ဥရောပမှာ ဖျက်ဆီးဖို့ ရည်ရွယ်ချက်နဲ့ ပါဆယ်ဗုံးခွဲရန်ကြံစည်မှု၊ သူလျှိုအဖြစ် ဆောင်ရွက်မှုတွေ အတွက် ရုရှားနဲ့ဆက်နွှယ်တဲ့ အသက် ၃၀ အရွယ် ယူကရိန်းအမျိုးသားတယောက်ကို ဂျာမန်တရားရုံးတခုက သြဂုတ် ၁၈ ရက်မှာ ထောင်ဒဏ် ၁ နှစ်နဲ့ ၃ လ ချမှတ်လိုက်ပါတယ်။
လုံခြုံရေးအပေါ် လူထုယုံကြည်မှုကို ထိခိုက်စေဖို့ ရည်ရွယ်ပြီး ဥရောပမှာ ပျက်စီးဆုံးရှုံးမှုတွေ ဖြစ်စေရေး ပါဆယ်ဗုံးတွေကို ဖောက်ခွဲဖို့ ရုရှားထောက်လှမ်းရေးနဲ့ ဆက်စပ်တဲ့ ကြံစည်မှုနဲ့ စွပ်စွဲခံရတဲ့ ယူကရိန်းအမျိုးသားတယောက်ကို ပြစ်ဒဏ်ချမှတ်ခဲ့တာပါ။
တခြားတရားခံ ၂ ယောက်ကို အလားတူ တိုက်ခိုက်မှုတွေ ကျူးလွန်ဖို့ ကြံစည်ရာမှာ သိလျက်နဲ့ ပါဝင်ပတ်သက်နေကြောင်း သက်သေအထောက်အထား မရှိနေလို့ တရားသေ လွှတ်ပေးခဲ့ပါတယ်။
အမည်မဖော်တဲ့ ရုရှားနိုင်ငံပိုင် အဖွဲ့အစည်းတခုက စတဲ့ စစ်ဆင်ရေးတခုမှာ ယူကရိန်း ချောစာဝန်ဆောင်မှုကို သုံးပြီး ဂျာမနီကနေ ယူကရိန်းနိုင်ငံဆီ GPS ခြေရာခံကိရိယာတွေနဲ့ အပိုပစ္စည်းတွေပါတဲ့ ပါဆယ်အထုပ် ၂ ထုပ် ပို့ဆောင်ရာမှာ အဆိုပါ ယူကရိန်းနိုင်ငံသား ၃ ယောက် ပါဝင်ပတ်သက်ခဲ့တာပါ။
စတုဂတ်မြို့ အထက်တန်းဒေသဆိုင်ရာ တရားရုံး ပြောရေးဆိုခွင့်ရှိသူ လာ့စ်ကမ်နာက "ပါဆယ် အထုပ် ၂ ထုပ် ပို့ဆောင်မှုကို အမည်မဖော်ချင်တဲ့ ရုရှားနိုင်ငံပိုင် အေဂျင်စီတခုက မှာကြားခဲ့ကြောင်း အထက်လွှတ်တော်က ယုံကြည်ပါတယ်။ ဒီအေဂျင်စီက ရုရှားသိမ်းပိုက်ထားတဲ့ မာရီအူပိုလ်မှာ ရှိနေပြီး အဲဒီကနေတဆင့် ဆွစ်ဇာလန်နိုင်ငံကနေ လွှဲပြောင်းပေးအပ်ခံရတဲ့ တရားခံနဲ့ ဆက်သွယ်ခဲ့တဲ့ ကြားခံလူတဦးကို သုံးခဲ့တယ်” လို့ ပြောပါတယ်။
အခုလအစောပိုင်းမှာ ဂျာမနီနိုင်ငံက အရာရှိတွေက လေဆိပ်မှာ ပေါက်ကွဲစေတတ်တဲ့ ပစ္စည်းတွေ သယ်ဆောင်လာတဲ့ ဒရုန်းတစင်းကိုလည်း တွေ့ခဲ့ပါတယ်။
ဂျာမန်ပြည်ထဲရေးဝန်ကြီး အလက်ဇန္ဒား ဒိုဘရင်ထ် ကတော့ ဒီဖြစ်ရပ်ကို ရောနှောတိုက်ခိုက်မှုလို့ ခေါ်ဆိုခဲ့ပေမဲ့ ဘယ်သူ့ကိုမှ အပြစ်မတင်ခဲ့ပါဘူး။
Source: Reuters
