ယူ-၂၃ အာရှဖလားခြေစစ်ပွဲ အုပ်စုအဖွင့်ပွဲစဥ်အဖြစ် မြန်မာယူ-၂၃ အသင်းနဲ့ ကာဂျစ္စတန် ယူ-၂၃ အသင်းတို့ တောင်ကိုရီးယားနိုင်ငံမှာ စက်တင်ဘာ ၆ ရက်က ယှဥ်ပြိုင်ကစားခဲ့ရာ တဖက် ၁ ဂိုးစီနဲ့ သရေကျခဲ့ပါတယ်။
မြန်မာအသင်းဟာ ကာဂျစ္စတန်အသင်းကို အပြန်အလှန် ကစားနိုင်ခဲ့သလို ၂၃ မိနစ်မှာလည်း ကောင်းထက်ပိုင်က ဦးဆောင်ဂိုး သွင်းခဲ့ပေမဲ့လည်း အနိုင်ရလဒ်ကို မထိန်းနိုင်တာကြောင့် ၅၄ မိနစ်မှာ ချေပဂိုးပေးခဲ့ရပြီး သရေကျခဲ့ပါတယ်။
အုပ်စုအတွင်း တခြားပွဲစဥ်တွေဖြစ်တဲ့ တောင်ကိုရီးယားယူ-၂၃ နဲ့ ကာတာယူ-၂၃ တို့ပွဲစဥ်မှာ ကာတာယူ-၂၃ အသင်းက ၂ ဂိုးပြတ်နဲ့ အနိုင်ရရှိခဲ့ပါတယ်။
အုပ်စု ခ မှာ ကာတာအသင်းက ရမှတ် ၃ မှတ်နဲ့ အုပ်စုပထမ၊ မြန်မာနဲ့ ကာဂျစ္စတန်တို့က ရမှတ် ၁ မှတ်စီနဲ့ အုပ်စုဒုတိယနဲ့ တတိယ၊ တောင်ကိုရီးယားအသင်းက ရမှတ်မရှိနဲ့ အုပ်စုနောက်ဆုံးနေရာမှာ ရပ်တည်နေပါတယ်။
မြန်မာယူ-၂၃ အသင်းဟာ အုပ်စုဒုတိယပွဲစဥ်အဖြစ် ကာတာယူ-၂၃ အသင်းနဲ့ စက်တင်ဘာ ၉ ရက် မြန်မာစံတော်ချိန် ၁ နာရီခွဲမှာ ယှဥ်ပြိုင်ရမှာဖြစ်ပါတယ်။
ကာတာယူ-၂၃ အသင်းဟာ ၂၀၂၄ အာရှဖလား အိမ်ရှင်ဖြစ်တာကြောင့် အခုပြိုင်ပွဲကို ခြေစမ်းသဘောအနေနဲ့သာ ဝင်ရောက်ယှဥ်ပြိုင်တာ ဖြစ်တဲ့အတွက် ရလဒ်တွေကို ထည့်သွင်းတွက်ချက်ခြင်းမရှိပါဘူး။
မြန်မာယူ-၂၃ အသင်းအနေနဲ့ ၂၀၂၄ အာရှဖလား သွားရောက်ကစားနိုင်ဖို့အတွက် အုပ်စုနောက်ဆုံးပွဲစဥ်ဖြစ်တဲ့ တောင်ကိုရီးယား ယူ-၂၃ အသင်းကို အနိုင်ရရှိဖို့ လိုအပ်ပါတယ်။
Photo-MFF
