စစ်ကိုင်းတိုင်း၊ မုံရွာမြို့က စစ်ကောင်စီတပ်စွဲထားတဲ့ စွမ်းရည်ထက်ဆီဆိုင်ကနေ တောပု ပျူစောထီးရွာကို လက်နက်ခဲယမ်း ပို့ဆောင်လာတဲ့စစ်ကြောင်း ခဲယမ်းပို့ပြီးအပြန် ပြည်သူ့ကာကွယ်ရေး ပူးပေါင်းတပ်တွေက မိုင်းဆွဲတိုက်ခိုက်ခဲ့ရာ စစ်သား ၂ ဦး သေဆုံးခဲ့တယ်လို့ သိရပါတယ်။

ဇူလိုင် ၆ ရက် ညနေ ၄ နာရီခွဲလောက်မှာ စွမ်းရည်ထက်ဆီဆိုင်ကနေ တောပုပျူရွာကို လက်နက်ခဲယမ်း ပို့ဆောင်ပြီး ပြန်လာတဲ့ အင်အား ၂၁ ဦးခန့်ပါ စစ်ကောင်စီ မြေပြင်စစ်ကြောင်းကို ပဒေသာမိုင်း ၅ လုံးဆွဲပြီး တိုက်ခိုက်ခဲ့တာလို့ Special Force-11(PDF) တာဝန်ရှိသူတဦးက ဒီဗွီဘီကို ပြောပါတယ်။

“စစ်ကြောင်းအလာတုန်းကတော့ မိုင်းကွင်းပေါ်က မသွားလို့ မဆွဲလိုက်ရဘူး။ စစ်ကြောင်းက တောပုပျူရွာကို လက်နက်ခဲယမ်း သွားပို့တာလို့ သတင်းအတိအကျရရှိလို့ အပြန်မှာ မိုင်းဆွဲတိုက်ခိုက်ခဲ့တယ်။ စစ်သား ၂ ယောက်ကတော့ နေရာမှာပဲ ပွဲချင်းပြီး မုန့်ဟင်းခါးဖြစ်သွားတယ်။ ကျန်တဲ့စစ်သား တော်တော်များများလည်း အပြင်းအထန် ဒဏ်ရာရတယ်။ သူတို့ဘက်က ပြန်ပစ်တာတော့ မရှိပါဘူးဗျ။”

အဆိုပါ မိုင်းဆွဲတိုက်ခိုက်မှုကို Brave Heart Army (BHA)၊ Special Force-11(PDF)၊ MONYWA DYNAMITE၊ Myaung Revolution Army (MRA)၊ Peace Takers Task Force - PTTF၊ God of Monywa တို့က ပူးပေါင်းဆောင်ရွက်ခဲ့ပြီး ပြည်သူ့ကာကွယ်ရေးတပ်တွေဘက်က အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။

တိုက်ခိုက်မှုတွေအတွက် အခက်အခဲတွေရှိနေပြီး မိုင်းဆွဲတိုက်ခိုက်ဖို့ မိုင်းထုတ်လုပ်ဖို့ ပြည်တွင်းပြည်ပမှ မိဘပြည်သူတွေထံက ထောက်ပံ့မှုတွေ လိုအပ်နေပြီး ရဲဘော်တွေအနေနဲ့ စစ်ရေးလေ့ကျင့်မှုတွေ၊ စစ်ဘက်ဆိုင်ရာ မွမ်းမံသင်တန်းတွေလည်း လေ့ကျင့်သင်ယူနေကာ တော်လှန်ရေးကြီး အောင်တဲ့နေ့ထိ တိုက်ပွဲဝင်သွားပါမယ်လို့ Special Force-11(PDF) တာဝန်ရှိသူက ဆက်ပြောပါတယ်။

လက်ရှိမှာတော့ Special Force-11(PDF) နဲ့ ပူးပေါင်းတပ်ဖွဲ့တွေက ဇွန် ၂ ရက်ကလည်း မုံရွာ-ချောင်းဦးလမ်းပိုင်းက စစ်ကောင်စီယာဉ်တန်းကို လက်နက်ကြီး လက်နက်ငယ်တွေနဲ့ ပစ်ခတ်တိုက်ခိုက်ခဲ့လို့ စစ်ကောင်စီတပ်ဘက်က အကျအဆုံးတွေ ရှိခဲ့ပါသေးတယ်။

