ကုလသမဂ္ဂက ကန့်ကွက်တဲ့အတွက် အမျိုးသားညီညွတ်ရေးအစိုးရ နိုင်ငံခြားရေးဝန်ကြီးနဲ့ ဒုဝန်ကြီးတို့ Global Townhall 2022 ဆွေးနွေးပွဲကနေ ဖယ်ရှားခံရတဲ့အပေါ် အရှေ့တီမော သမ္မတ ဟိုဆေးရာမို့စ်ဟော်တာက ဝေဖန်လိုက်ပါတယ်။
အင်ဒိုနီးရှား နိုင်ငံခြားရေးမူဝါဒ အသိုင်းအဝန်းက စီစဉ်တဲ့ Global Townhall ဆွေးနွေးပွဲမှာ NUG နိုင်ငံခြားရေးဝန်ကြီးနဲ့ ဒုဝန်ကြီးကို ဟောပြောမယ့်လူစာရင်းမှာ ဖိတ်ကြားထားရာကနေ ကုလသမဂ္ဂအရာရှိက ဖိအားပေးတဲ့အတွက် ပွဲစီစဉ်သူတွေက နိုဝင်ဘာ ၆ ရက်နေ့မှာ ဖိတ်ကြားထားတဲ့ လူစာရင်းကနေ ဖယ်ရှားခဲ့ပါတယ်။
မြန်မာနိုင်ငံမှာ မြန်မာပြည်သူတွေ သတ်ဖြတ်၊ အကျဉ်းချခံနေရချိန်မှာ ကုလသမဂ္ဂရဲ့ သံသယဖြစ်စရာ ကြားနေရေးမူကို ဆက်ထိန်းနေတာလို့ အရှေ့တီမောသမ္မတက ပြောပါတယ်။
ကုလသမဂ္ဂက နောက်တကြိမ် သစ္စာဖောက်တာကို မြန်မာပြည်သူတွေ ထပ်ခံလိုက်ရတယ်လို့ ပြင်းပြင်းထန်ထန် ပြစ်တင်ထားပါတယ်။
ဟောပြောပွဲမှာ NUG က ဝန်ကြီးတွေအစား ကုလသမဂ္ဂ အရာရှိတဦးကို ဟောပြောသူအဖြစ် လူစာရင်းသွင်းခဲ့တယ်လို့ အရှေ့တီမောသမ္မတက သူ့ရဲ့ လူမှုကွန်ရက်စာမျက်နှာမှာ ရေးသားထားပါတယ်။ ဖိတ်ထားပြီးသားသူတွေကို စာရင်းကနေ ပယ်ဖျက်မယ့်အစား ကုလအရာရှိကိုသာ ဖိတ်ကြားမှုကနေ ရုပ်သိမ်းသင့်တယ်လို့လည်း ဝေဖန်ပါတယ်။
Global Townhall 2022 ကို ကုလအတွင်းရေးမှူးချုပ်ဟောင်း ဘန်ကီမွန်း၊ အမေရိကန် လက်ထောက်နိုင်ငံခြားရေးဝန်ကြီးနဲ့ တခြားခေါင်းဆောင်တွေ အွန်လိုင်းကနေ တက်ရောက် ဆွေးနွေးကြတာ ဖြစ်ပါတယ်။
