မကွေးတိုင်း ပေါက်မြို့နယ်မှာ ဇူလိုင် ၁၅ ရက်မနက်ပိုင်းက အမျိုးသား တယောက်နဲ့ အမျိုးသမီး တယောက်ကို ပြည်သူ့ကာကွယ်ရေးတပ်ဖွဲ့ PDF သတင်းပေးဆိုပြီး စွပ်စွဲကာ စစ်အုပ်စုက ဖမ်းဆီးသွားတယ်လို့ ဒေသခံတွေက ပြောပါတယ်။
ပေါက်မြို့နယ် ရေပြာရွာလမ်းဆုံ စစ်ကောင်စီရဲ့ ပူးပေါင်းစစ်ဆေးရေးဂိတ်မှာ ဇူလိုင် ၁၅ ရက်နေ့ မနက် ၉ နာရီလောက်က ဦးမော်တင်ကို PDF သတင်းပေးဆိုပြီး စွပ်စွဲဖမ်းဆီးသွားကြတာလို့ ရေပြာကျေးရွာဒေသခံတယောက်က ပြောပါတယ်။
အလားတူ ဘုရားတောင်ကျေးရွာက ဒေါ်မူအေးကိုလည်း ဇူလိုင် ၁၅ ရက် မနက်ပိုင်းက စစ်ကောင်စီရဲ့ ပူးပေါင်းစစ်ဆေးရေးဂိတ်မှာ PDF သတင်းပေးဆိုပြီး စွပ်စွဲဖမ်းဆီးသွားကြတယ်လို့ ဆိုပါတယ်။
ဖမ်းဆီးခံရတဲ့ ဒေသခံ ၂ ယောက်ကို ပေါက်မြို့မရဲစခန်း စစ်ကြောရေးကို ပို့ဆောင်လိုက်ကြပြီး မိသားစုနဲ့ တွေ့ဆုံခွင့်မပေးသလို အစားအသောက်တွေ၊ စောင်တွေ ပေးခွင့်မရဘူးလို့ ဆိုပါတယ်။
ဒေသခံတဦးက “စစ်ကောင်စီတပ်ဖွဲ့တွေကတော့ အပြစ်မဲပြည်သူတွေကို ခေါင်းစဥ် အမျိုးမျိုး တပ်ပြီး ဆက်တိုက်ဖမ်းဆီးနေတာ။ ပြည်သူတွေအနေနဲ့ အပြင်ထွက်မယ်ဆိုရင် မိမိလက်ကိုင်ဖုန်း ကို လုံခြုံမှုရှိအောင်လုပ်ပြီးမှ သွားလာသင့်တယ်” လို့ ပြောပါတယ်။
စစ်ကောင်စီက နိုင်ငံတော်အာဏာကို မတရားသိမ်းပိုက်တဲ့ ဖေဖော်ဝါရီ ၁ ရက်ကနေ ဇူလိုင် ၁၅ ရက်အထိ နိုင်ငံတဝန်း မတရားဖမ်းဆီးချုပ်နှောင်ခံထားရသူ ၁၁၆၂၉ ယောက်အနက် ၁၃၃၃ ယောက် ထောင်ဒဏ်ချမှတ်ခံထားရတယ်လို့ နိုင်ငံရေးအကျဥ်းသားများကူညီစောင့်ရှောက်ရေး အသင်း AAPP က ဇူလိုင် ၁၃ရက်က ထုတ်ပြန်ထားပါတယ်။
