စစ်အုပ်ချုပ်ရေးကြေညာထားတဲ့ တနင်္သာရီမြို့နယ်မှာ ခြေလျင်စစ်ကြောင်းထိုးလာတဲ့ စစ်ကောင်စီတပ်ကို ဒေသတွင်း ပြည်သူ့ကာကွယ်ရေးပူးပေါင်းတပ်ဖွဲ့တွေက ကြားဖြတ်တိုက်ခိုက်ခဲ့ပြီးနောက် နှစ်ဖက်ပစ်ခတ်မှု ဖြစ်ပွားခဲ့တယ်လို့ ပြည်သူ့ကာကွယ်ရေးတပ်ဖွဲ့ဝင်တွေဆီက သိရပါတယ်။
ဇူလိုင် ၂ ရက် နေ့လယ် ၂ နာရီလောက်မှာ တနင်္သာရီအခြေစိုက် ၅၆၁ တပ်ရင်းက သိန္ဓောကျေးရွာ ၁၀၁ တပ်ရင်းကို ခြေလျင်စစ်ကြောင်းထိုး ချီတက်လာတဲ့ အင်အား ၇၀ ကျော်ပါတဲ့ စစ်ကောင်စီတပ်ကို တောင်ဘိန်းကျေးရွာနဲ့ ကျွဲထိန်းကုန်းကျေးရွာကြားမှာ ဒေသတွင်း ပြည်သူ့ကာကွယ်ရေးပူးပေါင်းတပ်ဖွဲ့တွေက ချုံခိုတိုက်ခိုက်ခဲ့တာလို့ သိရပါတယ်။
နှစ်ဖက်ပစ်ခတ်မှုမှာ စစ်ကောင်စီဘက်က တပ်သား ၃ ဦး ထိခိုက်ခဲ့ပြီး ပြည်သူ့ကာကွယ်ရေးတပ်ဖွဲ့ဘက်ကတော့ အထိအခိုက်မရှိခဲ့ဘူးလို့ ပြောပါတယ်။
တိုက်ပွဲဖြစ်ပြီးနောက် စစ်ကောင်စီရဲ့ ၅၆၁ တပ်ရင်းကနေ ကျွဲထိန်းရွာဘက်ကို လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ သိရပါတယ်။
ပြည်သူ့ကာကွယ်ရေးတပ်ဖွဲ့ဝင်တဦးက “သူတို့ဘက်က လက်နက်အကြီးတွေနဲ့ ပြန်ပစ်တာ။ လက်နက်အရွယ်အစားက ကြီးတယ်။ ကျွဲထိန်းကုန်းရွာဘက်ကို ပစ်တာပါ။ ဒီရွာမှာက လူမရှိတော့ဘူး” လို့ ပြောပါတယ်။
တနင်္သာရီမြို့နယ်အတွင်းမှာ ပြီးခဲ့တဲ့ ဇွန်လက ဖြစ်ပွားခဲ့တဲ့ ၅ ရက်တာ တိုက်ပွဲပြီးတဲ့နောက်ပိုင်း စစ်ကောင်စီဘက်က စစ်လက်နက်နဲ့ အင်အားတွေ ဖြည့်တင်းလာပြီး ကျေးရွာတွေအပေါ် လက်နက်ကြီးတွေနဲ့ မကြာခဏ ပစ်ခတ်တိုက်ခိုက်တာတွေ လုပ်ဆောင်လာတယ်လို့လည်း ပြောပါတယ်။
အဆိုပါပစ်ခတ်မှုကို မြိတ်ခရိုင်တပ်ရင်း-၂ နဲ့ ဘက်မလိုက်ပြောက်ကျားအဖွဲ့တို့က ပူးပေါင်းလုပ်ဆောင်ခဲ့တယ်လို့လည်း သိရပါတယ်။
ပြီးခဲ့တဲ့ရက်ပိုင်းကလည်း ဘန်းလမွတ်ကျေးရွာမှာ စစ်ကောင်စီတပ်နဲ့ ပြည်သူ့ကာကွယ်ရေးတပ်တို့ နှစ်ဖက်ပစ်ခတ်မှု ဖြစ်ပွားခဲ့ပြီး စစ်ကောင်စီတပ်က နေအိမ် ၂ လုံးကို မီးရှို့ခဲ့ကာ လက်နက်ကြီးတွေနဲ့ ရွာထဲပစ်ခတ်တိုက်ခိုက်ခဲ့တယ်လို့လည်း သိရပါတယ်။
