စစ်တပ်က အာဏာသိမ်းပြီနောက်ပိုင်း မြန်မာနိုင်ငံတဝန်း လျှပ်စစ်မီးတွေ အချိန်ကြာမြင့်စွာ ပြတ်တောက်နေပြီး မန္တလေးမြို့မှာ ရပ်ကွက်အလိုက် သောက်သုံးရေ ပြတ်လပ်မှုတွေ ကြုံတွေ့နေရတယ်လို့ ဒေသခံတွေက ပြောပါတယ်။
လျှပ်စစ်မီးက တစ် ရက် ၄ နာရီသာရရှိတဲ့အတွက် ချမ်းအေးသာဇံမြို့နယ်မှာ ရေပြတ်တောက်မှုတွေ ကြုံနေရတယ်လို့ ရပ်ကွက်နေသူများကပြောပါတယ်။
ရပ်ကွက်နေပြည်သူတစ်ဦးက“မြို့ပေါ်မှာနေတာဆိုတော့ ရေက မီးလာမှတင်လို့ရတာလေ။ လျှပ်စစ်မီးက တစ်ရက်ကို ၄ နာရီပဲလာတယ်။ လာတဲ့ အချိန်လေး ရေတင်ရတယ်။ ရေကိုလည်းချွေတာသုံးနေရတယ်။ နွေရာသီဆိုတော့ ရေတွင်းကလည်း ရေမများတော့ ရေပြတ်လပ်မှုကြုံရတယ်” လို့ ပြောဆိုပါတယ်။
မန္တလေးမြို့မှာ ဧပြီ ၂၁ ရက်ညပိုင်းက လေပြင်းတိုက်ခတ်မှုအပြီး လျှပ်စစ်မီးပြတ်တောက်ချိန်ကြာမြင့်မှုကြောင့် ရပ်ကွက်အများစုမှာ သောက်သုံးရေပြတ်လပ်မှုတွေ ကြုံတွေ့နေရတာကြောင့် ညီနောင်အသင်းများစုပေါင်းပြီး ကူညီပေးနေတယ်လို့ မြို့နယ် လူမှုကူညီရေးပရဟိတ အသင်းများက ပြောပါတယ်။
ဒါ့အပြင် မြန်မာနိုင်ငံ လူမှုကယ်ဆယ်ရေးအဖွဲ့ (မန္တလေးတိုင်းရုံး)အနေနဲ့ ရေဂါလံ ၃၄၀၀ ဆံ့ ရေသယ်ယာဉ်၊ ရေဂါလံ ၁၀၀၀ ဆံ့ ရေသယ်ယာဉ် နဲ့ ရေဂါလံ ၅၀၀ ဆံ့ ရေသယ်ယာဉ်တို့နဲ့ သုံးရေ အခက်အခဲဖြစ်နေတဲ့ရပ်ကွက်တွေကို ဖြန့်ဖြူးပေးနေပါတယ်။
