စစ်ကိုင်းတိုင်း၊ ကန့်ဘလူမြို့နယ်အတွင်း ပျူစောထီး စစ်သင်တန်းအတွက် လူမပေးရင် အိမ်နဲ့လယ်ယာမြေတွေကို သိမ်းမယ်လို့ စစ်ကောင်စီ လက်နက်ထောက်ပံ့ထားတဲ့ စစ်တပ်လက်အောက်ခံ ဘုန်းကြီး ဝါသဝနဲ့ ပျူ စောထီးတပ်ဖွဲ့ဝင်‌တွေက ဇွန်လ ၂၃ ရက်နေ့ အစည်းအဝေးမှာ ခြိမ်းခြောက် အကျပ်ကိုင်‌ပြောဆိုခဲ့တယ်လို့ ဒေသခံတွေဆီကသိရပါတယ် ။

"ရေကြည်ရွာစာသင်ကျောင်းမှာ တစ်အိမ် တစ်ယောက် မတက်မနေရပုံစံနဲ့ ၂၃ ရက်နေ့က အစည်းအဝေးလုပ်ပြီး ရွာအလိုက် လူအယောက် ၂၀ ကနေ ၃၀ အထိ ပျူစောထီးသင်တန်း တက်ရမည်လို့ ဝါသဝ ကိုယ်တိုင်က ပြောဆိုခဲ့တာပါ

ခေါသန္တီရွာကို အယောက် ၃၀ တဲ့ အဲဒါ ဝါသဝ က မိုက်ကြီးနဲ့ အော်ဆဲနေတာ အကုန်လုံး PDF ထဲ ဝင်မှာလားလို့ မေးတော့ ဝင်ပါဘူးလို့ ပြန်ပြောကြတာ။ အဲဒါဆို ပျူထဲကို ဝင်လို့ ပြောတယ်။ အကုန်လုံးက တိတ်ကုန်ကြတယ်။

ရွာကနေ ထွက်သွားတယ်ဆိုလို့ရှိရင် အိမ်တွေ လယ်တွေအကုန်လုံး၊ လယ်တွေအကုန်လုံး သိမ်းမှာ ၅ ရက်နေ့ နောက်ဆုံးလို့ ပြောတယ်။ ၅ ရက်က မနက်ဖြန်၊ သဘက်ခါဆို ပြည့်မှာ။ ရွာကလူတွေ ခေါင်းတောက်နေကြတယ်။ ရေကြည်က အရှေ့ရေကြည်၊ အနောက်ရေကြည် နှစ်ခုရှိတာ။ အုတ်ဖိုကလူအယောက် ၂၀၊ အုန်းတောကအယောက် ၂၀၊ ခေါသန္တီ လူအယောက် ၃၀ အဲဒီလို ပြောတယ် " လို့ လုံခြုံရေးအရ အမည်မဖေါ်လိုသူ ဒေသခံတစ်ဦးက DVB ကိုပြောပါတယ် ။

အဆိုပါ အစည်းအဝေးကို အတင်းအဓမ္မ ဖိအားပေးတက်ခိုင်းပြီး မတက်တဲ့အိမ်တွေကို ငွေ ၁၀၀၀၀ (တစ်သောင်းကျပ်) ဒဏ်ရိုက်မယ်လို့ ခြိမ်းခြောက်ပြောဆိုခဲ့တယ်။

သင်တန်းအတွက် လူပေးရမယ့်ကျေးရွာတွေမှာ ရေကြည် (အရှေ့)၊ ရေကြည် (အနောက်)၊ အုပ်ဖို၊ ခင်သာနဲ့ အုန်းတောရွာတွေက ၂၀ ယောက်ဆီ၊ ခေါသန္တီရွာက ၃၀ ယောက် ပေးရမယ်။ အတင်းအဓမ္မ လူစုဆောင်းဖို့ အစည်းအဝေးပြုလုပ်ခဲ့တာဖြစ်တယ်လို့ ဒေသခံတွေကဆိုပါတယ် ။

စစ်တပ်လက်အောက်ခံ ပျူစောထီးနဲ့ တိုင်းရင်းသားလက်နက်ကိုင်တွေဌာ‌နေ ပြည်သူ့စစ်တပ်ဖွဲ့တွေက အတင်းအဓမ္မ လူသစ်စုဆောင်းကာစစ်သင်တန်းတက်ခိုင်းပြီး လူစုဆောင်းခြင်းတွေ ဆက်တိုက်လုပ်ဆောင်နေရာ တချို့ကျေးရွာ ဒေသတွေမှာ မဲနှိုက် ရွေးချယ်ပြီး မဲပေါက်သူက သင်တန်းတက်ရပြီး မဲမပေါက်သူတွေ ၁ အိမ်ကို ၁ လ ဘယ်လောက်ဆိုတာ သတ်မှတ်ပြီး ပိုက်ဆံပေးရတယ် တော်လှန်ရေးနဲ့ နီးစပ်သူကပြောပါတယ် ။

ဒေသတွင်း တော်လှန်ရေး တပ်ဖွဲ့ဝင်တစ်ဦးက "သူတို့(အကြမ်းဖက်စစ်တပ်)မှာ လူအင်အား တော်တော်လိုအပ်နေပုံရတယ် နေရာဒေသအတော်များများမှာ အတင်းအဓမ္မ လူသစ်စုဆောင်းနေရတယ် သူတို့မှာစစ်သားက အလျှော့ပဲရှိပြီး အဝင်မရှိတော့ဘူး " လို့ ပြောပါတယ်။

ပြီးခဲ့တဲ့ ဇွန်လ စတုတ္ထပတ်အတွင်းကလည်း ကန့်ဘလူခရိုင်၊ ကျွန်းလှမြို့နယ်ထဲက တင်းတိမ်ရံ၊ မြနှင်းကုန်း၊ အင်းကောင်းနဲ့ ပိုးဇာကုန်းရွာတွေက ဒေသခံတချို့ကို မဲနှိုက်ရွေးချယ်ပြီး စစ်သင်တန်း တက်ခိုင်းခဲ့ပြီး သင်တန်းတက်ခိုင်းတာကို လယ်လှရွာက ပျူစောထီးခေါင်းဆောင်က လုပ်ဆောင်နေတာဖြစ်ပြီး မဲပေါက်ပြီး သင်တန်းမတက်ချင်ရင် ၈၅ သိန်း ပေးရမယ် မဲမပေါက်တဲ့ အိမ်တွေက လစဉ်ကြေးပုံစံ ၁ လ ၁ သိန်းကောက်ယူတယ်လို့ ဒေသခံတွေကဆိုပါတယ်။