မကွေးတိုင်း၊ မြိုင်မြို့နယ်မှာ သြဂုတ် ၁၇ ရက်က စစ်ကောင်စီရဲ့ Well2 ရေနံမြေစခန်း တိုက်ခိုက်ခံရပြီး ထိခိုက်သေဆုံးသူ ရှိနိုင်တယ်လို့ မြိုင်မြို့နယ် ပကဖကနေ သိရပါတယ်။

မြိုင်မြို့နယ် Well2 ရေနံမြေစခန်းမှာ အခိုင်အမာ တပ်စွဲထားတဲ့ စစ်ကောင်စီတပ်သားတွေနဲ့ ရဲတွေကို သြဂုတ် ၁၇ ရက် ည ၁၀ နာရီလောက်ကနေ ၁၈ ရက်နေ့ မနက် ၄ နာရီလောက်အထိ လက်နက်ကြီးတွေနဲ့ ညလုံးပေါက် တိုက်ခိုက်ခဲ့တယ်လို့ မြိုင်မြို့နယ်ပကဖရဲ့ ပြန်ကြားရေးတာဝန်ခံ ကိုသုတက ဒီဗွီဘီကို ပြောပါတယ်။

“အဲဒီစခန်းမှာက စစ်ကောင်စီတပ်သားနဲ့ ရဲအင်အား ၆၀ လောက် အခိုင်အမာ တပ်စွဲထားတာဗျ။ ကျနော်တို့ဘက်က ရှော့တိုက်ဒုန်း ၂၅ လုံး၊ ဒုန်းအီနာဂါဗုံးသီး ၄၀၀ ဂရမ် အလုံး ၆၀၊ ၅ ကီလိုဂရမ် ၁ လုံးနဲ့ တိုက်ခိုက်ခဲ့လို့ စစ်ကောင်စီဘက်က သေဆုံးဒဏ်ရာရရှိသူ များပြားနိုင်တယ်။”

ဒါအပြင် အဲဒီ Well2 ရေနံမြေစခန်းရဲ့ အသက်သွေးကြောဖြစ်တဲ့ ကပစ ဓာတ်အားလိုင်းကိုလည်း ဖြတ်တောက်နိုင်ခဲ့တယ်လို့ ပြောပါတယ်။

အဲဒီတိုက်ခိုက်မှုကို မြိုင်ပကဖ တပ်ရင်း-၃၊ တပ်ခွဲ-၅၊ တပ်ခွဲ-၈ နဲ့ ကျေးရွာလုံခြုံရေးတပ်ဖွဲ့တွေ ပူးပေါင်းတိုက်ခိုက်ခဲ့တာဖြစ်ပြီး ရဲဘော်တွေ ထိခိုက်မှုမရှိခဲ့ဘူးလို့ ဆိုပါတယ်။

မကွေးတိုင်း၊ ရေစကြိုမြို့နယ်မှာလည်း သြဂုတ် ၁၇ ရက်က စစ်ကောင်စီတပ်သားတွေ တိုက်ခိုက်ခံရပြီး ၇ ယောက်ထက်မနည်း သေဆုံးကာ အများအပြား ဒဏ်ရာရရှိခဲ့တယ်လို့ ရေစကြိုမြို့နယ် ပကဖ ကနေ သိရပါတယ်။

ရေစကြိုမြို့နယ် စိုင်သေကျေးရွာဘက်ကနေ မြေမလှကျေးရွာဘက်ကို စစ်ကြောင်း ၃ ​ကြောင်းခွဲပြီး တက်လာတဲ့ စစ်ကောင်စီတပ်သားတွေကို သြဂုတ် ၁၇ ရက် မနက် ၁၀ နာရီလောက်မှာ ပြည်သူ့ကာကွယ်ရေး ပူးပေါင်းတပ်ဖွဲ့တွေက အသင့်စောင့်​ဆိုင်းပြီး တိုက်ခိုက်ခဲ့တာလို့ ရေစကြိုမြို့နယ် ပကဖခေါင်းဆောင် ရဲဘော်ဝေကြီးက ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ၇ ယောက် သေဆုံးကာ အများအပြား ဒဏ်ရာရရှိခဲ့ပြီး သူတို့ဘက်ကလည်း လက်နက်ကြီး လက်နက်ငယ်တွေနဲ့ ပြန်လည်ပစ်ခတ်ခဲ့ကြတယ်လို့ ဆိုပါတယ်။

အဲဒီနောက် ခလရ ၂၅၇ ကနေ ဖောကားတစီးနဲ့ စစ်ကူလိုက်လာပြီး သေဆုံးဒဏ်ရာရသူတွေကို လူချိန်းကာ ဆက်တက်လာတဲ့ စစ်ကောင်စီတပ်သားတွေကို ညနေ ၄ နာရီလောက်မှာ အသင့်စောင့်ပြီး ထပ်မံတိုက်ခိုက်ခဲ့တယ်လို့ ပြောပါတယ်။

“အဲဒီတိုက်ခိုက်မှုအတွင်းမှာ ရှေ့ဆုံးကတက်လာတဲ့ စစ်(...) ၃ ယောက် လဲကျသွားပြီး သေ၊ မသေ ဆိုတာကိုတော့ မသိရသေးဘဲ အများအပြား ဒဏ်ရာရရှိခဲ့တယ်။ အဲဒီတိုက်ခိုက်မှုကို ရေစကြိုမြို့နယ်ပကဖ၊ ပခုက္ကူခရိုင် တပ်ရင်း-၉၊ နွေဦးစစ်သည် YSO - ရေလယ်ကျွန်းဒေသ စစ်ကြောင်းတို့ ပူးပေါင်းတိုက်ခိုက်ခဲ့တာဖြစ်ပြီး ကျနော်တို့ဘက်က ရဲဘော်တွေ ထိခိုက်မှုမရှိခဲ့ဘူး။”

ရေစကြိုမြို့နယ်မှာ သြဂုတ် ၁၄ ရက် မနက်ပိုင်းကလည်း စစ်ကောင်စီတပ်သားတွေ တိုက်ခိုက်ခံရပြီး ၃ ယောက်သေဆုံးကာ ဒဏ်ရာရသူတချို့ ရှိတယ်လို့ ရေစကြိုမြို့နယ် ပကဖကနေ သိရပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။