ရန်ကုန်၊ အင်းစိန်မြို့နယ်၊ ကြို့ကုန်းအနောက်ရပ်ကွက်၊ လှိုင်မြစ်အတွင်း အင်းစိန် ငါးလုပ်ငန်းဦးစီးဌာနမှာ ကမ်းကပ်ထားတဲ့ ငါးဖမ်းသင်္ဘောပေါ်ရှိ ဒီဇယ်ကန်အတွင်းမှာ မေ ၃၁ ရက် မနက်ပိုင်းက အမျိုးသား ၂ ဦး သေဆုံးသွားတယ်လို့ အင်းစိန်မြို့နယ် ကြက်ခြေနီတပ်ဖွဲ့က ပြောပါတယ်။

သင်္ဘောပေါ်ရှိသူတွေက ရေလုပ်သား ၂ ဦး ဒီဇယ်ကန်ထဲက ပြန်မတက်လာတာကြောင့် ကယ်ဆယ်ရေးအသင်းတွေကို မနက် ၁၀ နာရီလောက်က ဖုန်းခေါ်ခဲ့တယ်လို့ သိရပါတယ်။

အင်းစိန်မြို့နယ် ကြက်ခြေနီတပ်ဖွဲ့ တာဝန်ရှိသူတဦးက “မနက် ၁၀ နာရီလောက် ဖုန်းလှမ်းဆက်သွယ်တယ်။ ငါးသယ်‌သင်္ဘော ဝမ်းဗိုက်ထဲမှာ ကန်က ၁၈ ပေ အနက်လောက် ရှိတယ်။ အဲ့ဒီ ဒီဇယ်ကန်ထဲ ဆီဝင်ဆေးတဲ့သူ ၂ ဦး အသက်ရှုကြပ်ပြီး သေဆုံးသွားတာပါ။ တယောက်က ၂၅ နှစ်၊ တယောက်က အသက် ၄၀ ကျော်ပါပဲ၊ အင်းစိန်ဆေးရုံကြီး ပို့ဆောင်ပေးထားပါတယ်” လို့ ပြောပါတယ်။

ရေလုပ်သားတွေရဲ့ ပြောပြချက်အရ အဲ့ဒီမနက်ပိုင်းက ဖြိုးပွင့်အောင် 555 သင်္ဘောပေါ်က အနက် ၁၈ ပေရှိ ဒီဇယ်ကန်ထဲကို ဆီဝင်ဆေးဖို့ အမျိုးသား ၁ ဦး အရင်ဆင်းသွားခဲ့ပြီး ပြန်တက်မလာတဲ့အတွက် နောက် ၁ ဦးက ထပ်မံဆင်းသွားရာကနေ သေဆုံးမှု ဖြစ်ခဲ့တာပါ။

သေဆုံးသူတွေဟာ အသက် ၂၅ နှစ်ရှိ အမျိုးသားနဲ့ အသက် ၄၀ ကျော် အမျိုးသားတို့ဖြစ်ပြီး ရေလုပ်သားအဖြစ် လုပ်ကိုင်နေသူတွေလို့ သိရပါတယ်။

ရုပ်အလောင်းဆယ်ယူမှုကို အင်းစိန်မြို့နယ် မီးသတ်တပ်ဖွဲ့က ဆယ်ယူခဲ့ပြီး အင်းစိန်အခြေစိုက် အရပ်ဘက်ကယ်ဆယ်ရေးအသင်းတခုက အင်းစိန်ဆေးရုံ ရင်ခွဲဌာနကို ပို့‌ဆောင်ပေးထားတယ်လို့ သိရပါတယ်။