စစ်အာဏာရှင်တော်လှန်ရေးအတွက် လက်နက်ဝယ်မယ့်ငွေတွေ အလွဲသုံးစားလုပ်သွားတဲ့ ပင်လုံနည်းပညာတက္ကသိုလ်က ကျောင်းသားတယောက်ကို ရာသက်ပန်ကျောင်းရပ်နားပြီး ယာယီတက္ကသိုလ်ကောင်စီက အမည်ပျက် ကြေညာပါတယ်။

ကျောင်းသား စိုင်းထက်အောင်(ခ) လင်းထင်ဟာ အာဏာရှင်တော်လှန်ရေးပြည်သူ့တပ်မတော်(DRPA)ရဲ့ လက်နက်ဝယ်ဖို့ ငွေကျပ် သိန်း ၁၂၀ ကို အလွဲသုံးစားလုပ်ခဲ့တာလို့ ဆိုပါတယ်။

သူ့ထံကို ၂၀၂၁ ခုနှစ် နိုဝင်ဘာလမှာ ငွေလွှဲပေးခဲ့ပြီးနောက်ပိုင်း သတ်မှတ်ရက်ကျော်တဲ့အထိ မဆက်သွယ်ခဲ့သလို နောက်ထပ် ၂ လစောင့်ပေမယ့် ဆက်သွယ်အကြောင်းပြန်တာမရှိဘူးလို့ တပ်ဖွဲ့က ဆိုပါတယ်။

ဒါကြောင့် အာဏာရှင်တော်လှန်ရေးပြည်သူ့တပ်မတော်(DRPA)က ပင်လုံနည်းပညာတက္ကသိုလ် ကျောင်းသားများ သမဂ္ဂကို အကူအညီတောင်းခဲ့ပါသေးတယ်။

အမျိုးသားညီညွတ်ရေးအစိုးရ၊ ပညာရေးဝန်ကြီးဌာနရဲ့ ပင်လုံနည်းပညာတက္ကသိုလ် ယာယီတက္ကသိုလ်ကောင်စီကလည်း စိုင်းထက်အောင်ကို မတ် ၄ ရက်နေ့မှာ တကြိမ်၊ ၃၀ ရက်မှာတကြိမ် လာရောက်ဖြေရှင်းဖို့ ဆင့်ခေါ်ပေမယ့် မလာခဲ့ဘူးလို့ ထုတ်ပြန်ပြောဆိုထားပါတယ်။

ဒါကြောင့် တော်လှန်ရေးရန်ပုံငွေတွေကို အလွဲသုံးစားလုပ်ပြီး တိမ်းရှောင်ထွက်ပြေးနေတဲ့ စိုင်းထက်အောင်(ခ)လင်းထင်ကို ယာယီတက္ကသိုလ်ကောင်စီရဲ့ ဗဟိုအလုပ်အမှုဆောင်အဖွဲ့ ဆုံးဖြတ်ချက်အရ အမည်ပျက်စာရင်းသွင်းပြီး ကျောင်းကနေရပ်နားလိုက်သလို ကျန်ကိစ္စတွေကိုလည်း သက်ဆိုင်ရာ အဖွဲ့အစည်းတွေနဲ့ ပူးပေါင်းအရေးယူသွားမယ်လို့ ဆိုပါတယ်။