တနင်္သာရီတိုင်း၊ လောင်းလုံးမြို့နယ်၊ သကျက်တောကျေးရွာ ရဲကင်းစခန်းက စစ်ကောင်စီလက်အောက်ခံတပ်ဖွဲ့ဝင်တွေဟာ ဒီကနေ့ ဇန်နဝါရီ ၁၄ ရက် မနက်အစောပိုင်းမှာ စခန်းကိုစွန့်ခွာပြီး ရေလမ်းကနေ ထွက်သွားကြတယ်လို့ သကျက်တောရွာခံတွေက ပြောပါတယ်။

သကျက်တောရွာခံ လူငယ်တဦးက "စခန်းမှာ တံခါးတွေတော့ပွင့်နေတယ်၊ လူကတယောက်မှမရှိတော့ဘူး။ စခန်းအပြင်က ဆိုင်းဘုတ်တွေကိုလည်း ဆေးသုတ်ပြီး ဖျက်ပစ်ခဲ့တယ်" လို့ ဒီဗွီဘီကို ပြောပါတယ်။

သကျက်တောရဲကင်းစခန်းမှာ အရင်က ရဲတပ်ဖွဲ့ဝင်နဲ့ စစ်ကောင်စီတပ်ဖွဲ့ဝင် ၁၅ ဦးလောက်ရှိပြီး ဇန်နဝါရီ ၁၃ ရက် မနက်အစောပိုင်းကတော့ စစ်ကောင်စီလက်အောက်ခံတပ်ဖွဲ့ဝင် ၂၀ လောက် ရေလမ်းကနေ ထပ်ရောက်လာတာရှိတယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၆ ရက် မနက်ပိုင်းက သကျက်တော ရဲကင်းစခန်းက တပ်ဖွဲ့ဝင် ၂ ဦး ပြည်သူ့ကာကွယ်ရေးတပ်ဖွဲ့ဝင်တွေ တိုက်ခိုက်တာခံရလို့ ၁ ဦးသေဆုံးပြီး ရဲစခန်းကနေ စစ်ကူထွက်လာတဲ့ စစ်ကောင်စီလက်အောက်ခံတပ်ဖွဲ့ဝင်တွေနဲ့ အပြန်အလှန် ပစ်ခတ်မှုဖြစ်ခဲ့ပါတယ်။

ထားဝယ်-ရှင်မော် ကားလမ်းမပေါ်မှာရှိတဲ့ သကျက်တောရဲကင်းစခန်းကို ပြီးခဲ့တဲ့ ၂၀၂၂ ခုနှစ်၊ မေ ၅ ရက်နေ့ကလည်း ပြည်သူ့ကာကွယ်ရေးတပ်ဖွဲ့တွေ ဝင်ရောက်တိုက်ခိုက်ခဲ့ပြီး ၃ နာရီလောက် အပြန်အလှန်တိုက်ပွဲ ဖြစ်ပွားခဲ့ပါသေးတယ်။