စစ်ကိုင်းတိုင်း၊ ကသာမြို့က မြို့နယ်ရဲမှူးအိမ်နဲ့ အမှတ် ၂ ရဲစခန်းကို ပြည်သူ့ကာကွယ်ရေးအဖွဲ့က ဒီနေ့ ဩဂုတ် ၁၉ ရက်မှာ ဒရုန်းနဲ့ တိုက်ခိုက်ခဲ့ပါတယ်။
ကသာမြို့နယ်ပကဖအဖွဲ့ တာဝန်ရှိသူက “ဗုံးသီးက ၂ လုံးချ တိုက်တိုက်ခိုက်ခဲ့တာဗျ။ တလုံးက မြို့နယ်ရဲမင်းကြီး သီးသန့်နေတဲ့အိမ်မှာ ကျတယ်။ နောက်တလုံးက အမှတ် ၂ ရဲစခန်းမှာ ကျတယ်ဗျ။ အထိခိုက်ကတော့ဘာမှမသိရသေးဘူး။ ဒရုန်းနဲ့ချတိုက်ခိုက်တာကြောင့် ကျနော်တို့ ကာကွယ်ရေးအဖွဲ့က ထိခိုက်မှုမရှိခဲ့ဘူး” လို့ ပြောပါတယ်။
ဒီမနက် ၅ နာရီအချိန်က တိုက်ခိုက်ခဲ့တာဖြစ်ပြီး အဲဒီနောက်မှာတော့ စစ်ကောင်စီဘက်က ကသာမြို့နယ်၊ ဘောလုံးကွင်းအတွင်းကနေ မိုးတာလေး တိုက်နယ်ဘက်မှာရှိတဲ့ ကျေးရွာတွေဆီကို လက်နတ်ကြီးနဲ့ပစ်ခတ်နေတယ်လို့ ဒေသခံကာကွယ်ရေး ခေါင်းဆောင်တွေက ပြောပါတယ်။
အခုလို ကာကွယ်ရေးအဖွဲ့ဘက်က တိုက်ခိုက်လို့ စစ်ကောင်စီဘက်က လမ်းသွားလမ်းလာ ပြည်သူတွေကို စစ်ဆေးတာတွေလုပ်နေပြီး ကသာမြို့ပေါ်မီတာ ၄၀၀ လို့ လူသိများတဲ့ ဘောလုံးကွင်းကနေ မနက်ခင်း ၆ နာရီအချိန်ကစပြီး မြို့ပြင်ဘက်ဆီကို လက်နက်ကြီးနဲ့ ပစ်ခတ်နေတယ်လို့လည်း ကသာ ဒေသခံတွေရဲ့ ပြောပြချက်အရ သိရပါတယ်။
