မွန်ပြည်နယ် ရေးမြို့နယ် သံကဒိုက်ကျေးရွာအနီးကို အင်အား ၁၅၀ ဝန်းကျင်နဲ့ စစ်ကြောင်းထိုးလာတဲ့ စစ်ကောင်စီတပ်ဖွဲ့နဲ့ ကျားဖြူစစ်ကြောင်း တပ်ခွဲ (၁) တပ်ခွဲ (၆) တို့ သြဂုတ် ၂၈ ရက် ညနေ ၄ နာရီခွဲလောက်က တိုက်ပွဲဖြစ်ပွားခဲ့တယ်လို့ ကျားဖြူစစ်ကြောင်းတပ်ခွဲ ၁ ဗိုလ်ကျော်ဟိန်းက ပြောပါတယ်။
ထိတွေ့တိုက်ပွဲအတွင်း စစ်ကောင်စီဘက်မှ ၆ ဦးသေဆုံး၊ ၈ ဦးပြင်းထန်ဒဏ်ရာရခဲ့ပြီး ကျားဖြူစစ်ကြောင်း တပ်ခွဲ ၆ မှ ရဲဘော် ၁ ဦး ဒဏ်ရာရရှိခဲ့တယ်လို့ ဆိုပါတယ်
ဒါ့အပြင် မွန်ပြည်နယ်၊ ရေးမြို့နယ်အခြေစိုက် အမှတ် ၁၉ စစ်ဆင်ရေးကွပ်ကဲမှုဌာနချုပ် စကခ - ၁၉ နဲ့ ခလရ - ၆၁ တို့ကို ဒေသကာကွယ်ရေးတပ်ဖွဲ့ပူးပေါင်းအဖွဲ့က တိုက်ခိုက်ခဲ့တယ်လို့ ဗိုလ်ကျော်ဟိန်းက ပြောပါတယ်။
စစ်ကောင်စီတပ်ကို မွန်ပြည် တော်လှန်ရေးတပ် (MSRF)၊ ရေးလေတပ် (YAF)၊ ရေးကာကွယ်ရေးတပ် (YDF)၊ ထားဝယ်ခရိုင်အမှတ် ၂ တပ်ရင်း (T-5)၊ ဒေါနစစ်ကြောင်း၊ ကံပေါက်ပြည်သူ့ကာကွယ်ရေးတပ်ဖွဲ့ (KBDF)၊ မွန်ပြည်နယ်အခြေပြုတော်လှန်ရေးအဖွဲ့အစည်း (MSRO)၊ ရေးကာကွယ်ရေးတပ် (YDF) နဲ့ မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ်တပ်ဦး (ABSDF) တပ်ရင်း- ၁၊ ထားဝယ်ပြည်သူ့လွတ်မြောက်ရေးတပ်ဖွဲ့ (TPLF) တို့မှ ပူးပေါင်းကာ ဩဂုတ် ၂၈ ရက် မနက် ၁၁ နာရီလောက်က SF-Z ဒရုန်းနဲ့ ဗုံးကြဲတိုက်ခိုက်ခဲ့တယ်လို့ တော်လှန်ရေးပူးပေါင်းတာဝန်ရှိသူက ပြောပါတယ်။
အခုစစ်ဆင်ရေးကို ၇၆ ကြိမ်မြောက် မွန်တော်လှန်ရေးနေ့ကို ကြိုဆိုဂုဏ်ပြုတဲ့အနေနဲ့ မွန်ပြည်နယ်နဲ့ တနင်္သာရီတိုင်း အခြေစိုက် တော်လှန်ရေး မဟာမိတ်အင်အားစုများ ပူးပေါင်းဆောင်ရွက်ခဲ့တာဖြစ်ပြီး SF - Z ဒရုန်းတစီး ပျက်စီးဆုံးရှုံးခဲ့ရတယ်လို့ ဆိုပါတယ်။
ဗုံးကြဲတိုက်ခိုက်မှုပြီးနောက် စစ်ကောင်စီတပ်က ၈၁ မမ၊ ၁၂၀ မမ လက်နက်ကြီးတွေနဲ့ ၈ ကြိမ်ထက်မနည်း ပြန်လည်ပစ်ခတ်ခဲ့တယ်လို့ ဆိုပါတယ်။
မွန်ပြည်နယ် ပေါင်မြို့နယ် စစ်ကောင်စီ ပိန္နတော တပ်စခန်းနဲ့ ဝန်ထမ်းအိမ်ရာအား တပင်ရွှေထီး၊ တပ်ခွဲ (၁) တပ်ရင်း Drone အဖွဲ့တို့ ပူးပေါင်းပြီး တိုက်ခိုက်ခဲ့တယ်လို့ သိရပါတယ်။
