ဂျပန်နိုင်ငံ၊ ချီဘာဂိုမြို့မှာ ကျင်းပတဲ့ ၁၁ ကြိမ်မြောက် “U12 Junior Soccer World 2023” ပြိုင်ပွဲ အုပ်စုပထမပွဲစဥ်မှာ မြန်မာယူ-၁၂ အသင်းဟာ ဘာစီလိုနာ ယူ-၁၂ အသင်းကို ၄ ဂိုး ဂိုးမရှိနဲ့ ရှုံးနိမ့်ခဲ့ပါတယ်။

အုပ်စုဒုတိယပွဲစဥ်ဖြစ်တဲ့ ဂျပန်ကလပ် ဂျေအီးအက်ဖ်ယူနိုက်တက်နဲ့ ပွဲစဥ်မှာလည်း မြန်မာယူ-၁၂ အသင်းက ၃ ဂိုး ၁ ဂိုးနဲ့ ထပ်မံရှုံးနိမ့်ခဲ့ပြီး မြန်မာအသင်းအတွက် တလုံးတည်းသောဂိုးကို ကျောနံပါတ် ၈ ဇင်မင်းမြတ်သူက သွင်းယူခဲ့ပါတယ်။

အုပ်စုအတွင်း တခြားပွဲစဥ်တွေဖြစ်တဲ့ ဘာစီလိုနာနဲ့ Daiwa House Dreams ပွဲစဥ်မှာ ဘာစီလိုနာအသင်းက ၃ ဂိုး ၁ ဂိုးနဲ့ အနိုင်ရရှိခဲ့သလို ဂျေအီးအက်ဖ်နဲ့ Daiwa House Dreams တို့ပွဲစဥ်မှာလည်း Daiwa House Dreams က ၁ ဂိုး ဂိုးမရှိနဲ့ အနိုင်ရရှိခဲ့ပါတယ်။

အုပ်စု ဂ မှာ ဘာစီလိုနာအသင်းက ရမှတ် ၆ မှတ်နဲ့ အုပ်စုပထမ၊ ဂျေအီးအက်ဖ်ယူနိုက်တက်က ၃ မှတ် ဂိုးကွာခြားချက်အသာနဲ့ အုပ်စုဒုတိယ၊ Daiwa House Dream က ရမှတ် ၃ မှတ်နဲ့ အုပ်စုတတိယ၊ မြန်မာအသင်းက ရမှတ်မရှိနဲ့ အုပ်စုအောက်ဆုံးမှာ ရပ်တည်နေပါတယ်။

မြန်မာယူ-၁၂ အသင်းဟာ အုပ်စုနောက်ဆုံးပွဲစဥ်အဖြစ် သြဂုတ် ၂၅ မနက် ၇ နာရီ ၄၅ မိနစ်မှာ Daiwa House Dream နဲ့ ယှဥ်ပြိုင်သွားမှာဖြစ်ပြီး အဲ့ဒီရလဒ်ပေါ်မူတည်ပြီး မနက် ၁၀ နာရီခန့်မှာ တခြားအုပ်စုက အသင်း ၁ သင်းနဲ့ ယှဥ်ပြိုင်သွားရမှာဖြစ်ပါတယ်။

“U12 Junior Soccer World Challenge” ပြိုင်ပွဲကို ၂၀၁၃ ခုနှစ်က စတင်ယှဥ်ပြိုင်ခဲ့ပြီး ဘာစီလိုနာအသင်းက ၅ ကြိမ်နဲ့ အများဆုံး ဗိုလ်စွဲထားပါတယ်။