စစ်ကိုင်းတိုင်း၊ တန့်ဆည်မြို့နယ်မှာ စစ်ကောင်စီတပ်တွေနဲ့ ပျူစောထီးတွေက ၅ ရက်အတွင်း ပြည်သူတွေနေထိုင်တဲ့ ရွာ ၈ ရွာကို မီးရှို့ဖျက်ဆီးခဲ့တယ်လို့ ဒေသခံတွေက ပြောပါတယ်။
တပ်မ (၃၃) လက်အောက်ခံ ခမရ ၃၆၁ နဲ့ ခမရ ၃၆၉ တပ်တို့ ဦးဆောင်ပြီး ကန့်ဘလူနဲ့ တန့်ဆည်က ပျူစောထီးတွေလည်းပါတဲ့ စစ်ကြောင်းဟာ တန့်ဆည်မြို့နယ်မြောက်ပိုင်းကို ဝင်ရောက်ပြီး နေ့တိုင်းလိုလို လူနေအိမ်တွေကို မီးရှို့ဖျက်ဆီးနေခဲ့တာကြောင့် အခုအခါ တန့်ဆည်မြောက်ပိုင်းမှာ ကျေးရွာ ၅ ရွာလောက်ပဲ မီးရှို့မခံရဘဲ ကျန်တော့တယ်လို့ ဒေသခံတွေက ဆိုပါတယ်။
ဒီဇင်ဘာ ၁၂ ရက်နေ့မှာ ပေချောင်ရွာက နေအိမ် ၄၃ လုံးအပါအဝင် အဆောက်အဦး ၉၀ကျော် မီးရှို့ဖျက်ဆီးခံရပြီး ဒီဇင်ဘာ ၁၃ ရက်နေ့မှာတော့ ထန်းကုန်းကြီးရွာက နေအိမ် ၇၀ ကျော် မီးရှို့ခံရလို့ အဲဒီရွာမှာ အိမ် ၆ လုံးပဲ ကျန်တော့တယ်လို့ သိရပါတယ်။
ဒီဇင်ဘာ ၁၅ ရက်နေ့ကလည်း တန့်ဆည်မြောက်ပိုင်း ကျေးရွာတွေဖြစ်တဲ့ မူးကျင်းစုကျေးရွာ၊ သာဂရကျေးရွာ၊ သာဂလကျေးရွာ၊ ထန်းပင်ကုန်းကျေးရွာတို့ကို မီးဆက်ရှို့ခဲ့ပြီး ဒီဇင်ဘာ ၁၆ ရက်နေ့ နေ့လယ်ပိုင်းမှာတော့ အဲဒီအကြမ်းဖက်စစ်ကြောင်းဟာ အက်ကြီးရွာကို မီးရှို့ခဲ့ပြီး ညနေ ၆ နာရီလောက်မှာ ရွာရှည် (မ)ကျေးရွာကို မီးရှို့ခဲ့ပါတယ်။ ရွာရှည်ရွာဟာ ဒါနဲ့ဆို ၃ ကြိမ်မြောက်မီးရှို့ခံရတာဖြစ်ပြီး ဒေသခံတွေဟာ စစ်ကောင်စီရန်ကြောင့် ထွက်ပြေးနေကြရလို့ အိမ်ခြေဘယ်လောက်ပျက်စီးတယ်ဆိုတာတော့ မသိရသေးပါဘူး။
တန့်ဆည်နဲ့ ကန့်ဘလူနယ်စပ် စိန်နားရွာမကျေးရွာမှာ ပျူစောထီးသင်တန်းဖွင့်ထားတာကြောင့် အဲဒီသင်တန်းကို ပြည်သူ့ကာကွယ်ရေးတပ်ဖွဲ့တွေ နှောင့်ယှက်လို့မရအောင် သင်တန်းအနီးဝန်းကျင်မှာရှိနေတဲ့ တန့်ဆည် - ကျွန်းလှ - ကန့်ဘလူမြို့နယ်က ကျေးရွာတွေကို စစ်ကြောင်းထိုးမီးရှို့နေတာလို့လည်း ဒေသခံတွေက ပြောပါတယ်။
စစ်တပ်က အာဏာသိမ်းပြီးချိန်ကစလို့ ၂၀၂၂ ခုနှစ် ဒီဇင်ဘာ ၁၄ ရက်အထိ တန့်ဆည်မြို့နယ်မှာ နေအိမ်ပေါင်း ၂၆၄၀ လုံး၊ သာသနိကအဆောက်အဦ ၉ လုံး၊ ကျေးရွာစာကြည့်တိုက် တခု၊ ကျေးရွာဆေးပေးခန်း တခုတို့ မီးရှို့ဖျက်ဆီးခံခဲ့ရတယ်လို့ ဒေသတွင်း သတင်းရင်းမြစ်တွေရဲ့ စာရင်းတွေအရ သိရပါတယ်။
