အာဆီယံ ယူ-၂၃ အမျိုးသားဘောလုံးပြိုင်ပွဲ အုပ်စုနောက်ဆုံးပွဲစဥ်ကို ထိုင်းနိုင်ငံ ဘန်ကောက်မြို့မှာ သြဂုတ် ၂၁ ရက်က ယှဥ်ပြိုင်ကစားခဲ့ရာ မြန်မာယူ-၂၃ အသင်းက ဘရူနိုင်းယူ-၂၃ အသင်းကို ၄ ဂိုး ၁ ဂိုးနဲ့ ဂိုးပြတ်အနိုင်ရရှိခဲ့ပါတယ်။
မြန်မာအသင်းအတွက်ဂိုးတွေကို နောင်နောင်စိုး၊ စွမ်းထက်၊ မိုးဆွေ၊ ချစ်အေးတို့က သွင်းယူခဲ့ပြီး ဘရူနိုင်းအသင်းအတွက် ချေပဂိုးကိုတော့ ဟာဆင်မ်က သွင်းယူခဲ့ပါတယ်။
ဘရူနိုင်းအသင်းဟာ ပွဲစဥ် ၂ ပွဲ ကစားပြီးချိန်မှာ ဂိုးပေါက်ကန်သွန်းမှု တကြိမ်မှ မရှိခဲ့သလို သွင်းဂိုးလည်း မရရှိခဲ့ပေမဲ့ မြန်မာအသင်းနဲ့ပွဲစဥ်မှာ ဂိုးပေါက်ကန်သွင်းမှု ၁၁ ကြိမ်နဲ့ သွင်းဂိုး ၁ ဂိုး ရရှိခဲ့ပါတယ်။
အုပ်စုအတွင်း တခြားပွဲစဥ်ဖြစ်တဲ့ ထိုင်းယူ-၂၃ အသင်းနဲ့ ကမ္ဘောဒီးယား ယူ-၂၃ အသင်းတို့ ပွဲစဥ်မှာ ထိုင်းယူ-၂၃ အသင်းက ၂ ဂိုး ဂိုးမရှိနဲ့ အနိုင်ရရှိခဲ့ပါတယ်။
အုပ်စု က မှာ ထိုင်းအသင်းက ရမှတ် ၉ မှတ်နဲ့ အုပ်စုပထမ၊ ကမ္ဘောဒီးယားအသင်းက ရမှတ် ၄ မှတ် ဂိုးကွာခြားချက်အသာနဲ့ အုပ်စုဒုတိယ၊ မြန်မာအသင်းက ရမှတ် ၄ မှတ်နဲ့ အုပ်စုတတိယ၊ ဘရူနိုင်းအသင်းက ရမှတ်မရှိနဲ့ အုပ်စုနောက်ဆုံးနေရာမှာ ရပ်တည်ခဲ့ပါတယ်။
မြန်မာအသင်းပါဝင်တဲ့ အုပ်စု က မှာ ထိုင်းတသင်းသာ ဆီမီးဖိုင်နယ်အဆင့်ကို တက်ရောက်နိုင်ခဲ့တာဖြစ်ပြီး ကျန်သုံးသင်းက အုပ်စုအဆင့်ကနေ ထွက်ခွာခဲ့ရပါတယ်။
မြန်မာယူ-၂၃ အသင်းဟာ စက်တင်ဘာ ၆ ရက်မှ ၁၂ ရက်အထိ ယှဥ်ပြိုင်ကစားမယ့် အာရှဖလား ခြေစစ်ပွဲစဥ်မှာ တောင်ကိုရီးယား၊ ကာတာ၊ ကာဂျစ်စတန်တို့ အုပ်စု ခ မှာ ကျရောက်နေပါတယ်။
