နိုင်ငံခြားဝင်ငွေကို  တရက်အတွင်း ကျပ်ငွေနဲ့  လဲလှယ်ရမယ့်သူတွေထဲမှာ ကုလသမဂ္ဂဝန်ထမ်းတွေ၊ သံတမန်တွေ၊ နိုင်ငံတကာအဖွဲ့အစည်းဝန်ထမ်း စတာတွေ မပါဘူးလို့ စစ်ကောင်စီလက်အောက်ခံ ဗဟိုဘဏ်က ဧပြီ ၂၀ ရက်မှာ ထုတ်ပြန်ကြေညာပါတယ်။

ပြည်တွင်းဘဏ်တွေရဲ့ စာရင်းကိုဝင်လာသမျှနိုင်ငံခြားငွေတွေကို အမေရိကန် တဒေါ်လာကို မြန်မာကျပ်ငွေ ၁၈၅၀ နှုန်းနဲ့ အခြေခံတွက်ချက်ပြီး အလုပ်လုပ်ရက် ၁ ရက်အတွင်း လဲလှယ်ကြဖို့နဲ့ မလဲလှယ်သူတွေ အရေးယူခံရမယ်လို့ စစ်ကောင်စီ ဗဟိုဘဏ်က ဧပြီ ၃ ရက်နေ့က ညွှန်ကြားခဲ့တာပါ။

အဲဒီညွှန်ကြားချက်မှာ ကင်းလွတ်ခွင့်ပေးမယ့်သူတွေရှိမယ်လို့ ဆိုထားပြီး အခု နိုင်ငံခြားသုံးငွေကြီးကြပ်မှုကော်မတီ အစည်းအဝေးကနေ ငွေလဲစရာမလိုသူတွေကို  ဆွေးနွေးဆုံးဖြတ်ခဲ့တယ်လို့ ဆိုပါတယ်။

ကင်းလွတ်ခွင့် ရသူတွေကတော့ မြန်မာနိုင်ငံရင်းနှီးမြှုပ်နှံမှုကော်မရှင်ရဲ့ ခွင့်ပြုချက်နဲ့ ဆောင်ရွက်နေတဲ့ နိုင်ငံခြားတိုက်ရိုက်ရင်းနှီးမြှုပ်နှံမှုလုပ်ငန်းတွေ၊ အထူးစီးပွားရေးဇုန်တွေမှာ လုပ်ကိုင်ဆောင်ရွက်နေတဲ့ ရင်းနှီးမြှုပ်နှံမှုလုပ်ငန်းတွေ၊ မြန်မာနိုင်ငံနဲ့  သံတမန်ထူထောင်ထားပြီး မြန်မာနိုင်ငံမှာသံရုံးဖွင့်ထားတဲ့ ပြည်ပနိုင်ငံက သံတမန်တွေ၊ မိသားစုဝင်တွေနဲ့ အဲဒီ သံရုံးတွေမှာတာဝန်ထမ်းဆောင်နေတဲ့ သံတမန်၊ အလားတူအဆင့်ရှိတဲ့ သံအဖွဲ့ မှုထမ်းစုမှာပါဝင်တဲ့ နိုင်ငံခြားသားဝန်ထမ်းတွေပါဝင်ပါတယ်။

ဒါ့အပြင် မြန်မာနိုင်ငံထဲက ကုလသမဂ္ဂအဖွဲ့အစည်းနဲ့လက်အောက်ခံ အဖွဲ့အစည်းတွေမှာ တာဝန်ထမ်းဆောင်နေတဲ့ ကုလသမဂ္ဂဝန်ထမ်းတွေနဲ့ ကုလသမဂ္ဂဝန်ထမ်း (laissez-passer) ခရီးသွားလက်မှတ် ကိုင်ဆောင်ထားတဲ့မြန်မာနိုင်ငံသားတွေ၊ ပြည်ပနိုင်ငံတွေက မြန်မာနိုင်ငံမှာ လာရောက်အကူအညီပေးရေး ဆောင်ရွက်နေတဲ့ ဖွံ့ဖြိုးရေးအေဂျင်စီတွေက နိုင်ငံခြားသား ဝန်ထမ်းတွေ၊ ကမ္ဘာ့ကြက်ခြေနီအဖွဲ့အစည်း၊ အပြည်ပြည်ဆိုင်ရာ အလုပ်သမားအဖွဲ့လို အပြည်ပြည်ဆိုင်ရာ အဖွဲ့အစည်းတွေက သံတမန်အဆင့် နိုင်ငံခြားသားဝန်ထမ်းတွေ၊ နိုင်ငံပိုင်/ နိုင်ငံသားပိုင် အပြည်ပြည်ဆိုင်ရာလေကြောင်းလိုင်းတွေလည်း ပါဝင်တာ ဖြစ်ပါတယ်။

ဒါကြောင့် နိုင်ငံခြားသုံးငွေရောင်းဝယ်ဖောက်ကားတဲ့ လုပ်ငန်း(AD)လိုင်စင်ရ ဘဏ်တွေအနေနဲ့ သူတို့နဲ့ ပတ်သက်ပြီး  နိုင်ငံခြားငွေနဲ့ ပတ်သက်တာကိုဆောင်ရွက်ပေးရာမှာ အဲဒီအဖွဲ့အစည်း၊ လုပ်ငန်းတွေဖြစ်တာကို စာရွက် စာတမ်းအထောက်အထားတွေယူပြီး သေသေချာချာ စစ်ဆေးကြဖို့၊ ဆောင်ရွက်ချက်တွေကို ဗဟိုဘဏ်ကို တင်ပြဖို့၊ မှတ်တမ်းထားဖို့ကိုလည်း ဗဟိုဘဏ်က ညွှန်ကြားထားပါတယ်။