ကရင်ပြည်နယ် မြဝတီမြို့နယ်ထဲက စစ်ကောင်စီလက်အောက်ခံနယ်ခြားစောင့်တပ် BGF ထိန်းချုပ်ထားတဲ့ ပွင့်လင်းအေးမြိုင်ကျေးရွာထဲကို စစ်တပ်က ပစ်ခတ်လိုက်တဲ့ လက်နက်ကြီး ကျည်ကျရောက်ပေါက်ကွဲခဲ့တာကြောင့် ဘုန်းတော်ကြီးနှစ်ပါး ဒဏ်ရာရရှိသွားတယ်လို့ မြဝတီ သတင်းအရင်းအမြစ်တစ်ယောက်က ပြောပါတယ်။
ဧပြီ ၃၀ ရက်နေ့ ည ၆ နာရီကျော်လောက်မှာ ပွင့်လင်းအေးမြိုင်ကျေးရွာ ဘုန်းတော်ကြီးကျောင်းဝင်းထဲကို စစ်ကောင်စီတပ် ခမရ ၂၇၅ မှ ပစ်ခတ်လိုက်တဲ့ လက်နက်ကြီးကျည် ကျခဲ့တာပါ။
ဒေသတွင်းသတင်းအရင်းအမြစ်က “မနေ့ည ၆ နာရီခွဲမှာ ရွာဦးကျောင်းကို လက်နက်ကြီး ၂ လုံးကျတယ်။ ခမရ ၂၇၅ က ပစ်တယ်လို့ပြောတယ်။ ဘုန်းကြီးနှစ်ပါး အောက်ပိုင်းထိသွားတယ်။ အောက်ပိုင်းဆိုတာ လက်နက်ကြီးကျည်စတွေ ဝင်ကုန်တာ။ ပြီးတော့ ရွာ အရှေ့မြောက်ဘက်ထိပ်ကိုလည်း လက်နက်ကြီး နှစ်လုံးထပ်ကျတယ်” လို့ ပြောပါတယ်။
ဧပြီ ၂၉ ရက်မှစပြီး မြဝတီမြို့ အမှတ် ၄ ရပ်ကွက်မှာ တိုက်ပွဲတွေ ဖြစ်ပွားခဲ့ပြီး ဧပြီ ၃၀ ရက်က ပွင့်လင်းအေးမြိုင်ကျေးရွာဘက်မှာပါ တိုက်ပွဲတွေ ဆက်လက်ဖြစ်ပွားကာ ဒေသခံ BGF ၂ ယောက်ကိုလည်း BGF တပ်ဖွဲ့အချင်းချင်းက ဖမ်းဆီးသွားတယ်လို့ မြဝတီ သတင်းအရင်း အမြစ်က ပြောပါတယ်။
'”ဧပြီ ၂၉ ရက်မှာ မြဝတီအမှတ် ၄ ရပ်ကွက်မှာ BGF တွေနဲ့ စစ်တပ်နဲ့ ပေါင်းထားတဲ့တပ်ကို KNU က လာတိုက်တယ်။ တနေကုန်ချကြရင်းနဲ့ အရပ်သားတွေရပ်ကွက်ထဲမှာ ပိတ်မိရင်းနဲ့ ပြီးသွားတယ်။ ဧပြီ ၂၉ ရက်နေ့ကြတော့ ပွင့်လင်းအေးမြိုင်ရဲ့မြောက်ဘက်မှာ ရွာတွေပေါ့။ ရွာဆိုတာ အခုမှ စတည်ခါစ လူတွေနေခါစပေါ့။ အဲဒီမှာ ရွှေမြဝတီဈေးဆိုတာရှိတယ်။ DKBA က တည်ထားတဲ့ ဈေးသစ်ကြီး၊ ဆောက်ပြီးခါစပဲရှိသေးတယ်။ ကိုဗစ်ဖြစ်လို့ မဖွင့်ရတာ။ အဲဒီ ဘက်ကိုလာပြီးတော့ BGF အချင်းချင်းပဲ ၂ ယောက်ကို ဖမ်းသွားတယ်။ BGF တပ်ဖွဲ့က လာပြီတော့ အဲဒီက အထိုင် BGF ၂ ယောက်ကို ဖမ်းသွားတယ်။ မနေ့ကလည်း တနေကုန် အဲဒီဘက်ခြမ်းတွေမှာ ကြိုကြား ကြိုကြား တိုက်ပွဲတွေဖြစ်နေတာ ညနေခင်းအထိပဲ။”
၂ ရက်ဆက်တိုက် တိုက်ပွဲတွေဖြစ်ပွားပြီးနောက် မနေ့ညပိုင်းမှာတော့ KNU တပ်ဖွဲ့တွေရှိရာကို ခမရ ၂၇၅ က လက်နက်ကြီးနဲ့ပစ်ခတ်ပေမဲ့ ပွင့်လင်းအေးမြိုင်ကျေးရွာထဲကိုသာ လက်နက်ကြီး ကျည်ကျရောက်ခဲ့တယ်လို့ သိရပါတယ်။
ပွင့်လင်းအေးမြိုင်ကျေးရွာဟာ စစ်ကောင်စီလက်အောက်ခံ BGF တပ်ဖွဲ့များ ထိန်းချုပ်ထားတဲ့ ကျေးရွာဖြစ်ပြီး ရွာအတွင်းမှာ BGF တပ်စခန်းရှိနေတာပါ။
