ရှမ်းပြည်နယ်တောင်ပိုင်း၊ နမ့်စန်ကနေပို့လိုက်တဲ့ ငွေကျပ်သန်းပေါင်း ၃,၀၀၀ လောက် တန်ဖိုးရှိတဲ့ စိတ်ကြွဆေးပြားတွေကို စစ်ကိုင်းတိုင်း၊ ကလေးမြို့နယ်မှာ ဖမ်းဆီးရမိတယ်လို့ စစ်အာဏာရှင် လက်အောက်ခံ မူးယစ်ဆေးဝါးထိန်းချုပ်ရေး ဗဟိုအဖွဲ့က ဩဂုတ် ၂၈ ရက်မှာ ထုတ်ပြန်ပါတယ်။

မူးယစ်ဆေးဝါးတားဆီးနှိမ်နင်းရေးရဲတွေနဲ့ ပူးပေါင်းအဖွဲ့ဟာ ဩဂုတ် ၂၃ ရက် မနက် ၇ နာရီမှာ ကလေးမြို့နယ်၊ ချင်းတွင်းတံတားနားမှာ ဇမ်းလျန်းပုမ်း မောင်းနှင်ပြီး ဒိုးရှန်းမန်(ခ)မာန်ဗွေ့ လိုက်ပါလာတဲ့ KIA BOGON ကားကို သတင်းအရ ရပ်တန့်စစ်ဆေးရှာဖွေရာမှာ ကားပေါ်ကနေ စိတ်ကြွဆေးပြား ၉ ဒသမ ၂ သိန်း ဖမ်းဆီးရမိခဲ့တယ်လို့ ဆိုပါတယ်။

ကွင်းဆက်စစ်ဆေးဖော်ထုတ်ချက်အရ စိတ်ကြွဆေးပြားတွေကို လက်ခံသူတွေဖြစ်တဲ့ ကလေးမြို့၊ တောင်ဖီလာရပ်ကွက်နေ ပေါင်ရှင်းတွောင်(ခ)တွမ်ပီး နဲ့ သူ့ဇနီး မဇင်လမ်မာန် တို့ရဲ့နေအိမ်ကို ဝင်ရောက်ရှာဖွေရာမှာ ပေါင်ရှင်းတွောင်(ခ)တွမ်ပီး ကိုမတွေ့ရဘဲ မဇင်လမ်မာန် ကို ဖမ်းဆီးရမိတယ်လို့ ထုတ်ပြန်ပါတယ်။

သူ့ရဲ့ဖော်ထုတ်ချက်အရ ကလေးမြို့၊ ချမ်းမြေ့အောင်စည်ရပ်ကွက်နေ ဟောက်ခန့်ခွာလ် ကို စိတ်ကြွဆေးပြား ၂ ဒသမ ၆ သိန်းနဲ့အတူ ဖမ်းဆီးရမိခဲ့တာကြောင့် ဖမ်းဆီးရမိမှုဖြစ်စဉ်ကနေ စုစုပေါင်း တန်ဖိုးငွေကျပ်သန်း ၂,၉၅၀ တန်ဖိုးရှိတဲ့ စိတ်ကြွဆေးပြား ၁၁ ဒသမ ၈ သိန်း ဖမ်းဆီးရမိခဲ့တယ်လို့ ဆိုပါတယ်။

ကွင်းဆက်စစ်ဆေးဖော်ထုတ်ချက်တွေအရ ဖမ်းဆီးရမိတဲ့ စိတ်ကြွဆေးပြားတွေကို ရှမ်းပြည်နယ်တောင်ပိုင်း နမ့်စန်မြို့နေ ကောင်းစံ က စစ်ကိုင်းတိုင်း၊ တန့်ဆည်မြို့ကို ပို့ဆောင်ရောင်းချပေးတာလို့ ဆိုပြီး သူ့ကိုတော့ ဖမ်းမမိသေးပါဘူး။