တနင်္သာရီတိုင်း၊ ပုလောမြို့နယ်၊ ပလမြို့မှာ စစ်ကောင်စီက လက်နက်ကြီးနဲ့ ပစ်ခတ်လို့ ၈ တန်းကျောင်းသား ၁ ယောက် အပါအဝင် အရပ်သား ၆ ယောက် ထက်မနည်း ထိခိုက်ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

စက်တင်ဘာ ၁ ရက်နေ့၊ မနက်ပိုင်းမှာ ဒေသခံပြည်သူ့ကာကွယ်ရေးတပ်များက ပလမြို့နားကို ဝင်ရောက်လာပြီးနောက် ပြန်လည်ဆုတ်ခွာချိန် နေ့လယ် ၁၂ နာရီမှာ ပလမြို့ရဲစခန်းကနေ လက်နက်ကြီးနဲ့ ၆ ချက် ဝန်းကျင်လောက်ပစ်ခတ်တာကြောင့် ဒေသခံတွေ ထိခိုက်ဒဏ်ရာရရှိခဲ့တာပါ။

မြိတ်ခရိုင်တပ်ရင်း ၁ သတင်းနဲ့ပြန်ကြားရေးတာဝန်ခံက “၈ တန်းကျောင်းသားမှာ ကျတော့ ရင်ဝမှာ ကျည်စထိမှန်ပြီး စိုးရိမ်ရတဲ့အခြေအနေရှိပါတယ်။ နောက်ထပ် အသက် ၃၀ အရွယ်အမျိုးသမီးတယောက်လည်း ကျည်စထိမှန်ပြီး လက်ချောင်းတွေ ဖြတ်လိုက်ရပါတယ်” လို့ ပြောပါတယ်။

စစ်ကောင်စီက ပစ်ခတ်တဲ့လက်နက်ကြီးကြောင့် အမှတ် ၃ ရပ်ကွက်က အရပ်သားတချို့ မစိုးရိမ်ရတဲ့ ထိခိုက်ဒဏ်ရာတွေရခဲ့ပြီး ၈ တန်းကျောင်းသားနဲ့ အသက် ၃၀ အရွယ် အမျိုးသမီးတို့ကတော့ မြိတ်မြို့က ဆေးရုံမှာ ဆေးဝါးကုသမှုခံနေရတယ်လို့ သိရပါတယ်။

ပလမြို့ခံတယောက်က “PDF တွေဝင်လာတာက ကျောင်းမလွှတ်ခင်အချိန်မှာ ဝင်လာတယ်။ နှစ်ဖက်ပစ်ခတ်မှုတော့ မဖြစ်ဘူး။ ပလမြို့ရဲစခန်းကနေ လက်နက်ကြီးနဲ့ ပစ်တာတော့ရှိတယ်” လို့ ပြောပါတယ်။

လက်နက်ကြီးကျည်တွေဟာ ပလမြို့ရဲ့ အမှတ် ၃ ရပ်ကွက်မှာရှိတဲ့ ဆားဖိုဆိပ်ကမ်းနဲ့ ရွှေမော်သိမ်စေတီဘက်ကို ကျရောက်ပေါက်ကွဲခဲ့ပြီး ဒေသခံပြည်သူ့ကာကွယ်ရေး တပ်ဖွဲ့တွေနဲ့ စစ်ကောင်စီတပ်သားတို့ နှစ်ဖက်တိုက်ပွဲဖြစ်မှာ စိုးရိမ်ပြီး ပလမြို့က စာသင်ကျောင်းတွေ ချက်ချင်းပိတ်လိုက်ရတယ်လို့လည်း ဒေသခံတွေက ပြောပါတယ်။