တနင်္သာရီတိုင်း၊ သရက်ချောင်းမြို့နယ်၊ ရငဲကျေးရွာက ရွာခံ ၁၀၀ နီးပါးကို ဧပြီ ၂၃ ရက် မနက် ၇ နာရီခွဲလောက်မှာ စစ်ကောင်စီတပ်က ဖမ်းဆီးလိုက်တယ်လို့ ဒေသခံတွေက ပြောပါတယ်။
အဖမ်းခံရသူတွေထဲမှာ အသက်ကြီးပိုင်း အမျိုးသား၊ အမျိုးသမီးတွေအပြင် ကလေးတွေပါ ပါဝင်ပြီး အဖမ်းခံရသူ ၁၀၀ နီးပါးရှိတယ်လို့ ပြောပေမဲ့ အရေအတွက်တော့ အတိအကျ မသိရပါဘူး။
ရငဲရွာကနေ ထွက်ပြေးတိမ်းရှောင်လာသူတဦးကတော့ “စစ်တပ်က မနေ့ကတည်းက ရွာနားရောက်နေတာ။ ဒီမနက်မှ ရွာထဲဝင်လာပြီး လိုက်ဖမ်းတာ။ သူတို့လိုက်ဖမ်းတော့ ထွက်ပြေးလို့ သေနတ်လည်း ၄၊ ၅ ချက်လောက် ဖောက်သေးတယ်၊ လူကိုတော့မပစ်ဘူး” လို့ ဒီဗွီဘီကို ပြောပါတယ်။
ထားဝယ်-မြိတ် ကားလမ်းမပေါ်မှာရှိတဲ့ ရငဲကျေးရွာအနီး အခုရက်ပိုင်းအတွင်း တိုက်ပွဲဖြစ်တာမျိုးလည်းမရှိဘဲ ဘာလို့ အခုလို ရွာခံတွေကို ဖမ်းဆီးတာလဲ ဆိုတာကိုတော့ မသိရပါဘူး။
ဖမ်းဆီးခဲ့တဲ့သူတွေကိုတော့ ရငဲရွာ ရွာဦးဘုန်းကြီးကျောင်းထဲမှာ ထိန်းသိမ်းထားပြီး ညနေ ၃ နာရီလောက်မှာတော့ အသက်ကြီးတဲ့သူတချို့နဲ့ ကလေးတွေကို ပြန်လွှတ်လိုက်တယ်လို့ ပြန်လွတ်လာသူတွေနဲ့ နီးစပ်သူတဦးက ပြောပါတယ်။
“မလွှတ်ဘဲထားထားတာက အများကြီးကျန်သေးတယ်။ သူတို့က ရွာထဲဝင်လာတာနဲ့ တွေ့တဲ့သူ အကုန်ဖမ်းတာ။ စျေးသွားတဲ့သူတွေပါ အဖမ်းခံရတာ။ ဖမ်းခံရတာက အမျိုးသမီးတွေ ပိုများတယ်။”
အဖမ်းခံရတဲ့သူတွေအထဲ အနီးအနား ကနက်သီရိကျေးရွာကနေ စျေးသွားရောင်းသူ ၂ ဦးလည်း ပါဝင်ပြီး သူတို့ကတော့ ညနေပိုင်းမှာ ပြန်လွတ်လာပြီလို့ သိရပါတယ်။
“ဖမ်းထားတဲ့သူတွေထဲကမှ ရငဲရွာခံတွေကိုက ပိုစစ်တယ်၊ ရိုက်လည်းရိုက်တယ်။ နင်တို့ရွာက သူပုန်ရွာဆိုပြီလည်း ဆဲတယ်။ တခြားရွာကလူတွေကိုတော့ သိပ်မစစ်ဘူး” လို့ ပြန်လွတ်လာတဲ့ ကနက်သီရိရွာခံတဦးရဲ့ ပြောပြချက်ကို တခြားရွာခံတဦးက ဒီဗွီဘီကို ပြန်ပြောပါတယ်။
ပြီးခဲ့တဲ့ ဖေဖော်ဝါရီ ၇ ရက်နေ့ကလည်း အသက် ၂၀ ကျော်အရွယ် ရငဲရွာခံ လူငယ်နှစ်ဦးကို စစ်ကောင်စီတပ်က ရွာအနီး ဥယျာဥ်ခြံထဲမှာ ဖမ်းဆီးပစ်သတ်ခဲ့ပါသေးတယ်။
