စစ်ကိုင်းတိုင်း၊ ကသာခရိုင်၊ အင်းတော်မြို့နယ်၊ နဘားကျေးရွာမှာနေထိုင်တဲ့ အလွတ်တန်းသတင်းထောက်၊ စာရေးဆရာမ ဒေါ်ယဉ်ယဉ်သိန်းကို ဖေဖော်ဝါရီ ၁ ရက်က အင်းတော်မြို့နယ် အထူးတရားရုံးကနေ ရာဇသတ်ကြီး ပုဒ်မ-၅၀၅(က) နဲ့ အလုပ်နဲ့ထောင်ဒဏ် ၁ နှစ်ခွဲ အမိန့်ချမှတ်လိုက်တယ်လို့ မိသားစုနဲ့ နီးစပ်သူတွေဆီက သိရပါတယ်။
မိသားစုနဲ့ ရင်းနှီးသူတဦးက “ဆရာမက အလွတ်တန်းသတင်းထောက်လည်း လုပ်တယ်။ သူက စာလည်းရေးတယ်။ သူရေးတဲ့စာအုပ်တွေလည်းရှိတယ်။ ၂၀၂၁ ခုနှစ်၊ နှစ်ကုန်ကာနီးမှာ အဖမ်းခံရတာ၊ ၁ နှစ်ခွဲပြည့်ဖို့ သိပ်မလိုတော့ဘူး၊ လအနည်းပဲကျန်တော့တယ်၊ အခုထက်ထိ အင်းတော်ရဲစခန်း အချုပ်ထဲမှာ ချုပ်ထားတယ်” လို့ ပြောပါတယ်။
မြန်မာနိုင်ငံသတင်းစာဆရာများအသင်း (MJA) အတွင်းရေးမှူးဖြစ်ပြီး အလွတ်တန်း သတင်းထောက်အဖြစ်နဲ့ သတင်းတွေရေးသားရင်း ဒေသတွင်း ပရဟိတအလုပ်တွေ လုပ်ကိုင်နေသူလည်း ဖြစ်တယ်လို့ သတင်းစာလောကမှ သတင်းထောက်တဦးက ဆိုပါတယ်။
