စစ်ကိုင်းတိုင်း၊ ကလေးမြို့မှာ ၂၀၂၃ ခုနှစ် တက္ကသိုလ်ဝင်စာမေးပွဲဖြေဆိုတဲ့ ကျောင်းသား၊ ကျောင်းသူ ၉၀၀ ကျော်ရှိတယ်လို့ စစ်ကောင်စီလက်အောက်ခံ ကလေးမြို့နယ် ပညာရေးဦးစီးဌာနကနေ သိရပါတယ်။
ကလေးမြို့မှာ ၂၀၂၂-၂၀၂၃ ပညာသင်နှစ်တက္ကသိုလ်ဝင်စာမေးပွဲဖြေဆိုဖို့ လျှောက်ထားသူ စုစုပေါင်း ၁၀၂၄ ဦးအနက် အယောက် ၉၁၀ လာရောက်ဖြေဆိုပြီး ပျက်ကွက်သူ ၁၁၄ ဦးရှိတာကြောင့် (၈၈.၉) ရာခိုင်နှုန်း ဖြေဆိုမှုရှိကြောင်း ကလေးမြို့နယ်ပညာရေးဦးစီးဌာက ဆိုပါတယ်။
ကလေးမြို့နယ်မှာ တက္ကသိုလ်ဝင်စာမေးပွဲ ဖြေဆိုကြမယ့် ကျောင်းသား၊ ကျောင်းသူတွေအတွက် စာစစ်ဌာနတွေကို အမှတ် ၁၊ အမှတ် ၃ နဲ့ အင်ဒိုင်းကြီး အခြေခံပညာအထက်တန်းကျောင်းတို့မှာ စစ်ကောင်စီရဲ့ လုံခြုံရေးအင်အားအပြည့်နဲ့ကျင်းပနေတာပါ။
Non CDM ဆရာမတဦးက "မနှစ်က အ.ထ.က (၁) နဲ့ အ.ထ.က ၃ ပဲ စာစစ်ဌာန ၂ ခုနဲ့ စာမေးပွဲကျင်းပရတာ။ အခုနှစ်က အင်ဒိုင်းကြီးစာစစ်ဌာနတိုးတယ်။ ကျောင်းသားဖြေတဲ့သူတွေလည်း တိုးလာတယ်။ ဒါကြောင့် နောက်စာသင်နှစ်မှာ ပိုတိုးလာမယ် မျှော်လင့်တယ်" လို့ ပြောပါတယ်။
ကိုဗစ်ကပ်ရောဂါနဲ့ စစ်အာဏာမသိမ်းမီအချိန်က ကလေးမြို့နယ်မှာ တက္ကသိူလ်ဝင်စာမေးပွဲကို စာစစ်ဌာန ၂၂ ခုနဲ့ ကျင်းပခဲ့ရတယ်လို့ ဆိုပါတယ်။
နိုင်ငံတဝန်း အခုနှစ် မတ် ၈ ရက်ကနေ ၁၈ ရက်နေ့ထိ လက်ရှိဖြေဆိုနေကြတဲ့ တက္ကသိုလ်ဝင် စာမေးပွဲမှာ ဖြေဆိုဖို့ စာရင်းပေးထားသူ ၁၇၉,၀၀၀ ကျော်ရှိပြီး ဖြေဆိုသူ ၁၆၁,၀၀၀ ကျော်ရှိတယ်လို့ စစ်ကောင်စီလက်အောက်ခံ စာစစ်ဦးစီးဌာနက ထုတ်ပြန်ပါတယ်။
ဓာတ်ပုံ&We Love Kalay