တနင်္သာရီတိုင်း၊ ထားဝယ်ခရိုင်၊ ရေဖြူမြို့နယ် ကံပေါက်ဒေသနဲ့ ကလိန်အောင်မြို့အကြား ဆက်သွယ်ထားတဲ့ ကလိန်အောင်-ကံပေါက် လမ်းပိုင်းကို ဇူလိုင် ၃ ရက် မနက်အစောပိုင်းကတည်းက စစ်တပ်က လုံခြုံရေးယူထားပြီး အသုံးပြုခွင့်ပိတ်ထားကြောင်း ဒေသခံရွာသားတွေဆီက သိရပါတယ်။
လမ်းပိုင်းရှိ ဂန့်ဂေါ်တောင်ကျေးရွာမှာ ၃ နေရာနဲ့ ကလိန်အောင်လမ်းဆုံအနီး ၁ နေရာ၊ စုစုပေါင်း ၄ နေရာမှာ မောရဝတီရေတပ်က စစ်သားတွေနဲ့ ရဲတွေက နေရာခွဲပြီး လမ်းပိတ်ဆို့ထားတာပါ။
ကံပေါက်ရွာမှ ယာဉ်မောင်းတဦးက “ကားတွေ အကုန်ပြန်လှည့်ခိုင်းနေတယ်။ အထွက်လည်းမရဘူး၊ အဝင်လည်းမရဘူး။ စစ်သားရော ရဲရော အကုန်ပါတယ် ဒီတခါ။ အရင်က စစ်ရင် ရေတပ်က စစ်သားနဲ့ ၂၇၃ က စစ်သားလောက်ပဲ ပါတယ်” လို့ ပြောပါတယ်။
မနေ့ညက မောရဝတီရေတပ်က စစ်သားတွေ ထပ်ထွက်ပြေးသွားတယ်ဆိုတဲ့ အကြောင်းပြချက်နဲ့ လမ်းပိတ်ဆို့ စစ်ဆေးနေတယ်လို့ ဆိုပါတယ်။
ထွက်ပြေးသွားတဲ့ ရေတပ်စစ်သား အရေအတွက်နဲ့ အသေးစိတ်အချက်အလက်ကို အတည်ပြုနေဆဲဖြစ်ပြီး ဇူလိုင် ၃ ရက် မနက် ၇ နာရီလောက်က စစ်သားတွေလိုက်ပါလာတဲ့ စစ်ကား ၂ စီးနဲ့ ကားအလွတ် ၄ စီး၊ စုစုပေါင်း ၆ စီး ကလိန်အောင်-ကံပေါက်လမ်းပိုင်းကို ဖြတ်သွားတယ်လို့ လမ်းပိုင်းရှိ မျက်မြင်တွေ့ရှိခဲ့ရသူ ဒေသခံတဦးက ပြောပါတယ်။
ဇွန် ၂၇ ရက်ကလည်း မောရဝတီရေတပ်က စစ်သား ၁၂ ဦး ကင်းတာဝန်ကျနေစဉ် စစ်တပ်ကားကို လမ်းမှာထားခဲ့ပြီး ထွက်ပြေးလွတ်မြောက်သွားတာကြောင့် ကံပေါက်တိုက်နယ် အောက်ဘက်က ကျေးရွာတွေမှာ ပိတ်ဆို့ရှာဖွေခဲ့ပါတယ်။
ဇွန် ၂၈ နဲ့ ၂၉ ရက်တွေမှာ ကံပေါက်ရွာပတ်လမ်းကို ပိတ်ဆို့ခဲ့ပြီး ဇူလိုင် ၁ ရက်နဲ့ ၂ ရက်တွေမှာတော့ လမ်းပိတ်ဆို့စစ်ဆေးမှု မပြုလုပ်ခဲ့ဘူးလို့ သိရပါတယ်။
ရေတပ်နဲ့နီးစပ်သူတဦးက “ရေတပ်မှာ အပြင်ထွက်ခွင့် ရထားသူတွေတောင် ညနေ ၆ နာရီ နောက်ဆုံးထား အပြင်ထွက်ဖို့ သတိပေးထားတယ်” လို့ ပြောပါတယ်။
ကလိန်အောင်-ကံပေါက်လမ်းပိုင်းဟာ ရေး-ထားဝယ် ကားလမ်းဘေးက ခွဲဝင်ရပြီး ၉ မိုင်နဲ့ ၆ ဖာလုံ အကွာအဝေးရှိပါတယ်။
ကံပေါက်ဒေသမှာ အမှတ် ၂၇၃ စစ်ကောင်စီခြေလျှင်တပ်ရင်းနဲ့ မောရဝတီ ရေတပ်စခန်းဌာနချုပ်တို့ တည်ရှိပြီး ဇွန်လနောက်ဆုံးအပတ်နဲ့ ဇူလိုင်လဆန်းမှာ မောရဝတီရေတပ်ကနေ တပ်ကိုစွန့်ခွာလာသူတွေ ဆက်တိုက်ရှိနေတာ ဖြစ်ပါတယ်။
