ရခိုင်ပြည်နယ်၊ ဂွမြို့ရဲ့ အနောက်တောင်ဘက် ၁၆ မိုင်အကွာ ပင်လယ်ပြင်ကိုဗဟိုပြုပြီး ပြင်းအား ရစ်ချ်တာစကေး ၅ ဒသမ ၄ အဆင့်ရှိ အင်အားအသင့်အတင့်ရှိမြေငလျင်ဟာ ဇွန် ၁ရက် ည ၁၁ နာရီ ၁၃ မိနစ်လောက်မှာ ပင်လယ်ပြင်မှာ လှုပ်ခတ်ခဲ့တာလို့ မိုးဇလက သတင်းထုတ်ပြန်ပါတယ်။
ငလျင်လှုပ်ခတ်မှုကို ရခိုင်ပြည်နယ်၊ ဧရာဝတီတိုင်းနဲ့ ရန်ကုန်တိုင်းက မြို့နယ်တချို့မှာ သိရှိ ခံစားခဲ့ရတယ်လို့ ဒေသခံတွေက ပြောပါတယ်။
ပုသိမ်မြို့ခံတဦးက “သိမ့်ခနဲ ၃ ချက်လောက် ဖြစ်သွားတာ။ အပျက်အစီးအထိခိုက်တော့ လောလောဆယ်မရှိသေးဘူး။ မနက်မှ သိရမယ်။ လှုပ်တာတော့ တော်တော်ကြမ်းတယ် အားလုံးဘေးကင်းပါစေလို့ပဲ ဆုတောင်းပါတယ်”' လို့ ပြောပါတယ်။
မြေငလျင်လှုပ်ခတ်မှုကြောင့် ပျက်စီးထိခိုက်မှုရှိတဲ့ သတင်းတွေကတော့ မရရှိသေပါဘူး။ မြေငလျင်လှုပ်ခတ်မှုကြောင့် နောက်ဆက်တွဲဖြစ်ပေါ်တက်တဲ့ ဆူနာမီလှိုင်းတက်လာတာမျိုးတော့ မရှိသေးဘူးလို့ ချောင်းသာကမ်းခြေဒေသခံတဦးက ပြောပါတယ်။
