ရှမ်းပြည်နယ်တောင်ပိုင်း၊ လွိုင်လင်ခရိုင်၊ ပင်လုံမြို့နယ်၊ စနင်းတောင်ရှိ ရှမ်းပြည်တိုးတက်ရေးပါတီ SSPP/SSA တပ်စခန်းတွေဆီကို စစ်ကောင်စီတပ်နဲ့ ရှမ်းပြည် ပြန်လည်ထူထောင်ရေးကောင်စီ RCSS/SSA တပ်ဖွဲ့ စစ်ကြောင်းတွေဟာ ဧပြီ ၁၉ ရက်က စတင်ပြီး စစ်ရေးလှုပ်ရှားလာနေတယ်လို့ SSPP/SSA က ထုတ်ပြန်ပါတယ်။
စစ်ကောင်စီတပ်ရင်း အမှတ် ၂၇၇/၂၇၈ က ဗိုလ်မှူးထွန်းဝင်းအောင် ဦးဆောင်တဲ့ ခန့်မှန်းအင်အား ၃၀၀ ကျော်လောက်ဟာ ပင်လုံမြို့၊ လဲချားမြို့၊ ကုံးပုံလမ်းခွဲဘက်က တကြောင်း၊ မိုင်းပွန်ဖောင်းဆိုင် လမ်းခွဲဘက်က တကြောင်းနဲ့ နောက်စစ်ကြောင်းတခုကတော့ SSPP/SSA တပ်စွဲထားတဲ့ စနင်းတောင်ဘက်ကို ဦးတည်လာနေတယ်လို့ ဆိုပါတယ်။
တဖက်မှာလည်း RCSS တပ်က စံခေး၊ စံဖ၊ ခိဝ်ဖ တို့ ဦးဆောင်တဲ့ တပ်မအမှတ် ၆၀၆ က စနင်းတောင် အနောက်မြောက်ဘက်ခြမ်းက ဖာလိုင်း၊ ကျိုင်းခမ်းလုံဘက်မှာ စစ်ရေးလှုပ်ရှားနေပါတယ်။
စစ်အင်အား ၉၀ လောက်ရှိတဲ့ နောက်တပ်စုတစုကတော့ စနင်းတောင်ရဲ့ တောင်ဘက်ခြမ်းက နားလောင်း၊ ကုံးခေးရွာဘက်မှာ လှုပ်ရှားနေပြီး တပ်စုအမှတ် ၇၀၇ လည်း လဲချားမြို့ရဲ့ အရှေ့တောင်ဘက်ခြမ်း နမ့်မိုဒေသဘက်က SSPP/SSA တပ်စခန်းအနီးမှာ စစ်ရေးလှုပ်ရှားနေတယ်လို့ ထုတ်ပြန်ချက်မှာ ဖော်ပြထားပါတယ်။
ပင်လုံနယ်မှာရှိတဲ့ SSPP/SSA တပ်စခန်းတွေ ရှိရာဘက်ကို ဦးတည် စစ်ကြောင်းထိုးနေတာနဲ့ ပတ်သက်ပြီး စစ်ကောင်စီတပ်နဲ့ RCSS/SSA က ပြန်ကြားရေး တာဝန်ရှိသူတွေကို မေးမြန်းအတည်ပြုဖို့ ဆက်သွယ်နေပေမယ့် ဆက်သွယ်လို့ မရသေးပါဘူး။
ပြီးခဲ့တဲ့ မတ်လကုန်ပိုင်းကတော့ အာဏာသိမ်း စစ်ကောင်စီရဲ့ အကြီးအကဲတွေဟာ SSPP/SSA တပ် အကြီးအကဲတွေနဲ့ တွေ့ဆုံပြီး ရှမ်းပြည်နယ်တောင်ပိုင်း အတွင်းမှာရှိတဲ့ SSPP/SSA တပ်စခန်းတချို့ကို ရုပ်သိမ်းပေးဖို့ တရားဝင် တောင်းဆိုတာတွေ ရှိခဲ့ပါတယ်။
မြန်မာနိုင်ငံတဝန်းမှာ စစ်အာဏာသိမ်းပြီးနောက် စစ်ကောင်စီတပ်တွေကို ကချင်၊ ကရင်၊ ကရင်နီ၊ ချင်းနဲ့ PDF တပ်တွေက အပြင်းအထန် တိုက်ခိုက်နေကြချိန်မှာ ရှမ်းလက်နက်ကိုင်တပ်တွေကတော့ အချင်းချင်း တိုက်ပွဲတွေ ဖြစ်ပွားနေတာဖြစ်ပါတယ်။
