ကရင်နီ (ကယား) ပြည်နယ်၊ ဖရူဆိုမြို့ကနေ စစ်ကြောင်းထိုးလာတဲ့ စစ်ကောင်စီတပ်ကို ကရင်နီပူးပေါင်းတပ်တွေက တိုက်ခိုက်ခဲ့ရာ ၃ ဦးသေဆုံးပြီး လက်နက်ခဲယမ်းတချို့ သိမ်းဆည်းရမိခဲ့ပါတယ်။
ဖရူဆိုမြို့ အခြေစိုက် စစ်ကောင်စီ ခမရ ၅၃၁ တပ်အင်အား ၁၅၀ လောက်ဟာ ဖရူဆိုမြို့အရှေ့ခြမ်းဘက်ကို ထိုးစစ်ဆင်ရာမှာ ဩဂုတ် ၁၃ ရက်မနက်ပိုင်းက တိုက်ခိုက်ခံခဲ့ရတာဖြစ်ပါတယ်။
ကရင်နီတပ်မတော် (KA) နဲ့ ကရင်နီအမျိုးသားများကာကွယ်ရေးတပ် (KNDF) တပ်ရင်း ၁၅ တို့ ပူးပေါင်းပြီး တိုက်ခိုက်ရာ စစ်ကောင်စီဘက်က ၃ ဦးသေဆုံးပြီး ခဲယမ်းတချို့ သိမ်းဆည်းရမိခဲ့တာလို့ KNDF တပ်ရင်း ၁၅ က သတင်းထုတ်ပြန်ထားပါတယ်။
အလားတူ ဩဂုတ် ၁၁ ရက်ကလည်း စစ်ကောင်စီတပ် အမှတ် (၁၄) တန်းမြှင့် စစ်လေ့ကျင့်ရေးကျောင်းကနေ ဖရူဆိုအရှေ့ဘက်ခြမ်းလာတဲ့ အင်အား ၃၀ ဝန်းကျင်လောက် စစ်ကြောင်းကို တိုက်ခိုက်ရာ စစ်ကောင်စီဘက်က ၁ ဦးသေဆုံးခဲ့တယ်လို့ ဖော်ပြထားပါတယ်။
ကရင်နီ(ကယား)ပြည်နယ် ရှားတောမြို့နယ်ဘက်မှာလည်း ဩဂုတ် ၉ ရက်နေ့က ကရင်နီပူးပေါင်းတပ်တွေနဲ့ စစ်ကောင်စီတပ်တို့အကြား တိုက်ပွဲဖြစ်ပွားခဲ့ပြီး စစ်ကောင်စီတပ်သား ၅ ဦးသေဆုံးပြီး အများအပြား ဒဏ်ရာရရှိခဲ့ပါတယ်။
ဩဂုတ် ၇ ရက်နေ့ ရှားတောဒေသအတွင်းက တငူးဆိုတပ်စခန်းကို ထွက်လာတဲ့ စစ်ကောင်စီတပ်ကို ကရင်နီပူးပေါင်းတပ်တွေက တိုက်ခိုက်ခဲ့ရာ ၂ ဦးထက်မနည်းသေဆုံးခဲ့ကြောင်းလည်း KNDF တပ်ရင်း ၁၇ က ထုတ်ပြန်ထားပါတယ်။
