ကရင်ပြည်နယ်၊ ဘားအံမြို့မှာ မိုးအဆက်မပြတ်ရွာသွန်းတာ၊ တောင်ကျချောင်းရေတွေနဲ့ သံလွင်မြစ်ရေဟာ စိုးရိမ်အမှတ်အထက် ကျော်လွန်ရောက်ရှိနေတဲ့အပြင် သံလွင်မြစ်ရေ တိုးလာတဲ့အတွက် မြေနိမ့်ပိုင်းရပ်ကွက်တွေမှာ ရေဝင်ရောက်ပြီး လူနေအိမ်တချို့ ရေနစ်မြုပ်တာတွေ ရှိတယ်လို့ ဘားအံမြို့ လူမှုကူညီရေးအသင်းဆီက သိရပါတယ်။
သြဂုတ် ၄ ရက် မနက် ၆ နာရီခွဲအချိန် တိုင်းတာချက်အရ သံလွင်မြစ်ရေဟာ စိုးရိမ်ရေအမှတ် ၇၅၀ စင်တီမီတာအထက် ၈၀၉ စင်တီမီတာကို ရောက်ရှိကာ စိုးရိမ်အမှတ်ရဲ့အထက် ၂၅ စင်တီမီတာကို ရောက်နေပြီး ဖြစ်ပါတယ်။
သံလွင်မြစ်ရေ တိုးလာတဲ့အတွက် ဘားအံမြို့ရဲ့ မြေအနိမ့်ပိုင်းရပ်ကွက်တွေဖြစ်တဲ့ အမှတ် ၂ ရပ်ကွက်က ဆယ်အိမ်စု၊ ဆယ်ပေလမ်း၊ ကိုင်တောနဲ့ အမှတ် ၅ ရပ်ကွက်အတွင်းက အနိမ့်ပိုင်း နေရာတွေကို ရေစတင်ဝင်ရောက်နေပြီလို့ ဘားအံမြို့ လူမှုကူညီရေးအသင်းဝင်တဦးက ပြောပါတယ်။
“ရေကြီးတာတော့ ဘာမှ ထူးထူးခြားခြား မရှိသေးပါဘူး။ ကယ်ဆယ်ရေစခန်းတွေ ဖွင့်တာ မရှိသေးဘူး။ နှစ်စဉ်ဝင်ရောက်တဲ့ အနိမ့်ပိုင်းတွေတော့ ရေဝင်ရောက်တာတော့ ရှိတာပေါ့။ အမှတ် ၂ တို့ အမှတ် ၅ တို့ ဆယ်အိမ်စုတို့ ဒီလောက်ပါပဲ။ ဒါကတော့ ရေရောက်တယ်ဆိုတာနဲ့ ရေမြုပ်တဲ့နေရာတွေ။”
မိုးအဆက်မပြတ်ရွာသွန်းပြီး သံလွင်မြစ်ရေ ထပ်မံတိုးလာပါက မြေနိမ့်ပိုင်းကနေအိမ်ကို ရွှေယဉ်မျှော်ဘုရား၊ မိုးလုံလေလုံအားကစားရုံနဲ့ သက်ဆိုင်ရာ အုပ်ချုပ်ရေးမှူးရုံးတွေမှာ ပြောင်းရွှေ့နေရာချထားဖို့ တာဝန်ရှိသူတွေ စီစဉ်နေတယ်လို့ မြို့ခံတွေက ပြောပါတယ်။
ဒါ့အပြင် မိုးအဆက်မပြတ်ရွာသွန်းတာကြောင့် ဘားအံမြို့ရဲ့အလှကို မြင်နိုင်တဲ့ ကြာအင်းတောင်တက် ကားလမ်းပိုင်းတချို့ ရေတိုက်စားပြီး ပျက်စီးခဲ့ပါတယ်။
အလားတူ ထိုင်း-မြန်မာနယ်စပ်က သောင်ရင်းမြစ် စိုးရိမ်ရေဟာ အမှတ် ၉၆၃ စင်တီမီတာအထက် ၁၀၅၈ စင်တီမီတာရောက်ရှိကာ စိုးရိမ်ရေအမှတ်ရဲ့ ၂၁၁ စင်တီမီတာကို ရောက်ရှိနေပြီးဖြစ်တဲ့အတွက် မြေနိမ့်မှာနေထိုင်တဲ့ နေအိမ်တချို့ ရေနစ်မြုပ်တာတွေကြောင့် မြေအမြင့်ပိုင်းနေရာတွေကို ယာယီပြောင်းရွှေ့တာတွေ လုပ်ဆောင်နေတယ်လို့ ဒေသခံတွေဆီက သိရပါတယ်။
