ကျပ်သိန်း ၂,ဝဝဝ ဆု အပါအဝင် ဆုမဲ ၂၂,၅ဝဝ ကျော် ထုတ်ယူဖို့ ပျက်ကွက်နေပြီး နို၀င်ဘာလကုန်အထိ လာမထုတ်ရင် အခွန်ဘဏ္ဍာအဖြစ် သိမ်းမယ်လို့ စစ်အာဏာရှင် လက်အောက်ခံ အောင်ဘာလေသိန်းဆုဌာနက နို၀င်ဘာ ၁ ရက်မှာ ကြေညာပါတယ်။

ပြီးခဲ့တဲ့နှစ် ဒီဇင်ဘာလက ၈၁ ကြိမ်မြောက် အောင်ဘာလေသိန်းဆုဖွင့်ပွဲမှာ ဆုမဲပေါင်း ၁ သိန်း ၆ သောင်းကျော် ခွဲ‌‌ဝေခဲ့ရာမှာ ဆုမဲ ၂၂,၅၂၃ ဆုကို ထုတ်ယူသူ မရှိသေးတာလို့ ဆိုပါတယ်။

ထုတ်ယူသူမရှိသေးတဲ့ ဆုတွေမှာ ကျပ် သိန်း ၂,၀၀၀ ၁ ဆု၊ သိန်း ၅၀၀ ၁ ဆု၊ ကျပ်သိန်း ၁၀ဝ သုံးဆု၊ ကျပ်သိန်း ၅ဝ သုံးဆု၊ ကျပ် ၂ဝ သိန်း ခြောက်ဆု၊ ကျပ် ၁၀ သိန်း ၇ ဆု၊ ကျပ် ၃ သိန်း ၄ ဆု၊ ကျပ် ၂ သိန်း ၁၅၆ ဆု၊ ကျပ် ၁ သိန်း ၉၅၆ ဆု၊ ကျပ် ၅ သောင်းဆု ၅,၈၇၈ ဆု၊ ကျပ် ၁ သောင်းဆု ၁၅,၅၀၈ ဆုတို့ ဖြစ်တယ်လို့ ထုတ်ပြန်ထားပါတယ်။

အဲဒီဆုမဲတွေကို ရန်ကုန်နဲ့ မန္တလေးက အောင်ဘာလေသိန်းဆုဌာနခွဲရုံးကို လာပြီး တင်ပြထုတ်ယူလို့ ရကာ အောက်တိုဘာလကုန်အထိ တင်ပြထုတ်ယူတာ မရှိရင် အခွန်ဘဏ္ဍာအဖြစ် သိမ်းမယ်လို့ ဆိုပါတယ်။

ပြီးခဲ့တဲ့နှစ် နို၀င်ဘာလက ၈၀ ကြိမ်မြောက် အောင်ဘာလေသိန်းဆုဖွင့်ပွဲမှာ ဆုမဲပေါင်း ၁ သိန်း ၆ သောင်းကျော် ခွဲ‌‌ဝေခဲ့ရာမှာ ကျပ်သိန်း ၁,ဝဝဝ ဆု အပါအဝင် ဆုမဲ ၂၄,၄ဝဝ ကျော် ထုတ်ယူဖို့ ပျက်ကွက်ခဲ့တယ်လို့ စစ်အာဏာရှင်လက်အောက်ခံသတင်းစာက အောက်တိုဘာ ၁ ရက်နေ့က ထုတ်ပြန်ခဲ့ပါတယ်။

စစ်တပ်အာဏာမသိမ်းခင် NLD အစိုးရလက်ထက်က အခုလို ဆု​မဲထုတ်ယူဖို့ ပျက်ကွက်တဲ့ ဆုငွေတွေကို ဘဏ္ဍာငွေအနေနဲ့ အကုန်သိမ်းယူတာမရှိဘဲ နောက်ထီဖွင့်ပွဲမှာ အပိုဆုအဖြစ် ထပ်တိုးပေးခဲ့တာလို့ ထီလုပ်ငန်းနဲ့ နီးစပ်သူတွေက ဆိုပါတယ်။

အဲဒီအချိန်က အမြင့်ဆုံးဆုအဖြစ် ကျပ်သိန်း ၁၅,၀၀၀ ပေးနိုင်ခဲ့ပေမဲ့ အာဏာသိမ်းပြီး ပြည်သူအများစုက အောင်ဘာလေထီ ထိုးတာကို ရပ်ဆိုင်းခဲ့တာကြောင့် ထီရောင်းအား ကျဆင်းခဲ့ကာ အမြင့်ဆုံးဆုကို ကျပ် ၅,၀၀၀ သာ ပေးနိုင်တော့တာလို့ ဆိုပါတယ်။

Photo: DVB