တနင်္သာရီတိုင်း၊ ကလိန်အောင်-ထားဝယ် ကားလမ်းပေါ်ရှိ စစ်ကောင်စီရဲ့ ကလိန်အောင် အခြေစိုက် အမှတ် ၄၀၈ ခြေမြန်တပ်ရင်းနဲ့ မောင်မယ်ရှောင်ရွာ ဘုရားမဲ စစ်ကောင်စီ စစ်ဆေးရေးဂိတ်တို့ကို ဒေသခံ ပြည်သူ့ကာကွယ်ရေးတပ်တွေက မေ ၁၆ ရက်ကနေ ၃၁ ရက်အတွင်း ၅ ကြိမ်ထက်မနည်း တိုက်ခိုက်ခဲ့ကြောင်း ပြည်သူ့ကာကွယ်ရေးတပ်ဖွဲ့တွေက ထုတ်ပြန်ထားပါတယ်။
မေ ၁၆ ရက်၊ ၁၈ ရက်၊ ၂၆ ရက်နဲ့ ၂၉ ရက်တွေမှာ ကလိန်အောင်အခြေစိုက် ရွှေဘီလုံး ပြည်သူ့ကာကွယ်ရေးတပ်ဖွဲ့၊ ကော်သူးလေအာမီနဲ့ ရေဖြူမြို့နယ် ပြည်သူ့ကာကွယ်ရေးတပ်ဖွဲ့တို့ ပူးပေါင်းပြီး ကလိန်အောင်အခြေစိုက် စစ်ကောင်စီ အမှတ် ၄၀၈ ခြေမြန်တပ်ရင်းကို လက်နက်ကြီးတွေနဲ့ ၄ ရက်ဆက်တိုက် တိုက်ခိုက်ခဲ့တယ်လို့ ရေဖြူမြို့နယ် ပြည်သူ့ကာကွယ်ရေး တပ်ဖွဲ့က ဇွန် ၁ ရက်မှာ သတင်းထုတ်ပြန်ပါတယ်။
အဆိုပါ တိုက်ခိုက်မှုတွေမှာ စစ်ကောင်စီဘက်က ထိခိုက်သေဆုံးမှုတွေ ရှိနိုင်တယ်လို့ ထုတ်ပြန်ချက်မှာ ဖော်ပြထားပေမဲ့ ဦးရေအတိအကျ ဖော်ပြထားတာမျိုး မတွေ့ရပါဘူး။
အဲဒီပစ်ခတ်တိုက်ခိုက်မှုတွေအပြီးမှာ စစ်ကောင်စီဘက်ကလည်း လက်နက်ကြီးနဲ့ ပြန်လည် ပစ်ခတ်ခဲ့ပြီး ကလိန်အောင်မြို့နယ် ကျောက်ရှပ်ရွာသား ၅ ဦးကို ဖမ်းဆီးစစ်ဆေးနေတယ်လို့ ရွာသားတွေဆီက သိရပါတယ်။
ထားဝယ်မြို့နယ် မောင်မယ်ရှောင်ရွာမှာလည်း စစ်ကောင်စီတပ်သားတွေ မေ ၃၀ ရက်က နေရာ ၃ ခုမှာ တပြိုင်တည်း တိုက်ခိုက်ခံခဲ့ရပါတယ်။
မောင်မယ်ရှောင်ရွာ စာသင်ကျောင်း၊ တံတားဖြူ သဲကွက် နဲ့ ဘုရားမဲ စစ်ကောင်စီဂိတ် နေရာ ၃ ခုကို ထားဝယ် ပကဖ၊ DGRF အဖွဲ့က သွားရောက်တိုက်ခိုက်ခဲ့ပြီး ထိခိုက်မှု အတည်မပြုနိုင်ခဲ့ပေမဲ့ မောင်မယ်ရှောင်စာသင်ကျောင်းက စစ်ကောင်စီတပ်သားတွေကတော့ ညတွင်းချင်း ထွက်ပြေးသွားတယ်လို့ DGRF ရဲ့ ထုတ်ပြန်ချက်မှာ ဖော်ပြထားပါတယ်။
မေ ၃၁ ရက် ညနေ ၅ နာရီဝန်းကျင်ကလည်း ကလိန်အောင်မြို့မှ ရေဖြူမြို့ဘက်ကိုလာတဲ့ ဖောကား ၄ စီးနဲ့ ဟွန်ဒါဖစ်တစီးပါ စစ်ယာဉ်တန်းကို မိုင် ၃၀ ကျေးရွာ တံတားအနီး ထားဝယ်ပြည်သူ့လွတ်မြောက်ရေးတပ်ဖွဲ့ TPLF နဲ့ DNLA ရေဖြူအလယ်ပိုင်း ပကဖ တို့က မိုင်းဆွဲတိုက်ခိုက်ခဲ့တယ်လို့ TPLF က ထုတ်ပြန်ပါတယ်။
အဲဒီယာဉ်တန်းတိုက်ခိုက်မှုမှာတော့ စစ်ကောင်စီဘက်က သေဆုံးသူ ၁ဝ ဦးအပြင် ဒဏ်ရာရသူလည်း ၁၀ ဦးထက်မနည်းရှိကြောင်း TPLF အဖွဲ့က အတည်ပြုပါတယ်။
ကလိန်အောင်-ထားဝယ် လမ်းပိုင်းမှာ မေလအလယ်ပိုင်းကစပြီး ပြည်သူ့ကာကွယ်ရေးတပ်တွေရဲ့ စစ်ရေးလှုပ်ရှားမှု ရှိနေခဲ့ပြီး စစ်ကောင်စီနဲ့ ဒေသခံ ပြည်သူ့ကာကွယ်ရေးတပ်တွေအကြား စစ်ရေးတင်းမာနေဆဲ ဖြစ်ပါတယ်။
