ရန်ကုန်၊ ပုဇွန်တောင်မြို့နယ်၊ ၆ ရပ်ကွက်၊ ရေကျော်လမ်းမ၊ အမှတ် ၆၀ မှာရှိတဲ့ အထည်ဆိုင်တဆိုင် ဩဂုတ် ၈ ရက် မနေ့ နေ့လယ်ပိုင်းက ဓားပြတိုက်ခံခဲ့ရပြီး ဖုန်းနဲ့ ငွေသားတွေ လုယက်ခံခဲ့ရတယ်လို့ မြို့ခံတွေက ပြောပါတယ်။
မနေ့ နေ့လယ် ၁ နာရီခွဲခန့်မှာ KM Export Fashion ဆိုင်ကို ဦးထုပ်ဆောင်း၊ အင်္ကျီနက်ပြာ လက်တို၊ ဂျင်းဘောင်းဘီ ဝတ်ဆင်ထားတဲ့ အသက် ၃၀ ကျော် အမျိုးသားတယောက် ဝင်လာပြီး အင်္ကျီဝယ်မလို့ဆိုကာ ဝန်ထမ်းတွေကို လိုက်ပြခိုင်းပြီး ဓားပြမှု ကျူးလွန်ခဲ့တာ ဖြစ်ပါတယ်။
အဆိုပါဆိုင်မှာ ရှိနေတဲ့ အသက် ၂၀ အရွယ် အမျိုးသမီးဝန်ထမ်း ၃ ဦးကို ဓားပြတိုက်သူက ဘေးလွယ်အိတ်ထဲကနေ ဓားမြှောင်ကို ထုတ်ပြပြီး အဝတ်လဲခန်းထဲမှာ လက်နဲ့ ခြေထောက်တွေကို ကြိုးတုပ်ထားခဲ့တာ ဖြစ်ပါတယ်။
KM Export Fashion ဆိုင်ပိုင်ရှင်က “မနေ့က ဆိုင်ဝန်ထမ်း ၃ ယောက်ရှိတဲ့ အချိန်မှာ အမျိုးသား ၁ ဦးက အင်္ကျီဝယ်သလိုနဲ့ အထည်တွေ ပြခိုင်းပြီး ဓားထုတ်ပြီး ကလေးတွေကို မလှုပ်နဲ့၊ လှုပ်ရင် ထိုးလိုက်မယ်ဆိုပြီး ပါလာတဲ့ ကြိုးတွေနဲ့ ကလေးတွေကို ခြေတွေလက်တွေ တုပ်ပြီး ဖုန်း ၂ လုံးနဲ့ ငွေသားတွေ ယူသွားတာပါ။ မီးပြတ်နေတဲ့အချိန်နဲ့ နေ့ခင်း လူရှင်းနေတဲ့ အချိန် ဖြစ်သွားတာ” လို့ ဆိုပါတယ်။
ဓားပြက ငွေရှင်းကောင်တာမှာရှိတဲ့ Redmi note 8 ဖုန်း ၂ လုံးနဲ့ ငွေသား ၃၀,၀၀၀ ကျပ်ခန့်ကို ယူဆောင်ထွက်သွားတာကို CCTV မှတ်တမ်းတွေအရ သိရပြီး ဆိုင်ဝန်ထမ်းတွေ ထိခိုက်ဒဏ်ရာ မရရှိဘူးလို့ သိရပါတယ်။
ဓားပြတိုက်ခံရမှုနဲ့ပတ်သက်လို့ ပုဇွန်တောင်ရဲစခန်းမှာ အမှုဖွင့်လှစ် တိုင်ကြားတယ်လို့ သိရပြီး ရန်ကုန်မှာ ပြီးခဲ့တဲ့ ဩဂုတ် ၄ ရက်က မြောက်ဥက္ကလာပမြို့နယ်ရှိ အွန်လိုင်းရှော့ပင်းလုပ်ငန်း ဓားပြတိုက်ခံရမှုနဲ့ ဩဂုတ် ၃ ရက်က ရန်ကင်းမြို့နယ်မှာ The Skin Studio ဓားပြတိုက်ခံရမှုတို့က ကျူးလွန်သူတွေကို ဖမ်းဆီးရမိခြင်း မရှိသေးပါဘူး။
