မြန်မာနိုင်ငံမှာ စစ်တပ်အာဏာသိမ်းမှုပေါ် မြန်မာသံရုံးရှေ့ သွားရောက် ဆန္ဒပြ ကန့်ကွက်ရှုတ်ချခဲ့ကြတဲ့ ထိုင်းကျောင်းသား လူငယ် ၇ ယောက်ကို ထိုင်းတရားရုံးက ထောင်ဒဏ်နဲ့ ငွေဒဏ်တွေ အသီးသီး ချမှတ်လိုက်ပါတယ်။
လွန်ခဲ့တဲ့ ၂ နှစ် ၂၀၂၁ ခုနှစ် ဖေဖော်ဝါရီ ၁ ရက် မြန်မာနိုင်ငံမှာ စစ်အာဏာသိမ်းပြီးတဲ့နောက် ထိုင်းရောက် မြန်မာနိုင်ငံသားတွေနဲ့ ဒီမိုကရေစီရေးလှုပ်ရှားတဲ့ ထိုင်းနိုင်ငံသားတွေဟာ ဘန်ကောက် မြန်မာသံရုံးရှေ့မှာ စစ်အာဏာရှင်ဆန့်ကျင်ရေး ဆန္ဒပြခဲ့ကြတာပါ။
အဲဒီထဲမှာ ထိုင်းတက္ကသိုလ်ကျောင်းသား အပါအဝင် ထိုင်းလူငယ် ၇ ဦးဟာ ထိုင်းနိုင်ငံက ချမှတ်ထားတဲ့ ကိုဗစ်-၁၉ ကာလ အရေးပေါ်ဥပဒေ ချိုးဖောက်မှု၊ တာဝန်ရှိသူတွေကို အာဏာဖီဆန်မှုတွေနဲ့ ဖမ်းဆီး အရေးယူခံခဲ့ရပါတယ်။
သူတို့ဟာ ထိုင်းလွှတ်တော်အမတ်နဲ့ တက္ကသိုလ်က ဆရာတွေရဲ့ အာမခံနဲ့ ပြန်လွတ်လာပြီး ပြင်ပကနေ အမှုရင်ဆိုင်နေရာမှာ ဩဂုတ် ၂၁ ရက် မနေ့ကတော့ တရားရုံးကနေ အမှုကို အပြီးသတ် စီရင်ဆုံးဖြတ်ခဲ့ပါတယ်။
အဲဒီထဲက ထမဆတ်တက္ကသိုလ်ကျောင်းသား ပနဖတ်ကျန်ထနန်ကွန်းဟာ ထောင်ဒဏ် ၁၂ လ အပြစ်ပေးခံထားရတဲ့အထဲ ၃ ပုံ ၁ ပုံလျှော့ပြီး ၄ လနဲ့ ၂၀ ရက် ထောင်ဒဏ်ချမှတ်ခံရပါတယ်။
ကစ်သီဆဒ်ဖန်းရေးနူးက ထောင်ဒဏ် ၃ နှစ် ၁ လ အပြစ်ပေးခံထားရပြီး ၁ နှစ် ၆ လ ၁၅ ရက် လျှော့ပေါ့ကာ ဒဏ်ငွေ ဘတ် ၂၀,၀၀၀ နဲ့အတူ ချမှတ်ခံရပါတယ်။
ကျန်တဲ့ ဟတ်ဒင်း၊ ဖတ်ချရဝပ်၊ ဘိုင်ဘွန်း၊ နာ့သ်ဖုန်းနဲ့ ချန်းချိုင်းတို့ ၅ ဦးမှာ ထောင်ဒဏ် ၄ နှစ် ငွေဒဏ် ဘတ် ၆၀,၀၀၀ စီ ကျခံထားရာက ထောင်ဒဏ် ၂ နှစ် ၁၅ ရက် လျှော့ပေါ့ပြီး ဒဏ်ငွေ ဘတ် ၃၀,၀၀၀ စီပေးဆောင်ဖို့ ချမှတ်လိုက်ပါတယ်။ အဆိုပါ ၇ ဦးထဲမှာ ပနဖတ် ကျန်ထနန်ကွန်းကလွဲလို့ ကျန်သူတွေ ဆိုင်းငံ့ပြစ်ဒဏ် ကျခံရပါတယ်။
မနေ့ညနေ ၄ နာရီလောက်မှာတော့ ပနဖတ်ကျန်ထနကွန်းဟာ ဘတ်ငွေ ၁၅၀,၀၀၀ အာမခံနဲ့ ပြန်လွတ်လာပြီလို့ ဆန္ဒပြသူများအဖွဲ့ United Front of Thammasat and Demonstration လူမှုကွန်ရက်မှာ ဖော်ပြပါတယ်။
Ref - Top News