အလားတူ စစ်ကိုင်းတိုင်း၊ ဘုတလင်မြို့နယ်ထဲက စစ်ကောင်စီတပ်စွဲထားတဲ့ ကူတော်စခန်းကနေ ဘုတလင်မြို့ပေါ်ကို စစ်ကြောင်းထိုးလာတဲ့ စစ်ကြောင်းကို မုံရွာခရိုင် ပြည်သူ့ကာကွယ်ရေးတပ်မတော် (Chindwin Attack Force) တပ်ရင်း-၂၊ တပ်ရင်း-၃၊ တပ်ရင်း-၄ နဲ့ ပူးပေါင်းတပ်ဖွဲ့တွေက မိုင်းဆွဲတိုက်ခိုက်ခဲ့တယ်လို့ ဒေသကာကွယ်ရေးတပ်တွေ ဆီက သိရပါတယ်။

ဇူလိုင် ၆ ရက် မနက် ၄ နာရီ မိနစ် ၅၀ လောက်မှာ စစ်ကောင်စီတပ်ဘက်က မြေပြင်စစ်ကြောင်းအင်အား ၅၀ ခန့်နဲ့ ဘုတလင်မြို့ပေါ်ကို စစ်ကြောင်းထိုးလာရာ မြောက်တောကြီးကျေးရွာအနီးမှာ မိုင်း ၅ လုံး ၂ နေရာ တိုက်ခိုက်ခဲ့တာလို့ မုံရွာခရိုင် ပြည်သူ့ကာကွယ်ရေးတပ်မတော် (Chindwin Attack Force) တပ်ရင်း-၂၊ တပ်ရင်း-၃၊ တပ်ရင်း-၄ ပြန်ကြားရေးတာဝန်ခံက ဒီဗွီဘီကို ပြောပါတယ်။

“သူတို့လာမယ်ဆိုတာတော့ ဖရဲသီးသတင်းပေါ့နော်၊ အဲ့ဒါနဲ့ မိုင်းဆွဲတယ်၊ စစ်သား ၂ ယောက် ဒဏ်ရာရတယ်၊ ဖရဲသီးအတည်ပြုချက်အရ ညနေပိုင်းမှာ ဒဏ်ရာရသူ ၂ ယောက်ထဲက ၁ ယောက် သေသွားတယ်လို့ ပြောပါတယ်ဗျ။”

အဆိုပါတိုက်ခိုက်မှုတွေကို မုံရွာခရိုင် ပြည်သူ့ကာကွယ်ရေးတပ်မတော် (Chindwin Attack Force) တပ်ရင်း-၂၊ တပ်ရင်း-၃၊ တပ်ရင်း-၄၊ မုံရွာခရိုင် ပြည်သူ့ကာကွယ်ရေးတပ်မတော် (Chindwin Attack Force) တပ်ရင်း-၃၊ တပ်ခွဲ-၄၊ ရွာဇော်ကြီး PDF၊ မုံရွာခရိုင်တပ်ရင်း-၁၃ တပ်ခွဲ-၂ GpGDS တို့က ပူးပေါင်းဆောင်ရွက်ခဲ့တာဖြစ်ပြီး တိုက်ခိုက်မှုအပြီးမှာ ပြည်သူ့ကာကွယ်ရေးတပ်တွေဘက်က အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ ပြောပါတယ်။

ပြီးခဲ့တဲ့ ဇူလိုင် ၃ ရက်ကလည်း အမြင့်မြို့ဟောင်းဘက်ကနေ ချင်းတွင်းမြစ်ကြောင်းအတိုင်း ဆန်တက်လာတဲ့ စစ်ကောင်စီရေယာဉ်ကို လက်နက်ကြီးတွေနဲ့ စောင့်ကြိုတိုက်ခိုက်ခဲ့ပြီး ရှေ့ဆက် တိုက်ပွဲတွေ ဖန်တီးနိုင်ဖို့ လက်နက်ခဲယမ်း ထောက်ပံ့မှုတွေ လိုအပ်နေတယ်လို့ သိရပါတယ်။