ရန်ကုန်တိုင်း၊ မင်္ဂလာတောင်ညွန့်မြို့နယ်၊ ရေတွင်းကုန်းရပ်ကွက်၊ ၁၂၂ လမ်းက တိုက်တခုရဲ့ ၄ လွှာမှာ ဖေဖော်ဝါရီ ၁၅ ရက် နေ့လယ် ၂ နာရီ ၅၀ မိနစ်လောက်က မီးလောင်မှုဖြစ်ပွားခဲ့ပြီး လသားအရွယ် ကလေးတဦး အပါအဝင် လူ ၅ ဦး ထိခိုက်ဒဏ်ရာရရှိခဲ့တယ်လို့ လူမှုကူညီရေးအသင်းတွေဆီက သိရပါတယ်။
မီးလောင်ခဲ့တဲ့တိုက်ဟာ ၈ ထပ်ဖြစ်ပြီး ၄ လွှာကနေ မီးစတင်လောင်ကျွမ်းတာလို့ သိရပြီး အသက် ၅၀ အရွယ် အမျိုးသမီး ၃ ဦး၊ ၅ နှစ်အရွယ် ကလေးတဦးနဲ့ လသားအရွယ် ကလေးငယ်တဦးတို့ ထိခိုက်ဒဏ်ရာရရှိခဲ့ကာ တတိုက်လုံး မီးခိုးကူးစက်နေလို့ အရေးပေါ် အနေနဲ့ ဝရန်တာကနေ ဆင်းခဲ့ရသူတွေလည်း ရှိပါတယ်။
“လောင်တာက ၄ လွှာက စလောင်တာလို့ ညနေ ၃ ခွဲ အခြေအနေအရ သိရတယ်။ မီးကတော့ ငြိမ်းသွားပါပြီ။ မ ၃ ဦး၊ ၅ နှစ်ကလေး၊ လသားတဦးတော့ မီးခိုးမွှန်လို့ ဆေးကုသပေးရတာ ရှိပါတယ်။ ဘာလို့လောင်မှန်း စုံစမ်းနေဆဲပါ။ အောက်က လျှပ်စစ်စတိုးကလို့ ပထမက ပြောပေမဲ့ အတည်ပြုလို့ မရပါဘူး။ မီးလောင်လို့ ပထမထပ်၊ ဒုတိယထပ်၊ တတိယထပ်တို့က အရေးပေါ်ဆင်းရတာမျိုးတွေ ရှိပါတယ်။ အဲ့အလွှာတွေ တောက်လျှောက် မီးခိုးကူးတာတွေတော့ ရှိပါတယ်” လို့ လူမှုကူညီရေးအသင်းတခုက ဆိုပါတယ်။
အဆိုပါ မီးလောင်မှုကို Level 1 အဆင့်သတ်မှတ်ပြီး မြန်မာနိုင်ငံမီးသတ်ဌာနချုပ်၊ မင်္ဂလာတောင်ညွန့် မီးသတ်ဌာန လူမှုကူညီရေးအသင်းတွေက ဝိုင်းဝန်းငြှိမ်းသတ်ခဲ့ကြလို့ ညနေ ၃ နာရီ ၀၃ မိနစ်မှာ မီးထိန်းနိုင်ကာ ညနေ ၃ နာရီ ၃၀ မိနစ်မှာ မီးငြှိမ်းသတ်နိုင်ခဲ့တယ်လို့ သိရပါတယ်။
