တနင်္သာရီတိုင်း လောင်းလုံးမြို့အနီး စစ်ကောင်စီတပ်နဲ့ရဲတပ်ဖွဲ့ ပြည်သူ့ကာကွယ်ရေးတပ်ဖွဲ့တွေရဲ့ နှစ်ရက်ဆက်တိုက်ခိုက်ခံခဲ့ရတယ်လို့ ဒေသခံတွေက ပြောပါတယ်။

ထားဝယ်မြို့က ဆင်းလာတဲ့ ​တပ်ဖွဲ့ဝင် ၂၀ လောက်ပါတဲ့ ကားငယ်သုံးစီးဟာ သြဂုတ် ၂၉ ရက်၊ ညနေ ၄ နာရီခွဲလောက်က လောင်းလုံးမြို့အဝင် ဆိုင်းဘုတ်အနီး ထားဝယ်-လောင်းလုံး ကားလမ်း ပေါ်မှာ မိုင်းဆွဲတိုက်ခိုက်ခံခဲ့ရပြီး ၄ ယေက်ထက်မနည်း အပြင်းအထန် ဒဏ်ရာရရှိခဲ့တယ်လို့ သိရပါတယ်။

လောင်းလုံးမြို့ခံ တဦးက "မိုင်းကွဲတာက တော်တော်ကြမ်းတယ်။ အဝေးကနေတောင် မြေကြီးပါတုန်တာ။ မိုင်းကွဲသံကြားပြီး သေနတ်သံတွေလည်း ကြားရတယ်။ နှစ်ဖက် ပစ်တာလား တော့ မသိဘူး" လို့ ပြောပါတယ်။

အဲဒီလို တိုက်ခိုက်ခံရပြီးနောက် ဒဏ်ရာရလို့ ပတ်တီးစီးထားတဲ့ စစ်သား ၄ ယောက်ကို ကားပေါ်မှာ တွေ့လိုက်ရပြီး လောင်းလုံးမြို့နယ် ပြည်သူ့ဆေးရုံကနေတဆင့် ည ၇ နာရီလောက်မှာ ထားဝယ်ကို ခေါ်ဆောင်သွားတယ်လို့ မျက်မြင်တွေ့ရှိသူတွေက ပြောပါတယ်။

တိုက်ခိုက်ခံရတဲ့ အဲဒီတပ်ဟာ လောင်းလုံးမြို့နယ် မြို့မရဲစခန်းက ရဲတပ်ဖွဲ့ဝင်တွေနဲ့ အထွေထွေ အုပ်ချုပ်ရေးဦးစီးဌာနရုံးထဲမှာ တပ်စွဲထားနေတာဖြစ်ပြီး ထားဝယ်မြို့က အပြန်မှာ အခုလို တိုက်ခိုက်ခံခဲ့ရတာ ဖြစ်ပါတယ်။

အဲဒီတိုက်ခိုက်မှုကို ဘယ်ဒေသပြည်သူ့ကာကွယ်ရေးတပ်ဖွဲ့က လုပ်ဆောင်ခဲ့လဲဆိုတာကို မသိရသေးသလို သြဂုတ် ၂၉ ရက် ည ၁၀ နာရီလောက်အထိ ဘယ်အဖွဲ့အစည်းကမှ တစုံတရာ ထုတ်ပြန်ထားတာ မရှိသေးပါဘူး။

သြဂုတ် ၂၈ ရက် မနက် ၁၁ နာရီခွဲလောက်ကလည်း အန်စာတုံးကားနဲ့ စီးနင်းလာတဲ့ စစ်သားတွေကို Dawei Defense Team-DDT တပ်ခွဲ ၃ နဲ့ PLA ဘထူးစစ်ဆင်ရေးအဖွဲ့တို့က လောင်းလုံးမြို့အဝင်မှာ ပစ်ခတ်တိုက်ခိုက်ခဲ့ပါသေးတယ်။

Dawei Defense Team-DDT ကတော့ အဲဒီပစ်ခတ်မှုကြောင့် ဒဏ်ရာရှိခဲ့တဲ့ စစ်သားတွေကို ဆေးရုံသယ်ဆောင်သွားပြီး ဆေးရုံမှာ ၂ ယောက် သေဆုံးခဲ့တယ်လို့ ထုတ်ပြန်ထားပေမဲ့ ဒီဗွီဘီ အနေနဲ့ကတော့ သီးခြားအတည် မပြုနိုင်ပါဘူး။