ရန်ကုန်-မန္တလေး လမ်းဟောင်းတွင် ၆ ဘီးကားတစီး တိမ်းမှောက်၊ ၁ ဦးသေဆုံး
DVB
·
May 12, 2022
မန္တလေးတိုင်း၊ ရန်ကုန်-မန္တလေးလမ်းဟောင်း မိုင်တိုင် ၃၄၂/၅ နဲ့ ၆ အကြား ဝမ်းတွင်းမြို့နယ် ရွှေတောင်ရွာမြောက်ဘက်မှာ မေ ၁၁ ရက် ညနေ ၅ နာရီခွဲလောက်က ၆ ဘီး ကန်တာကားတစီး တိမ်းမှောက်ရာ ၁ ဦးသေဆုံးပြီး ၄ ဦး ဒဏ်ရာရသွားတယ်လို့ ဒေသခံတဦးက ပြောပါတယ်။
"မန္တလေးက ကုန်ပစ္စည်းတွေဝယ်ပြီး ဝမ်းတွင်းကို ပြန်လာတဲ့ကားပါ။ ကားရှေ့ဘီးပေါက်ပြီး မှောက်သွားတာ။ ကားဘော်ဒီကြီး လမ်းပေါ်ပြုတ်ကျသွားတယ်။ ကားစပယ်ရာကတော့ နေရာတင် သေဆုံးတယ်။ အမျိုးသမီး ၂ ဦးနဲ့ အမျိုးသား ၂ ဦး ဒဏ်ရာရတယ်။ ကားပေါ်မှာက ကားသမား ၂ ဦးနဲ့ ကလေးငယ်လေးအပါ ခရီးသည် ၈ ဦးပါလာတယ်။ သန္တိသုခ လူမှုကူညီရေးအသင်းက ဆေးရုံပို့ပေးတယ်။"
ဝမ်းတွင်းမြို့နယ် ရွှေတောင်ရွာရဲစခန်းမှာ ယာဉ်မောင်း ကိုကျော်သက်ခိုင်ကို ယာဉ်မဆင်မခြင်မောင်းလို့ လူသေမှု၊ သာမန်ဒဏ်ရာရမှုတို့နဲ့ အရေးယူ အမှုဖွင့်ထားတယ်လို့ သိရပါတယ်။
