စစ်ကိုင်းတိုင်း၊ ဘုတလင်မြို့ပေါ်က စစ်ကောင်စီတပ်ဖွဲ့ဝင်တွေကို စက်တင်ဘာ ၇ ရက် ဒီမနက် ၁၀ နာရီကျော်က ပြည်သူ့ကာကွယ်ရေးအဖွဲ့က ဝင်ရောက်ပစ်ခတ်နိုင်ခဲ့တယ်လို့ ဒေသခံ ပြည်သူ့ကာကွယ်ရေး ခေါင်းဆောင်တွေဆီကနေ သိရပါတယ်။
ဘုတလင်မြို့၊ မြန်မာ့စီးပွားရေးဘဏ်အနီး ဘုတလင်-ကနီ-ကနဲ လမ်းမပေါ်မှာ ဖြစ်ပွားခဲ့တာလို့ ဒေသခအခြေစိုက် ကာကွယ်ရေးခေါင်းဆောင်တဦးကပြောပါတယ်။
“ကျနော်တို့က ဘဏ်နဲ့ ထွေအုပ်ရုံးမှာ တပ်စွဲထားတဲ့ (--)တွေကို ပစ်ခတ်ရအောင်လို့ ချဉ်းကပ်တာပေါ့။ အဲဒါကို စစ်(--)ကင်းပုန်းနဲ့ ထိပ်တိုက်တိုးတယ်။ ကံကောင်းချင်တော့ စခတွေက ကျေနာ်တို့ကို သူတို့စစ်ကောင်စီတပ်ကလို့ ထင်ပြီး ဒီဘက်ကိုလာ ဆိုပြီး ခေါ်တယ်။ ကျနော်တို့က စခတွေဆိုတာကို သိလို့ လက်ဦးမှုရယူပြီး အပိုင်ပစ်ခတ်ခဲ့တာဗျ။ ကျနော်တို့မျက်စိနဲ့ တပ်အပ်မြင်ခဲ့ရတာက ရဲတဦးနဲ့ စခ ၂ ဦးကတော့ နေရာတင်သေတယ်။ ရဲတပ်သား ဖိုးထူးကိုင်တဲ့ G3 တလက်ကတော့ ကျနော်တို့ဘက်က ကောက်လာနိုင်ခဲ့တယ်။ ကိုယ့်ဘက်ကတော့ အထိအခိုက်မရှိ တပ်ပြန်ဆုတ်လာနိုင်ခဲ့တယ်။”
အခုတိုက်ခိုက်မှုကို ဘုတလင်မြို့နယ် ပြည်သူ့ကာကွယ်ရေး ညီနောင်အဖွဲ့များအားလုံး ပူးပေါင်းတိုက်ခိုက်ခဲ့တာ ဖြစ်ပါတယ်။
အခုလို ကာကွယ်ရေးအဖွဲ့ဘက်က ဝင်ရောက်ပစ်ခတ်ခံရပြီး ကနီ-ကနဲ-ဘုတလင်သွားရာ လမ်းပိုင်းကို စစ်အင်အားအလုံးအရင်းနဲ့ စစ်ဆေးမှုတွေ လုပ်ဆောင်နေဆဲဖြစ်တယ်လို့ ဒေသခံတွေရဲ့ ပြောပြချက်အရ သိရပါတယ်။
ယင်းမာပင်မြို့နယ်၊ စည်သူသစ်ကွင်းမှာလည်း သစ်ခိုးထုတ်နေကြတဲ့ အင်အား ၁၀၀ ခန့်ပါ စစ်ကောင်စီစစ်ကြောင်းနဲ့ Union Liberation Front (တပ်ပေါင်းစု) တို့ကြား စက်တင်ဘာ ၆ ရက် မနက် ၈ နာရီက တိုက်ပွဲ ၂ နာရီကျော်ကြာ ဖြစ်ပွားခဲ့ရာ စစ်ကောင်စီဘက်က ထိခိုက်ကျဆုံးသူ ၁၅ ယောက်အထက် ရှိခဲ့တယ်လို့ ULF က ဒီနေ့ စက်တင်ဘာ ၇ ရက်မှာ ထုတ်ပြန်ပါတယ်။
ULF ပြန်ကြားရေး တာဝန်ခံ ဂျော်ဒန်က “သူတို့က ကျောက်ကုန်းရွာ ဘုန်းကြီးကျောင်းမှာ ၃ ရက် တပ်စွဲပြီးတော့ နောက်ရက် ဒီဘက် (စည်သူသစ်ကွင်း) ကိုထွက်တဲ့အချိန်၊ ရှေ့ပွိုင့်ဖြစ်ဖို့များပါတယ်၊ ကျနော်တို့နဲ့ တွေ့တာပါ။ အဲအချိန်မှာ ထိတွေ့တိုက်ပွဲ ဖြစ်တာပေါ့ဗျာ။သူတို့ (စခ) ဘက်က အကျအဆုံးကတော့ ကျနော်တို့မျက်မြင် ၄ ယောက်ရှိပြီးတော့ တပ်တွင်းသတင်းအရ နောက်ထပ် ၅ ယောက်ကျတယ်၊ ၆ ယောက်က စိုးရိမ်ရတဲ့ဒဏ်ရာ အခြေအနေ ရရှိတယ်လို့ ကျနော်တို့ သတင်းထပ်ရပါတယ်။ ကျနော်တို့ ထုတ်ပြန်ထားတာကတော့ ခန့်မှန်းခြေ ၁၅ ယောက် ကျဆုံးတယ်လို့ ထုတ်ပြန်ထားပါတယ်ဗျ။”
တိုက်ပွဲဖြစ်ပွားပြီးချိန်မှာ စစ်ကောင်စီဘက်က အထိနာတဲ့အတွက် အနောက်မြောက်တိုင်း စစ်ဌာနချုပ်မှ ဟောင်ဝစ်ဇာလက်နက်ကြီးနဲ့ ၄ ကြိမ်တိတိ ပစ်ကူပေးခဲ့သေးကြောင်း သိရပါတယ်။
