ရှမ်းပြည်အရှေ့ပိုင်း တာချီလိတ်ခရိုင် တာချီလိတ်မြို့မှာ ဒီကနေ့ ဩဂုတ် ၈ ရက်က မိုးသည်းထန်ပြီး ရေကြီးရေလျှံမှုတွေ ဖြစ်ပွားနေပါတယ်။
မနေ့ ည ၁၁ နာရီကျော်လောက်က မိုးသည်းထန်စွာရွာသွန်းပြီး ဒီကနေ့မနက် အိမ်ဝင်းထဲမှာရေတွေပြည့်နေတာလို့ ဆန်ဆိုင်း (က) ရပ်ကွက်နေ ပြည်သူတဦးက ဒီဗွီဘီကို ပြောပါတယ်။
“ရေက ဘယ်ချိန်ကတည်းက တက်နေလဲမသိဘူး။ ကျမတို့ ဒီကနေ့မနက် ၅ နာရီ အိပ်ရာကနိုးတော့ အိမ်ဝင်းထဲမှာ ရေတွေပြည့်နေပြီ။ ရေက ဒူးခေါင်းကျော် ပေါင်ရင်းထိ တက်လာပါတယ်ရှင့်၊ ဘယ်မှသွားလို့မရတော့ဘူး၊ မီးတွေလည်းပျက်နေတယ်၊ အခု (မနက် ၁၀ နာရီကျော်) တော့ ရေနည်းနည်းချင်း ပြန်ကျနေပါတယ်။”
ရေဝင်တဲ့ အိမ်ခြေဘယ်နှလုံးရှိလဲတော့ မသိရပေမယ့် သူတို့လမ်းထဲမှာတော့ အိမ်ခြေ ၁၀ ကျော်ရေဝင်နေကြောင်း၊ ရေကြီးမှုကြောင့် ပျက်စီးဆုံးရှုံးမှုတော့ မသိရသေးဘူးလို့ ဆိုပါတယ်။
ဆန်ဆိုင်း ( က ) ရပ်ကွက်ဟာ မယ်ဆိုင်ချောင်းဘေးမှာရှိပြီး မယ်ဆိုင်ချောင်းရေလျှံရင် ရပ်ကွက်ထဲ အမြဲလိုရေဝင်ကြောင်း၊ အလားတူ မယ်ဆိုင်ချောင်းဘေးမှာရှိတဲ့ မဲခေါင်ရပ်ကွက်၊ တာလော့ရပ်ကွက်တွေလည်း ရေကြီးနေတယ်လို့ တာချီလိတ်ဒေသခံက ပြောသွားပါတယ်။
တာချီလိတ်မြို့နဲ့ မျက်နှာချင်းဆိုင် မယ်ဆိုင်မြို့မှာလည်း မယ်ဆိုင်ချောင်း ဘေးရှိ နေအိမ်အချို့နဲ့ ပုံဖာရပ်ကွက်ထဲမှာလည်း ရေကြီးနေတယ်လို့ မယ်ဆိုင်ဒေ သတွင်း သတင်းမှာ ဖော်ပြပါတယ် ။
