အင်ဒိုနီးရှားနိုင်ငံမှာ မေ ၈ ရက် မနက်က ဒူကိုနိုမီးတောင် ပေါက်ကွဲပြီးနောက် ပျောက်ဆုံးနေတဲ့ တောင်တက်သမား အယောက် ၂၀ လောက်ကို ကယ်ဆယ်ရေးအဖွဲ့တွေက လိုက်လံရှာဖွေ နေပါတယ်။

ပေါက်ကွဲခဲ့အပြီးမှာ အင်ဒိုနီးရှား အာဏာပိုင်တွေဟာ ပိတ်မိနေတဲ့ တောင်တက်သမား ၂၀ ယောက် ကို အမြန်ကယ်ဆယ်နိုင်ဖို့ အပြေးအလွှား ကြိုးစားနေကြပါတယ်။

လောလောဆယ် စင်ကာပူနိုင်ငံသား တောင်တက်သမား ၂ ယောက်နဲ့ တာနာတေ ဒေသခံတယောက် စုစုပေါင်း ၃ သေဆုံးသွားခဲ့ကြောင်း အတည်ပြုထားပါတယ်‌။

ဒီဖြစ်ရပ်အတွင်း ပျောက်ဆုံးနေသူ အများစုဟာ ကမ္ဘာလှည့်ခရီးသည်တွေဖြစ်ကြပြီး အဲဒီထဲက အနည်းဆုံး ၉ ယောက်ကို စင်ကာပူနိုင်ငံသားတွေအဖြစ် ဖော်ပြထားပါတယ်။

အင်ဒိုနီးရှား အမျိုးသားသဘာဝဘေး စီမံခန့်ခွဲရေးအေဂျင်စီကတော့ ဒဏ်ရာရသူ အရေအတွက်ကို ၅ ယောက် ရှိတယ်ဆိုပြီး သီးခြားထုတ်ပြန်ထားပါတယ်​။

ဒေသစံတော်ချိန် မနက် ၇ နာရီ ၄၁ မိနစ်မှာ ပေါက်ကွဲထွက်ခဲ့တာ ဖြစ်ပေမဲ့လည်း မြောက်ပိုင်း မာလူကူပြည်နယ်က မီးတောင်ကြီးကို ဆက်လက် ​စောင့်ကြည့်နေကြပါတယ်။

၁၀ ကီလိုမီတာအထက် လေထုထဲ မီးခိုးပြာတွေ လွင့်တက်သွားတဲ့အလျောက် အများပြည်သူ ကျန်းမာရေးအတွက် အန္တရာယ်ဖြစ်စေနိုင်တယ်ဆိုပြီး သတိပေးထားပါတယ်။

အဲဒီမီးတောင်လှုပ်ရှားမှု ပိုမိုမြင့်တက်လာတာ တွေ့ရှိခဲ့ရပြီးနောက် လွန်ခဲ့တဲ့ ဧပြီ ၁၇ ရက် ကတည်းက ခရီးသွားဧည့်သည်တွေရဲ့ ဝင်ရောက်ခွင့်ကို ပိတ်ပင်ထားခဲ့တာ ဖြစ်ပါတယ်။

အလားတူ ဧပြီ ၆ ရက်က အဲဒီအနီးနားမှာ အဖွဲ့တဖွဲ့ ခြေလျင်သွားနေစဉ် မီးတောင် ပေါက်ကွဲခဲ့ပေမဲ့ လည်း သေဆုံးထိခိုက်ခဲ့တာမျိုးတော့ မရှိပါဘူး။

ဒူကိုနို မီးတောင်ဟာ အဓိကကျတဲ့ ခရီးသွားလမ်းကြောင်းတွေနဲ့ အလှမ်းဝေးပေမဲ့လည်း ကမ္ဘာလှည့် ခရီးသွားတွေနဲ့ တောင်တက်သမားတွေကြား လူသိများ ရေပန်းစားပါတယ်။

ဒါ့အပြင် အင်ဒိုနီးရှားနိုင်ငံရဲ့  အဆင့်လေးဆင့်ရှိတဲ့ သတိပေးစနစ်ထဲမှာ ဒူကိုနိုဟာ တတိယအမြင့်ဆုံး ဖြစ်ပါတယ်။

ဒါဟာ ဟယ်လ်မဟီရာကျွန်းပေါ်မှာရှိတဲ့ မီးတောင် ၃ ခုထဲက တခုဖြစ်သလို  သက်ဝင်လှုပ်ရှားမှု အများဆုံး မီးတောင်တခု ဖြစ်နေတာကိုလည်း တွေ့ရပါတယ်။

၁၉၃၃ ခုနှစ်ကစပြီး ဆာလဖာဒိုင်အောက်ဆိုဒ် ဓာတ်ငွေ့တွေနဲ့ မီးခိုးပြာတွေ ထွက်လာတာကို မကြာခဏ မြင်တွေ့ရတဲ့အပြင် ဆက်တိုက်ဆိုသလိုပါ ပေါက်ထွက်နေခဲ့တာ ဖြစ်ပါတယ်။

မျက်မြင်သက်သေ ဗီဒီယိုထဲမှာ မီးတောင်ကနေ မီးခိုးလုံးကြီးတွေ ထိုးတက်လာနေတာကို မြင်တွေ့ရပြီး လူတွေဟာ အဲဒီအခြေအနေကို အဝေးကနေ  စောင့်ကြည့်နေကြပါတယ်။ 

အာဏာပိုင်တွေကတော့ မီးတောင်ဝရဲ့ ၄ ကီလိုမီတာ ( ၂ မိုင်ခွဲ) ပတ်လည်အတွင်း ဘယ်လို လှုပ်ရှားမှုမျိုးမှ မလုပ်ဆောင်ကြဖို့ သတိပေးထားပါတယ်။ မီးတောင်လေ့လာရေးအေဂျင်စီကလည်း မိုးရွာရင် မီးတောင်ချော်ရည်စီးဆင်းမှု ဘေးအန္တရာယ် ရှိနိုင်ကြောင်း သတိပေးထားပါတယ်။

မီးတောင်ပေါက်ကွဲမှုကြောင့် လေကြောင်းလိုင်းတွေ ထိခိုက်မှုရှိတယ်ဆိုတဲ့ သတင်းတွေတော့ အခုထိ မကြားရသေးပါဘူး။ 

Source: Reuters