အဆိုပါတိုက်ပွဲမှာ ULF (မဟာမိတ်တပ်ပေါင်းစု) မှ ရဲဘော် ၆ ဦး အသက်အန္တရာယ် (မစိုးရိမ်ရ) ဒဏ်ရာရရှိခဲ့ပြီး တိုက်ပွဲအတွင်း MA1 နှစ်လက်၊ MA2 တလက်၊ 5.56 ကျည် ၄၀၀ တောင့်၊ ကျည်ဘောက် ၁၇ ဘောက်၊ Icon 1 လုံးနဲ့ ဖုန်း ၁ လုံး သိမ်းဆည်းရမိတယ်လို့ သိရပါတယ်။
အခုတိုက်ပွဲကို ULF (တပ်ပေါင်းစု) မှ စစ်ကြောင်းမှူး ဗိုလ်နိုင်မင်း ဦးဆောင်ပြီး Comrade Column (CC) မှ နဂါးညီနောင်တပ်ဖွဲ့ (DBTF)၊ ဗိုလ်မုတ်ဆိတ်တပ်ဖွဲ့၊ ချိုမိုင်မိုင် တော်လှန်ရေး အင်အားစု၊ ဗျတ္တညီနောင်၊ ချင်းတွင်းတိုက်ဂါး (LPDF)၊ ဗိုလ်ထွန်းတောက် (LPDF)၊ Chindwin Myay Division PDF (တပ်ခွဲ)၊ B Two Fighters၊ Bant Two၊ Alpha Column မှ ခွဲ-၁ Alpha Special Force၊ ခွဲ-၂ Triple Two Task Force၊ ခွဲ-၃ Chindwin Galone Yarzar Guerilla၊ ခွဲ-၄ Monywa Truth Of Force၊ ခွဲ-၅ Yinmarbin Local PDF၊ KLG Column တပ်ရင်း-၂၁၊ ၂၂၊ ၂၃ တို့ အပြင် ယင်းမာပင်ခရိုင် (တပ်ရင်း-၁၊ ၂)၊ YMB Column၊ B 21 PDF (တပ်ရင်း-၁၇)၊ PDA (တပ်ရင်း-၃၅)၊ ဗိုလ်နှုတ်ခမ်းမွှေးတပ်ဖွဲ့တို့ ပူးပေါင်းပါဝင်ခဲ့တယ်လို့ ဆိုပါတယ်။
မကွေးတိုင်း၊ မြိုင်မြို့နယ်မှာလည်း စက်တင်ဘာ ၅ ရက်နဲ့ ၆ ရက်တွေမှာ စစ်ကောင်စီရဲ့ ရိက္ခာပို့စစ်ကြောင်း တိုက်ခိုက်ခံရပြီး ၁၂ ယောက်ထက်မနည်း ဒဏ်ရာရရှိခဲ့တယ်လို့ မြိုင်မြို့နယ် ပကဖ ကနေ သိရပါတယ်။
မြိုင်မြို့နယ် ကန်နီကျေးရွာကို ရိက္ခာပို့ဖို့ထွက်လာတဲ့ အင်အား ၇၀ လောက်ပါတဲ့ စစ်ကောင်စီ စစ်ကြောင်းကို မြိုင်-ပေါက်ပြင်း လမ်းဆုံမှာ မိုင်းဆွဲတိုက်ခိုက်ခဲ့လို့ စစ်ကောင်စီတပ်သား ၅ ယောက် အပြင်းအထန်ဒဏ်ရာရရှိခဲ့ပြီး မြိုင်မြို့ ပြည်သူ့ဆေးရုံကို ပို့ဆောင်လိုက်ကြတယ်လို့ မြိုင်မြို့နယ် ပကဖ ပြန်ကြားရေးတာဝန်ခံ ကိုသုခက ဒီဗွီဘီကို ပြောပါတယ်။
ဒါ့အပြင် ရိက္ခာပို့ကားတွေကို ဂွေးပင်လယ်ရွာ ချောင်းနားမှာ ထပ်မံမိုင်းဆွဲတိုက်ခိုက်ခဲ့လို့ စစ်ကောင်စီတပ်သား ၇ ယောက်လောက် ဒဏ်ရာရရှိခဲ့ပြီး အဲဒီကားတွေလည်း အဲဒီနေရာမှာပဲ ညအိပ် ရပ်နားခဲ့ရတယ်လို့ ဆိုပါတယ်။
အဲဒီစစ်ကြောင်းကို စက်တင်ဘာ ၆ ရက် မနက် ၈ နာရီလောက်မှာ မြိုင်မြို့နယ်ပကဖ၊ မြိုင် UAV Fighter အဖွဲ့က ဦးဆောင်ကာ မောင်းသူမဲ့ လေယာဥ်ငယ်တွေနဲ့ ဗုံးကြဲတိုက်ခိုက်ခဲ့သလို သံပရာခြံရွာနားမှာလည်း မြိုင်ပကဖ တပ်ရင်း-၃ ဗိုလ်လင်းမြွေအဖွဲ့နဲ့ တိုက်ပွဲဖြစ်ပွားခဲ့လို့ စစ်ကောင်စီဘက်က ထိခိုက်သူရှိနိုင်ပြီး ကန်နီရွာဘက်ကို မထွက်နိုင်ဘဲ ရပ်တန့်နေရတယ်လို့ ပြောပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။