ချင်းပြည်နယ်ထဲမှာ မိုခါ အင်အားပြင်းဆိုင်ကလုန်းမုန်တိုင်းကြောင့် ပြည်သူတွေရဲ့ အိုးအိမ်အဆောက်အဦ ၁၉၀၀ လောက် ပျက်စီးသွားတယ်လို့ ကြားကာလ ချင်းအမျိုးသား အတိုင်ပင်ခံကောင်စီက ထုတ်ပြန်ပါတယ်။
မေ ၁၇ ရက်အထိ ရထားတဲ့အချက်အလက်တွေဖြစ်ပြီး ဆက်သွယ်ရေးခက်ခဲနေလို့ စာရင်းတွေ ပြောင်းလဲနိုင်တယ်လို့လည်း ဆိုပါတယ်။
ရထားတဲ့စာရင်းတွေအရ မတူပီမြို့နယ်ထဲမှာ အိမ်ခြေ ၈၈၇ လုံး၊ ဘာသာရေး အဆောက်အအုံ ၇ လုံး၊ ကျန်းမာရေးအဆောက်အအုံ ၄ လုံးနဲ့ စာသင်ကျောင်း ၁ ကျောင်း ပျက်စီးသွားလို့ အများဆုံး ဖြစ်ပါတယ်။
ဒေသတွင်းသတင်းဌာန ချင်းဂျာနယ်ကတော့ မတူပီမြို့နယ်၊ လိုင်လင်းပီမြို့ပေါ်မှာ လူနေအိမ် ၁၂၀ လောက်ပျက်စီးသွားပြီး အိုင်ကာရွာ၊ ရွာဗားရွာ၊ လုံးခင်းရွာ၊ တိန်ဆီးရွာ၊ သွီးလောရွာနဲ့ ဖာနိုင်ရွာတို့မှာ အိမ်ခြေအပျက်အစီးများတယ်လို့ ဖော်ပြထားပါတယ်။
မင်းတပ်မြို့နယ်မှာ အိမ်ခြေ ၃၆၄ လုံး၊ ဘာသာရေးအဆောက်အအုံ ၇ လုံး၊ စာသင်ကျောင်း ၁၈ ကျောင်းနဲ့ စပါးကျီ ၁၇ ခု၊ ပလက်ဝ မြို့နယ်မှာ အိမ်ခြေ ၂၂၀၊ ဘာသာရေးအဆောက်အအုံ ၂ ခု၊ ကျန်းမာရေး အဆောက်အအုံ ၁ ခုနဲ့ စာသင်ကျောင်း ၁ ကျောင်း၊ ကန်ပက်လက်မြို့နယ်မှာ အိမ်ခြေ ၁၁၂ လုံး၊ ဘာသာရေးအဆောက်အအုံ ၃ ခု၊ စာသင်ကျောင်း ၅ ကျောင်းနဲ့ စပါးကျီ ၂ ခု၊ ဟားခါးမြို့နယ်မှာ အိမ်ခြေ ၈၅ လုံးနဲ့ ဘာသာရေးအဆောက်အအုံ ၁ လုံး၊ ဖလမ်းမြို့နယ်မှာ အိမ်ခြေ ၇၄ လုံး၊ ဘာသာရေးအဆောက်အအုံ ၉ လုံးနဲ့ စာသင်ကျောင်း ၅ ကျောင်း၊ ထန်တလန်မြို့နယ်မှာ အိမ်ခြေ ၂၇ လုံး ပျက်စီးသွားတဲ့စာရင်းကို ရရှိထားတယ်လို့ ကြားကာလ ချင်းအမျိုးသား အတိုင်ပင်ခံကောင်စီက ဆိုပါတယ်။
ပျက်စီးသွားတဲ့ လူနေအိမ်နဲ့ တခြားအဆောက်အအုံတွေကို ပြန်ပြင်ဖို့ အိမ်မိုးသွပ်ပြားတွေ၊ အိမ်ရိုက်သံတွေနဲ့ အမိုးစတွေ၊ စပါးကျီပျက်စီးသွားတဲ့ဒေသတွေအတွက် ဆန်ရိက္ခာနဲ့ အခြေခံစားသောက်ကုန်တွေ၊ အခြေခံအိမ်သုံးဆေးဝါးတွေလိုအပ်နေတယ်လို့လည်း ဆိုပါတယ်။
မိုခါမုန်တိုင်းကြောင့် အိန္ဒိယနိုင်ငံ၊ မီဇိုရမ်ပြည်နယ်၊ လောင်တလိုင်ခရိုင်မှာရှိတဲ့ ချင်းစစ်ဘေးဒုက္ခသည်စခန်း ၄ ခုမှာလည်း လူနေအိမ်တချို့ပျက်စီးသွားတယ်လို့ ချင်းဂျာနယ်က ဖော်ပြထားပါတယ်။
