မကွေးတိုင်း ရေစကြိုမြို့နယ်မှာ သြဂုတ် ၈ ရက် နေ့လယ်က ပကဖ ယူနီဖောင်းဝတ်ဆင်ပြီး ပကဖ အယောင်ဆောင်ထားတဲ့ စစ်ကောင်စီတပ်သားတွေ တိုက်ခိုက်ခံရပြီး ၂ ယောက်သေဆုံးခဲ့တယ်လို့ ရေစကြိုမြို့နယ် ပကဖကနေ သိရပါတယ်။

ရေစကြိုမြို့နယ် အောင်မိုးလမ်းခွဲမှာ သြဂုတ် ၈ ရက် မွန်းတည့် ၁၂ နာရီလောက်က ကင်းပုန်းလာဝပ်တဲ့ ခလရ ၂၅၆ က စစ်ကောင်စီတပ်သား ၇ ယောက်ကို ကြိုတင်စောင့်ဆိုင်းပြီး လက်ဦးမှုရယူကာ ပစ်ခတ်တိုက်ခိုက်ခဲ့တယ်လို့ ရေစကြိုမြို့နယ် ပကဖ ခေါင်းဆောင်ရဲဘော်ဝေကြီးက ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်းမှာ ရှေ့ဆုံးကနေ ရေစကြိုမြို့နယ် ပကဖ ယူနီဖောင်းဝတ်ဆင်ပြီး အသွင်ယူထားတဲ့ စစ်ကောင်စီတပ်သား ၂ ယောက် နေရာမှာတင် သေဆုံးခဲ့တယ်လို့ ဆိုပါတယ်။

နှစ်ဖက် အပြန်အလှန် ထိတွေ့တိုက်ပွဲ ၁၅ မိနစ်လောက်ဖြစ်ပွားခဲ့ပြီး ပြည်သူ့ကာကွယ်ရေး ရဲဘော်တွေ ထိခိုက်ကျဆုံးမှု မရှိဘဲ ဆုတ်ခွာနိုင်ခဲ့ကြတယ်လို့ ပြောပါတယ်။

ရေစကြိုမြို့နယ်မှာ သြဂုတ် ၄ ရက် မနက်ပိုင်းကလည်း ပကဖ အယောင်ဆောင်ထားတဲ့ စစ်ကောင်စီတပ်သားတွေနဲ့ ပကဖအဖွဲ့တို့ တိုက်ပွဲဖြစ်ပွားကာ စစ်ကောင်စီဘက်က ထိခိုက်သေဆုံးသူရှိနိုင်ပြီး ပကဖ ရဲဘော် ၂ ယောက်ကျဆုံး၊  ၁ ယောက်ဒဏ်ရာရရှိခဲ့တယ်လို့ ရေစကြိုမြို့နယ် ပကဖကနေ သိရပါတယ်။

အဲဒီ တိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

သြဂုတ် ၆ ရက်နဲ့ ၇ ရက်နေ့တွေကလည်း မကွေးတိုင်း၊ မြိုင်နဲ့ ပခုက္ကူမြို့နယ်တို့မှာ စစ်ကောင်စီတပ်သားတွေနဲ့ ပျူစောထီးတွေ တိုက်ခိုက်ခံရပြီး ၁၀ ယောက်ထက်မနည်း သေဆုံးကာ အများအပြား ဒဏ်ရာရရှိခဲ့တယ်လို့ မြိုင်မြို့နယ် ပကဖ ကနေ သိရပါတယ်။

မြိုင်မြို့နယ် ကန်နီ (ပျူစောထီးရွာ) ကို သြဂုတ် ၆ ရက် ည ၉ နာရီကနေ သြဂုတ် ၇ ရက် မနက် ၁ နာရီအထိ ပြည်သူ့ကာကွယ်ရေး ပူးပေါင်းတပ်ဖွဲ့တွေက တာဝေးပစ် လက်နက်ကြီးတွေနဲ့ အချက်ရေ ၁၄၀ ပစ်ခတ်ခဲ့လို့ စစ်ကောင်စီဘက်က ထိခိုက်သေဆုံးသူ ရှိနိုင်တယ်လို့ မြိုင်ပကဖ တပ်ရင်း-၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။

အဲဒီ ကန်နီကျေးရွာကို သြဂုတ် ၇ ရက် မနက် ၅ နာရီလောက်မှာလည်း ပြည်သူ့ကာကွယ်ရေး ပူးပေါင်းတပ်ဖွဲ့တွေက အနီးကပ်တိုက်ခိုက်ခဲ့လို့ နာရီဝက်လောက် တိုက်ပွဲဖြစ်ပွားခဲ့တယ်လို့ ဆိုပါတယ်။

အဲဒီတိုက်ပွဲအတွင်းမှာ RPG တွေကိုပါ အသုံးပြုတိုက်ခိုက်ခဲ့ကာ လင့်စင်နားက ဘန်ကာတွေကို ဖျက်ဆီးနိုင်ခဲ့ပြီး စစ်ကောင်စီတပ်သားတယောက်နဲ့ ပျူစောထီး ၂ ယောက် သေဆုံးကာ ၄ ယောက် ဒဏ်ရာရရှိခဲ့တယ်လို့ ပြောပါတယ်။

ပခုက္ကူ-ကမ္မ-မင်းတပ် လမ်းပိုင်းမှာလည်း စစ်ကောင်စီယာဥ်တန်း ဖြတ်မှာဖြစ်လို့ မိုင်းရှင်းလင်းရေး လာစောင့်နေတဲ့ စစ်ကောင်စီတပ်သားတွေနဲ့ ပျူစောထီးတွေကို သြဂုတ် ၇ ရက် နေ့လယ် ၁၂ နာရီလောက်မှာ ပြည်သူ့ကာကွယ်ရေး ပူးပေါင်းတပ်ဖွဲ့တွေက မိုင်း ၄ ကြိမ်ဆွဲပြီး တိုက်ခိုက်ခဲ့တယ်လို့ ဆိုပါတယ်။

အဲဒီတိုက်ခိုက်မှုအတွင်းမှာ စစ်ကောင်စီတပ်သား ၃ ယောက်နဲ့ ပျူစောထီး ၅ ယောက် ပွဲချင်းပြီး သေဆုံးကာ စစ်ကောင်စီတပ်သား ၁ ယောက်နဲ့ ပျူစောထီး ၂ ယောက် အပြင်းအထန် ဒဏ်ရာရရှိလို့ လူမှုကူညီရေးကားနဲ့ ပခုက္ကူဆေးရုံကြီးကို သယ်သွားကြတယ်လို့ ပြောပါတယ်။

မြိုင်မြို့နယ်မှာ စစ်ကောင်စီလက်အောက်ခံ ပျူစောထီးတွေနေထိုင်တဲ့ သရက်ကွကျေးရွာက ပျူစောထီးတွေ သြဂုတ် ၂ ရက်ကနေ ၄ ရက်နေ့အထိ လက်နက်ကြီး လက်နက်ငယ်တွေနဲ့ တိုက်ခိုက်ခံရပြီး ထိခိုက်သေဆုံးသူ ရှိနိုင်တယ်လို့ မြိုင်မြို့နယ် ပကဖ ကနေ သိရပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။