်ဘာလ အထိမှာတော့ စစ်ကောင်စီစခန်း ၈ ခုအထိ သိမ်းပိုက်နိုင်ခဲ့တယ်လို့ သိရပါတယ်။
ချင်းပြည်နယ်မှာ ၂၀၂၁-၂၀၂၂ တွန်းလှန်စစ်အတွင်း တိုက်ပွဲပေါင်း ၃၀၄ ကြိမ် ဖြစ်ပွားပြီး ၂၀၂၂-၂၀၂၃ ဒုတိယတွန်းလှန်စစ်မှာတော့ တိုက်ပွဲပေါင်း ၂၆၈ ကြိမ် ဖြစ်ပွားခဲ့တယ်လို့ အစီရင်ခံစာမှာ ဖော်ပြပါတယ်။
ချင်းပြည်နယ်မှာ စစ်ကောင်စီတပ်စခန်း ၉ ခု သိမ်းပိုက်နိုင်ခဲ့ပြီး ချင်းအမျိုးသားတပ်ဦး CNF အနေနဲ့ ချင်းကာကွယ်ရေးတပ်တွေနဲ့ ပူးပေါင်းတိုက်ပွဲတွေအတွင်းမှာ တီးတိန်၊ ဟားခါး၊ ထန်တလန်၊ မတူပီ၊ မင်းတပ် စတဲ့ တပ်စခန်း ၅ ခုကို သိမ်းပိုက်နိုင်ခဲ့တယ်လို့ သိရပါတယ်။
CNF ပြောရေးဆိုခွင့်ရှိသူ ဆလိုင်းထက်နီက “စစ်ကောင်စီ အထိုင်တပ်စခန်းတွေကို တိုက်ခိုက်မှုတွေ လုပ်ခဲ့ပါတယ်။ CNF အနေနဲ့လည်း စစ်ကောင်စီတပ်စခန်း ၅ ခု သိမ်းပိုက်ထားနိုင်ခဲ့တယ်။ ချင်းပြည်နယ်ရဲ့ စစ်ရေးအခြေအနေကတော့ လက်ရှိ ငြိမ်နေတယ်လို့ ပြောလို့ရတယ်” လို့ ပြောပါတယ်။
၂၀၂၁ စက်တင်ဘာ ၇ ရက်ကစပြီး “မင်းအောင်လှိုင် ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်းနေ၊ လှေအောင်း မြင်းဇောင်းမကျန် တွန်းလှန်တိုက်ဖျက်ကြပါ” ဆိုတဲ့ NUG အစိုးရ ယာယီသမ္မတ ဒူဝါလရှီးလရဲ့ မိန့်ခွန်းနဲ့အတူ လက်နက်ကိုင်တော်လှန်ရေးကို စတင်ခဲ့ကြပါတယ်။
