ဒီအပတ် ဇူလိုင် ၁ ရက်က ထွက်သွားတဲ့ ထိုင်းအစိုးရထီ ပထမဆု ပေါက်ဂဏန်း ၇၅၁၄၉၅ ကို မြန်မာရွှေ့ပြောင်းလုပ်သား မောင်နှမက ၂ စောင် ပေါက်သွားပြီး ဆုငွေ ဘတ် ၁၂ သန်း (သိန်း ၁၂၀) ရသွားပါတယ်။
အဆိုပါမောင်နှမဟာ ရခိုင်ပြည်နယ်ကဖြစ်ပြီး ထိုင်းအလယ်ပိုင်း စမွတ်စခွန်းမှာ ဆောက်လုပ်ရေး အလုပ်သမားအဖြစ် လုပ်ကိုင်နေတွေဖြစ်တယ်လို့ ဆုငွေထုတ်ယူရာမှာ ကူညီဆောင်ရွက်ပေးခဲ့တဲ့ M.H.A.C မဟာမိတ်အဖွဲ့ ထူထောင်သူ ကိုရဲမင်းက သူ့ရဲ့ လူမှုကွန်ရက်မှာ ရေးသားဖော်ပြပါတယ်။
အဆိုပါ မောင်နှမဟာ အိမ်ထောင်ဘက်ကိုယ်စီလည်းရှိလို့ စုံတွဲ ၂ တွဲက ထိုင်းထီ ၂ စောင်ကို စပ်တူထိုးခဲ့ကြတာဖြစ်တယ်။ ထီပေါက်ကြောင်း M.H.A.C အဖွဲ့ကို အကြောင်းကြားတာကြောင့် အဲဒီ ထီပေါက်တဲ့နေ့မှာပဲ ဆုကြေးငွေတွေကို နေ့ချင်းပြီး ကူညီထုတ်ပေးကာ ကံထူးရှင်လက်ဝယ် လွှဲပြောင်းခဲ့တယ်။ မြန်မာပြည်ရှိ မိဘဆွေမျိုးများထံလည်း ငွေလွှဲပြောင်းပေးဖို့ ကူညီစီစဉ် ပေးသွားမယ်လို့ ဆိုပါတယ်။
ကံထူးရှင် ၂ စုံတွဲကလည်း M.H.A.C မဟာမိတ်အဖွဲ့ ရေရှည်ရပ်တည်နေထိုင်ရေး ရန်ပုံငွေ လှူဒါန်း ခဲ့သလို M.H.A.C အမာခံအဖွဲ့ဝင်တွေနဲ့ အခက်အခဲအမျိုးမျိုးကြောင့် သူတို့ရုံးမှာ လာရောက် ခိုလှုံနေရသူ ဒုက္ခသည်တွေအတွက်လည်း ထောက်ပံ့လှူဒါန်းပေးခဲ့ကြပါတယ်။
AAC အဖွဲ့ကနေ ဒီနေ့ M.H.A.C မဟာမိတ်အဖွဲ့ ဖြစ်လာသည်အထိ တာဝန်ခံ ထုတ်ယူပေးခဲ့ရတဲ့ ထိုင်းထီဘတ် ၆သန်းဆုဟာ စုစုပေါင်း ၆၇ ကြိမ်အထိရှိလာခဲ့ပြီး ပထမဆု ၂ စောင်တွဲ ထုတ်ပေးမှု အကြိမ်ဟာလည်း ၁၁ ကြိမ်မြောက်ရှိလာခဲ့ပြီလို့ သိရပါတယ်။
