မကွေးတိုင်း၊ ပေါက်မြို့နယ်မှာ ဇွန် ၁၅ ရက်က စစ်ကောင်စီကားတစီး မိုင်းဆွဲ တိုက်ခိုက်ခံရပြီး ထိခိုက်သေဆုံးသူရှိနိုင်တယ်လို့ အနောက်လွင်ပြင် LPDF ကနေ သိရပါတယ်။
ပေါက်မြို့နယ် ကပစ ၂၄ ကို ရိက္ခာလာပို့တဲ့ ပခုက္ကူအခြေစိုက် တပ်မ ၁၀၁ က စစ်ကောင်စီကား ၁၂ စီးကို လုံခြုံရေးယူဖို့ ရေပြာဘက်ကနေ ကမ္မမြို့ဘက်ကို အင်အား ၃၀ လောက်နဲ့ ထွက်လာတဲ့ စစ်ကောင်စီဖောကား ၁ စီးကို ဇွန်လ ၁၅ ရက်နေ့ မွန်းတည့် ၁၂ နာရီလောက်မှာ မိုင်းဆွဲတိုက်ခိုက်ခဲ့တာလို့ အနောက်လွင်ပြင် LPDF ရဲ့ တာဝန်ခံ ရဲဘော်တေဇက ပြောပါတယ်။
အဲဒီကားက လက်နက်ငယ်တွေနဲ့ ပစ်ခတ်ရှင်းလင်းပြီးဝင်လာတာဗျ။ ပေပါ ပဒေသာမိုင်း ၅ လုံး၊ ၅ ဂါလန်ပုံးနဲ့ လုပ်ထားတဲ့ ပဒေသာမိုင်း ၂ လုံး၊ ရှေ့ထွက်ပဒေသာမိုင်း ၃ လုံး၊ စလစ်အိုး ပဒေသာမိုင်း ၂ လုံးနဲ့ တိုက်ခိုက်ခဲ့တာဖြစ်ပြီး အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးသူရှိနိုင်ပေမယ့် အတိကျမသိရသေးဘူးလို့ ဆိုပါတယ်။
စစ်ကောင်စီဘက်က လက်နက်ကြီး လက်နက်ငယ်တွေနဲ့ ရမ်းကားပစ်ခတ်ပေမယ့်လည်း ပြည်သူ့ကာကွယ်ရေး ရဲဘော်တွေ အထိအခိုက်မရှိဘဲ ဆုတ်ခွာနိုင်ခဲ့ကြတယ်လို့ ရဲဘော်တေဇက ပြောပါတယ်။
အဲဒီတိုက်ခိုက်မှု ပြုလုပ်နိုင်ဖို့အတွက် ဗိုလ်လရောင် PDF အဖွဲ့က ယမ်းစို ၁ ဖာနဲ့ ယမ်းကြိုးအတောင့် ၁၀၀ ထောက်ပံ့ပေးပြီး ပခုက္ကူနဲ့ပေါက် ပကဖအဖွဲ့တွေ၊ Successfull Force-Pauk တာဝန်ခံတို့က လိုအပ်တဲ့ သတင်းအချက်အလက်တွေ ပေးပို့ကူညီခဲ့ကြတယ်လို့ ဆိုပါတယ်။
ဇွန် ၁၂ ရက် ညနေကလည်း မကွေးတိုင်း စလင်းမြို့နယ်မှာ စစ်ကောင်စီကား တစီးတိုက်ခိုက်ခံရပြီး ၄ ယောက်သေဆုံးကာ ၇ ယောက်ဒဏ်ရာရရှိခဲ့တယ်လို့ မင်းဘူးခရိုင် တပ်ရင်း(၁)PDF-စလင်း ကနေ သိရပါတယ်။
စလင်းမြို့နယ် သရက်တောရဲစခန်းမှာ တပ်စွဲထားတဲ့ စစ်ကောင်စီတပ်သားတွေနဲ့ ရဲအင်အား ၂၀ လောက် စီးနင်းလိုက်ပါလာတဲ့ လိုက်ထရက်ကား ၁ စီးကို ဇွန် ၁၂ ရက်နေ့ ညနေ ၃ နာရီလောက်မှာ လမ်းကနေစောင့်ပြီး လက်နက်ငယ်တွေနဲ့ ပစ်ခတ်တိုက်ခိုက်ခဲ့ကြတာလို့ PDF-စလင်းရဲ့ ပြန်ကြားရေးတာဝန်ခံ ဗိုလ်သတ္တိက ပြောပါတယ်။
“အဲဒီစစ်သားနဲ့ ရဲတွေဟာ မြောင်းသစ်ကျေးရွာမှာ ဓားထိုးမှုဖြစ်တာကို တရာခံဖမ်းပြီး ပြန်လာတာကို ကြားဖြတ်တိုက်ခိုက်ခဲ့တာဗျ။ အဲဒီတိုက်ခိုက်မှုအတွင်းမှာ စစ်ကောင်စီဘက်က ၄ ယောက်သေဆုံးပြီး ၇ ယောက်ဒဏ်ရာရရှိခဲ့တယ်။ တိုက်ခိုက်မှုအတွင်းမှာ ကျနော်တို့ဘက်က ရဲဘော်တွေ အထိခိုက်မရှိဘဲ ဆုတ်ခွာနိုင်ခဲ့ကြပြီး လုံခြုံစိတ်ချရတဲ့နေရာကို ရောက်ရှိမှ သတင်းထုတ်ပြန်ရတာ။”
အဲဒီ တိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့အခြေနေကို သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
