စစ်ကောင်စီတပ်တွေက ပြီးခဲ့တဲ့ ဩဂုတ် တလတာအတွင်း နိုင်ငံတဝန်း မီးရှို့ဖျက်ဆီးမှု ၄၈ ကြိမ်ထိ ကျူးလွန်ခဲ့ကြပြီး တိုင်းနဲ့ ပြည်နယ် ၈ ခုက အရပ်သားနေအိမ် အလုံး ၁,၇၅၀ နီးပါး မီးလောင်ပျက်စီးဆုံးရှုံးခဲ့ရတယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ပါတယ်။

NUG အစိုးရ၊ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန၊ မီးသတ်ဦးစီးဌာနက စာရင်းပြုစု ထုတ်ပြန်ချက်အရ စစ်ကိုင်းတိုင်းထဲမှာ မီးရှို့ခံရတဲ့အကြိမ်ရေ ၂၇ ကြိမ်နဲ့ အများဆုံး ကျူးလွန်ခဲ့ကြပြီး မီးလောင်ပျက်စီးခဲ့ရတဲ့ အရပ်သားနေအိမ် ၁,၁၂၈ လုံး၊ မီးရှို့သတ်ဖြတ်ခံရသူ ၄ ယောက်၊ ထိခိုက်ပျက်စီးခဲ့တဲ့ စာသင်ကျောင်း ၁ ကျောင်းနဲ့ ဘာသာရေးအဆောက်အဦး ၁ လုံး၊ ဆေးရုံ ၁ ရုံ ရှိခဲ့တယ်လို့ ဆိုပါတယ်။

အဲဒီနောက်မှာတော့ မကွေးတိုင်းထဲမှာ မီးရှို့ခံရတဲ့အကြိမ်ရေ ၈ ကြိမ်၊ မီးလောင်ပျက်စီးခဲ့ရတဲ့ အရပ်သားနေအိမ် ၃၁၃ လုံးအထိ ရှိခဲ့ပြီးတော့ မီးရှို့သတ်ဖြတ်ခံရသူ ၁ ယောက် ရှိခဲ့တယ်လို့ ဆိုပါတယ်။

ပဲခူးတိုင်းထဲမှာတော့ စစ်ကောင်စီတပ်တွေ မီးရှို့ခံရတဲ့အကြိမ်ရေ ၂ ကြိမ်ရှိခဲ့ပြီး မီးလောင်ပျက်စီးခဲ့ရတဲ့ အရပ်သားနေအိမ် ၉၂ လုံးအထိ ရှိခဲ့တယ်လို့ ထုတ်ပြန်ပါတယ်။

ဒါ့အပြင် မန္တလေးတိုင်းထဲမှာတော့ မီးရှို့ခံရတဲ့အကြိမ်ရေ ၂ ကြိမ်ရှိခဲ့ပြီး မီးလောင်ပျက်စီးခဲ့ရတဲ့ အရပ်သားနေအိမ်အလုံး ၈၀ အထိ ရှိခဲ့ကာ ကချင်ပြည်နယ်မှာလည်း မီးရှို့ခံရတဲ့ အကြိမ်ရေ ၂ ကြိမ်ရှိခဲ့ပြီး မီးလောင်ပျက်စီးခဲ့ရတဲ့ အရပ်သားနေအိမ် ၆၇ လုံးအထိ ရှိခဲ့တယ်လို့ ထုတ်ပြန်ပါတယ်။

ကယားပြည်နယ်မှာတော့ စစ်ကောင်စီတပ်တွေ မီးရှို့ခံရတဲ့ အကြိမ်ရေ ၄ ကြိမ်ရှိခဲ့ပြီး မီးလောင် ပျက်စီးခဲ့ရတဲ့ အရပ်သားနေအိမ် ၄၆ လုံးနဲ့ ထိခိုက်ပျက်စီးခဲ့တဲ့ စာသင်ကျောင်း ၁ ကျောင်း ရှိခဲ့တယ်လို့ ဆိုပါတယ်။

ဒါ့အပြင် တနင်္သာရီတိုင်းမှာတော့ စစ်ကောင်စီတပ်တွေ မီးရှို့ခံရတဲ့အကြိမ်ရေ ၂ ကြိမ်၊ မီးလောင် ပျက်စီးခဲ့ရတဲ့ အရပ်သားနေအိမ် ၁၆ လုံးအထိ ရှိခဲ့ပြီးတော့ ကရင်ပြည်နယ် မှာလည်း  မီးရှို့ခံရတဲ့ အကြိမ်ရေ ၁ ကြိမ်ရှိခဲ့ပြီး မီးလောင် ပျက်စီးခဲ့ရတဲ့ အရပ်သားနေအိမ် ၆ လုံး ရှိခဲ့တယ်လို့ ဆိုပါတယ်။

ဒီအချက်အလက်တွေကိုတော့ NUG အစိုးရက လွတ်လပ်တဲ့မီဒီယာတွေ၊ အရပ်ဘက် အဖွဲ့ အစည်းတွေရဲ့ ထုတ်ပြန်ချက်တွေနဲ့ မြေပြင်ကနေ ပြည်သူလူထုပေးပို့တဲ့ သတင်း အချက် အလက်တွေကို စိစစ်ဖော်ပြတာဖြစ်ပြီး မြေပြင်မှာတော့ စစ်ကောင်စီတပ်တွေရဲ့ အကြမ်း ဖက်မှုတွေဟာ ပိုပြီးတော့ များပြားနိုင်တယ်လို့ ဆိုပါတယ်။