လာမယ့် ဩဂုတ် ၂၈ ရက်အထိ ရက်သတ္တပတ်အတွင်း မြန်မာနိုင်ငံအောက်ပိုင်းဒေသတွေမှာ မြစ်ရေကြီးမှုအန္တရာယ်ကို သတိပြုကြဖို့ အမျိုးသားညီညွတ်ရေးအစိုးရ (NUG) က သတိပေးထုတ်ပြန်ထားပါတယ်။
NUG အစိုးရ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေး ဝန်ကြီးဌာနရဲ့ ရက်သတ္တပတ် မိုးလေဝသခန့်မှန်းချက်မှာ ခုလိုသတိပေးထားတာဖြစ်ပြီး မုတ်သုံလေဖိအားနည်းဆဲလ် (Monsoon Low Pressure Cell)တစ်ခု ဘင်္ဂလားပင်လယ်အော်မြောက်ပိုင်းမှာ ထပ်မံဖြစ်ပေါ်လာနိုင်ပေမယ့် အားသိပ်မကောင်းနိုင်တာကြောင့် မြန်မာနိုင်ငံဘက် မုတ်သုံမိုးတွေမှာ မိုးသိပ်မရနိုင်တော့ကြောင်းနဲ့ မွန်ပြည်နယ်မှာသာ တစ်ရက်လောက် မိုးများနိုင်တယ်လို့ ဖော်ပြပါတယ်။
ဒါပေမဲ့ ပြီးခဲ့တဲ့ ရက်သတ္တပတ်က မြန်မာနိုင်ငံအထက်ဘက်မှာ ရွာသွန်းခဲ့တဲ့ မိုးရေတွေ အောက်ဘက်ပိုင်းကို ဆက်လက်ဆင်းလာနိုင်ပြီးတော့ မြစ်ရေတွေမြင့်တက်လာနိုင်တာကြောင့် မြစ်ရေကြီးမှု ဘေး အန္တရာယ်ကိုသတိပြုရမယ်လို့ ဆိုပါတယ်။
ပြီးခဲ့တဲ့ သတင်းပတ်တွေက ရန်ကုန်အပါအဝင် မြန်မာနိုင်ငံ ဒေသအနှံ့မှာ ရေကြီးရေလျှံမှုတွေ ဖြစ်ပေါ်ခဲ့ပါတယ်။
