အင်းတော်မြို့အနောက်ဘက် ၈ မိုင်ခန့်အကွာမှာရှိတဲ့ အောင်းကုန်-နန့်သာ-အင်ပင် သုံးရွာတန်းမှာ စစ်တပ်က တပ်စွဲထားတာကြောင့် အောင်းကုန်း၊နန့်သာ၊အင်ပင်နဲ့ တုံ့တော်ရွာနေသူ ၆၀၀၀ နီးပါး စစ်ရှောင်နေရပြီး ပဲကောက်ချိန်ရောက်နေပေမဲ့ ကောက်ယူရိတ်သိမ်းမရ ဖြစ်နေတယ်လို့ Inndaw Revolution-IR Team က သိရပါတယ်။
အင်းတော်ဒေသခံ တောင်သူတဦးက “ကျနော်တို့က ချောင်းပိုင် ကွင်းပိုင်များတယ်။ အလှည့်ကျ စိုက်ပျိုးပြီးမှ တနှစ်စာအလျင်မှီအောင် လုံးပမ်းရတာ။ စစ်အုပ်ချုပ်ရေးထုတ်ထားလို့ တအား ဖိနေတာ”လို့ ပြောပါတယ်။
မတ် ၂၀ ရက်ကနေ တပ်စွဲထားတာဖြစ်ပြီး ၂ လခန့်ကာလအတွင်းမှာ အောင်းကုန်းရွာနဲ့ တုံ့တော်ရွာကို ၃ ကြိမ်တိုင် မီးရှို့ဖျက်ဆီးခဲ့တာကြောင့် နေအိမ်အနည်းဆုံး ၂၀ လောက် မီးလောင် ပျက်စီးခဲ့ပါတယ်။
အင်းတော်မြို့ဟာ စစ်အုပ်ချုပ်ရေးကြေညာခံထားရပြီး လက်ရှိအထိ ဖမ်းဆီးထားသူတွေထဲက သေဒဏ် စီရင်တဲ့အမှု ၅ ခု အထိရှိနေတဲ့အပြင် နှစ်ဖက် စစ်ရေးထိတွေ့မှု မြင့်မားတဲ့ ဒေသတခုဖြစ်ပါတယ်။
