ထိုင်းနိုင်ငံ၊ တာ့ခ်ခရိုင်၊ မဲဆောက်မြို့မှာ အွန်လိုင်းပေါ်ကနေ တရားမဝင် ဆင်းကတ်ရောင်းနေတဲ့ ထိုင်းအမျိုးသမီး ၁ ဦးနဲ့ မြန်မာအလုပ်သမား ၂ ဦးတို့ကို မေ ၁၈ ရက်က ဖမ်းဆီးအရေးယူထားတယ်လို့ ထိုင်းဆိုက်ဘာရဲတပ်ဖွဲ့က သတင်းထုတ်ပြန်ထားပါတယ်။
ပြီးခဲ့တဲ့ မေ ၁၇ ရက်က မဲဆောက်မြို့မှာ ဆင်းကတ်ရောင်းနေတဲ့ မြန်မာနိုင်ငံသား ၂ ဦးကို ရဲတပ်ဖွဲ့က ဖမ်းဆီးရမိခဲ့ပြီး စစ်ဆေးခဲ့ရာ သူတို့ ၂ ဦးဟာ အလုပ်သမားတွေဖြစ်ပြီး ထိုင်းနိုင်ငံသူ အမျိုးသမီးဆီမှာ အလုပ်လုပ်ကိုင်နေသူများဖြစ်ကြောင်း ဝန်ခံထွက်ဆိုခဲ့တယ်လို့သိရပါတယ်။
ထိုင်းရဲတပ်ဖွဲ့ကနေ တရားမဝင်ဆင်းကတ်တွေ ရောင်းချနေသူ ထိုင်းအမျိုးသမီးနေထိုင်တဲ့ ထဆိုင်လွှက်ကျေးရွာရှိ နေအိမ်ကို ဝင်ရောက်စစ်ဆေးခဲ့ရာ အသင့်မှတ်ပုံတင်ပြီးသား ဆင်းကတ် ၄၃၉၇ ကတ်၊ လက်ကိုင်ဖုန်း (၂၀) လုံး၊ တယ်လီဖုန်းချိတ်ဆက်မှုအတွက် ကေဘယ်လ်ကြိုးများ၊ လိုင်စင်မဲ့ သေနတ် ၁ လက်နဲ့ ကျည်အတောင့် ၅၀ တို့ကို ရှာဖွေတွေ့ရှိခဲ့တယ်လို့ ထိုင်းဆိုက်ဘာရဲတပ်ဖွဲ့က ထုတ်ပြန်ထားပါတယ်။
စစ်ဆေးချက်အရ ထိုင်းနိုင်ငံသူ အမျိုးသမီးဟာ Facebook စာမျက်နှာကနေ တရားမဝင် ဆင်းကတ်တွေ ရောင်းချလာတာ ၆ နှစ်ခန့်ရှိခဲ့ပြီးတော့ မြန်မာနိုင်ငံ မြဝတီမြို့ကို တရားမဝင် ဆင်းကတ်ပေါင်း ၁၀၀၀၀ ကျော် ရောင်းချခဲ့ကြောင်း ဝန်ခံထွက်ဆိုခဲ့တယ်လို့ ဆိုပါတယ်။
အဆိုပါဖမ်းဆီးရမိသူ ထိုင်းအမျိုးသမီးနဲ့ မြန်မာအလုပ်သမား ၂ ဦးကို မဲဆောက်မြို့ရဲစခန်းမှာ စစ်ဆေးမေးမြန်းနေပြီး ဥပဒေအရ အရေးယူဆောင်ရွက်သွားမယ်လို့ သိရပါတယ်။
