စစ်အာဏာသိမ်းပြီးနောက် မြန်မာနိုင်ငံတဝန်း ဖြစ်ပျက်ခဲ့တဲ့ အဖြစ်အပျက်တွေကို စူးစမ်းလေ့လာနိုင်ဖို့နဲ့ မြန်မာပြည်အတွက်ဖြစ်စေချင်တဲ့ဆန္ဒတွေကို ထုတ်ဖော်ပြောဆိုနိုင်ကြဖို့ ရည်ရွယ်ချက်နဲ့ SEM(Spirit in education movement) နဲ့ တခြားရုပ်သံအဖွဲ့ ၉ ခုက Myanmar Flim Night 2023 ကို ဖေဖော်ဝါရီ ၁ ရက်၊ ၄ ရက်နဲ့ ၅ ရက်တွေမှာ ထိုင်းနိုင်ငံ ဘန်ကောက်မြို့နဲ့ ချင်းမိုင်မြို့တွေမှာ ကျင်းပနေပါတယ်။

ပွဲစီစဉ်သူတဦးက“ film night လို့ အမည်ပေးထားပေမဲ့ စကားဝိုင်းတွေ၊ ကဗျာရွတ်တာတွေပါပါတယ်။ ထိုင်းဘက်က ပညာရှင်တွေ၊ မြန်မာဘက်က တက်ကြွလှုပ်ရှားသူတွေ ပါဝင်ပါမယ်“ လို့ ဒီဗွီဘီကိုပြောပါတယ်။ 

ဘန်ကောက်မြို့မှာ ဖေဖော်ဝါရီလ ၁ ရက်ညက ဘီလူးကတုံး၊ နိုင်ငံပျောက်သူ၊ မြန်မာဒိုင်ယာရီများ ၊The Red အမည်ရ မှတ်တမ်းရုပ်သံဇာတ်လမ်း ၄ ခုပြသခဲ့ပြီးသလို ထိုင်းနိုင်ငံနဲ့ မြန်မာနိုင်ငံမှ Performance artist အနုပညာရှင် ၂ ဦးရဲ့ တင်ဆက်မှုတွေအပြင် စကားဝိုင်းတွေ၊ ကဗျာရွတ်တာတွေ၊ မြန်မာအစားအစာတွေ ကျွေးမွေးတာ၊ ရောင်းချတာတွေ ပြုလုပ်ခဲ့ပါတယ်။

အခမ်းအနားအပြီးမှာလည်း တက်ရောက်လာသူတွေက Stand with Myanmar စာသားကို ဆီမီးနဲ့ ပုံဖော်ကာ မြန်မာပြည်သူတွေနဲ့တသားတည်း ရပ်တည်ကြောင်း ပြသခဲ့ပါတယ်။

အဲဒီပွဲကို ထိုင်းလူမျိုးတွေနဲ့ ထိုင်းရောက်မြန်မာနိုင်ငံသားတွေ ဦးရေ အယောက်  ၃၀၀ ဝန်းကျင်တက်ရောက်ခဲ့ပါတယ်။

ဖေဖော်ဝါရီ ၄ ရက်နဲ့ ၅ ရက်တွေမှာလည်း ထိုင်းနိုင်ငံချင်းမိုင်တက္ကသိုလ်မှာ Last Summer ၊ Where is my human right၊ Letter to a bird၊ XYZ and then A ၊ မြန်မာဒိုင်ယာရီများ၊ Innocent victim၊ Blank၊ Soil without land နဲ့ ဘီလူးကတုံး စတဲ့ရုပ်သံတွေကို ၂ ရက်တာပြသမှာ ဖြစ်ပါတယ်။

အဲဒီပွဲမှာလည်း ကဗျာဝိုင်း၊ စကားဝိုင်း၊ Performance art တွေပါ ထည့်သွင်းကျင်းပမှာ ဖြစ်ပါတယ်။