ငြိမ်းချမ်းရေးအတွက် ခရီးရှည်လမ်းလျှောက်ကြွချီတဲ့ “Walk for Peace” ခရီးမှာ ပါဝင်ခဲ့တဲ့ တက္ကဆက်ပြည်နယ်က မြန်မာဆရာတော် အရှင်သီလနန္ဒာကို မြန်မာသံအမတ်ကြီး ဦးကျော်မိုးထွန်းက နယူးယောက်မြို့ရှိ ကုလသမဂ္ဂဆိုင်ရာ မြန်မာသံရုံးမှာ တွေ့ဆုံ ဂါရဝပြုခဲ့ပါတယ်။

ဒေသစံတော်ချိန် မေ ၁၂ ရက်က ပြုလုပ်ခဲ့တဲ့ ဂါရဝပြုပွဲကို မြေဇင်းတောရဆရာတော် ဦးပရမနဲ့ ဗာဂျီးနီးယားပြည်နယ်က ဆရာတော် ဦးကုမုဒတို့လည်း တက်ရောက်ခဲ့ပါတယ်။

နယူးယောက်မြို့၊ ကုလသမဂ္ဂရုံးချုပ်မှာ ကျင်းပခဲ့တဲ့ ဗုဒ္ဓနေ့ အခမ်းအနားကို Walk for Peace ဆရာတော်တွေ တက်ရောက်ခဲ့ကြပြီး အခမ်းအနားအပြီးမှာ ဆရာတော်တွေက သံအမတ်ကြီး ဦးကျော်မိုးထွန်းရဲ့ ဂါရဝပြုမှုကို ဆက်လက်ခံယူခဲ့တာ ဖြစ်ပါတယ်။

တွေ့ဆုံပွဲမှာ မြန်မာပြည် အမြန်ဆုံး ငြိမ်းချမ်းသာယာစေဖို့ ဆရာတော်တွေက ဆုတောင်းပေးခဲ့ကြပါတယ်။

သုတချမ်းသာ

Photo: Sethu Win