ရန်ကုန်တိုင်း၊ မင်္ဂလာဒုံမြို့နယ် ဇေကမ္ဘာစက်မှုဇုန် ဇေကမ္ဘာ ၉ လမ်းမှာရှိတဲ့ ADK အထည်ချုပ်စက်ရုံ ဒီနေ့ ည ၆ နာရီ ၅၀ မိနစ်လောက်က မီးလောင်မှု ဖြစ်ခဲ့တယ်လို့ မြို့ခံတွေက ပြောပါတယ်။
ဇေကမ္ဘာ ၉ လမ်းရှိ ADK အထည်ချုပ်စက်ရုံမှာ မီးလောင်ပြီး အထည်အလိပ်ဂိုဒေါင်များပါ ကူးစက်လောင်ကျွမ်းခဲ့တယ်လို့ အလုပ်သမားတဦးက ဒီဗွီဘီကို ပြောပါတယ်။
"မီးက ဘယ်ကစလောင်လဲတော့ မသိဘူး၊ အထည်အလိပ်ဂိုဒေါင်မီးလောင်မှ ကျနော်တို့ ဝိုင်းငြှိမ်းနေတာ၊ မီးသတ်တွေလည်း မီးခိုးမွှန်ပြီး အသက်ရှူကြပ်တာတွေရှိတယ်။ မီးက ၈ နာရီကျော်လောက်မှ ငြိမ်းသွားတာ။"
မီးလောင်ကျွမ်းမှုကို မီးသတ်တပ်ဖွဲ့ဝင်တွေက level 2 အဆင့်နဲ့ ၁ နာရီကြာအောင် မီးငြှိမ်းသတ်ရပြီး ၈ နာရီ ၂၃ မိနစ်မှ မီးငြိမ်းသွားတယ်လို့ မီးသတ်ဦးစီးဌာနက ထုတ်ပြန်ထားပါတယ်။
"အခုချက်ချင်းတော့ ဆုံးရှုံးမှုတန်ဖိုးကို မတွက်ရသေးဘူး။ ဖြစ်စဥ်ကို စုံစမ်းနေတုန်းပဲရှိသေးတယ်" လို့ မီးသတ်ဦးစီးဌာနက တာဝန်ရှိသူတဦးက ဒီဗွီဘီကို ပြောပါတယ်။
ADK အထည်ချုပ်စက်ရုံမှာ မင်္ဂလာဒုံမြို့နယ်နဲ့ ရွှေပေါက်ကံမြို့ကြားရှိ ဇေကမ္ဘာဝင်းအတွင်းတည်ရှိပြီး အလုပ်သမား ၃၀၀၀ ကျော်နဲ့ လည်ပတ်နေတဲ့ စက်ရုံဖြစ်ပါတယ်။