ပိန်န္နဲတော စစ်ကောင်စီတပ်စခန်းအား သြဂုတ် ၂၈ ရက် မနက် ၈ နာရီခွဲကျော်လောက်မှာ ဒရုန်း ၂ စင်းအသုံးပြုပြီး ဗုံးသီး ၉ လုံးနဲ့ တိုက်ခိုက်ခဲ့တယ်လို့ သထုံခရိုင် PDF တာဝန်ခံကိုအေးမင်းထွန်းက ပြောပါတယ်။
ဒရုန်းနဲ့ ပထမအကြိမ်မှာ ဗုံး ၅ လုံး၊ ထပ်မံပြီး မိနစ်အနည်းငယ်ကြာမှာ ၄ လုံး စုစုပေါင်း ၉ လုံးနဲ့ တိုက်ခိုက်ခဲ့ပြီး ထိခိုက်ကျဆုံးမှုအခြေအနေကို မသိရသေးဘူးလို့ ဆိုပါတယ်။
ဩဂုတ် ၂၇ ရက် ညနေ ၅ နာရီလောက်ကလည်း သထုံခရိုင်၊ တပ်မဟာ ၁၊ တပ်ရင်း ၂၊ KNLA/PDF အဖွဲ့၊ ပ.က.ဖ အဖွဲ့၊ S.O.F ပူးပေါင်းအဖွဲ့တွေက ပေါင်မြို့နယ်၊ မြို့နယ်အုပ်ချုပ်ရေးရုံး ဝန်ထမ်းအိမ်ရာမှာ တပ်စွဲထားတဲ့ စစ်ကောင်စီ တပ်ဖွဲ့ဝင်တွေကို ဒရုန်းအသုံးပြုပြီး ဗုံးသီး ၇ လုံးနဲ့ ပစ်ခတ်တိုက်ခိုက်ခဲ့ရာ မြို့နယ်အုပ်ချုပ်ရေးကောင်စီ ဗိုလ်မှူးကျော်နိုင်ဦး အပါအဝင် ဗိုလ်ကြီး ၁ ဦး၊ တပ်ကြပ် ၂ ဦး၊ တပ်သား ၁ ဦး စုစုပေါင်း ၅ ဦး ဒဏ်ရာရရှိခဲ့ပြီး စစ်ကောင်စီဘက်က လက်နက်ငယ်တွေ၊ ၄၀ မမ တွေနဲ့ ပြန်လည်ပစ်ခတ်ခဲ့ကြတယ်လို့ ကိုအေးမင်းထွန်းက ပြောပါတယ်။
သြဂုတ် ၂၇ ရက် မနက် ၈ နာရီခွဲလောက်ကလည်း ဒရုန်းနဲ့ ဗုံးကြဲတိုက်ခိုက်ခဲ့ရာ ဒေါက်ရပ် ဘုရားကုန်းမှ စစ်ကောင်စီတပ်က ၁ ဦးသေ၊ ၂ ဦးဒဏ်ရာရရှိခဲ့သလို ထပ်မံပြီး မနက် ၉ နာရီကျော်ကလည်း ဒရုန်းနဲ့ ဗုံးကြဲခဲ့ရာ စစ်ကောင်စီတပ်က ၃ ဦး ဒဏ်ရာရသွားခဲ့တယ်လို့ ဆိုပါတယ်။
သြဂုတ် ၂၇ ရက် မွန်းတည် ၁၂ နာရီခွဲလောက်ကလည်း ကျိုက်ထိုဘက်မှ ဝေါဘက်ကို မောင်းနှင်လာတဲ့ စစ်ကောင်စီးယာဉ်တန်း ၆ စီးကို ဒေါင်းတောင်အနီးမှာ KNU/PDF/LPDF ပူးပေါင်းအဖွဲ့က တိုက်ခိုက်ခဲ့ရာ စစ်ကောင်စီဘက်က ၁၁ ဦးလောက် ဒဏ်ရာရခဲ့တယ်လို့ ဒေသကာကွယ်ရေးတပ်ဖွဲ့တော်လှန်ရေးပူးပေါင်းအဖွဲ့ကနေ သိရပါတယ်။
စစ်ကောင်စီဘက်က လမ်းတလျှောက် ရမ်းသန်းပစ်ခတ်မှုကြောင့် အရပ်သားပြည်သူ အမျိုးသား ၂ ဦး ဒဏ်ရာ (မစိုးရိမ်ရ) ရရှိခဲ့တယ်လို့ ဆိုပါတယ်။
